Read Oku Heb 8 Bible Online

Heb 8 - Oku bible

Heb 8

¹Ketuu kenəə kɛ ghɛse suuyen lu ge: Ketuu se ghɛ́ ntaŋlee nə ghɛsene lu ɛynkii wel ka vi nɛ̂ vin, nɛ əb diom ɛ ɛybee əbkoy əbtaa ɛ kelik əbfon nə Feyine ɛyyio.

²Əb fɛle ɛ kelik kelanene nə Feyine, nkante əbtaa-ɛykokse wɛ nè baklen Bay Feyin nɛ nè báà bàklè wele-mesoŋ.

³Ɛ́ sɛɛ choke ketuu se ghɛ́ ntaŋlee ge əb yɛ gwiy nɛ̀ ɛyfoo se Feyine gese taŋle ntaŋlese, ke me se lu ɛ shii ge kɛ́sene kɛ ketuu se ghɛ́ ntaŋlee yɛ ki sɛ́y kefaa se fo se Feyine.

⁴Əb kè lu nɛ lú ketuu ntiɛ fɛn, é əb jia yɛ lu wele ntaŋle ghɛy, bek ka ghɛ́ ntaŋlee ghɛ́ luune gwiyen nɛ̀ ɛyfoo se Feyine ka ɛysake Mosese dinen.

⁵Ɛyfɛle ghen ka ghɛ́ ntaŋlee ɛ kelik ɛykokse bo fuosen fuosen yɛ ɛy liɛn kelik ɛ ɛyyio. Ghɛy kenəə kɛ ke nè nɛɛyen Feyine suuy se Moses əbliy wɛ əb nè báklèn əbtaa ɛykokse, Feyine suuy se wen ge: “Yɛn ge wɛ̀ lu nɛ wɛ̀ nɛɛy əbnəə əbjim ɛ jii yɛ mɛ nè dinen se wɛ̀ ɛ ketuu kfən.”

⁶Se lu nɛ ɛyfɛl yin yɛ ɛ́ foon se Jesuse chia yɛ́ ghɛ́ ntaŋlee, kɛn ka kelek kɛ əb nɛ́ɛ́yen ge Feyine ghene ghel ə wene laa chian keməə. Ke lu dî bek ka nkakma ten lu kum əbnəə wɛ əb gese jof è chia.

⁷Nè bóy se yɛ lu ge kelek keməə nè lu kekwɛnten fene ɛ́ jia bo yɛ shii kechine.

⁸Feyine nɛy lòò è yɛn ge ghel ə ghii jase, è suuy ge: “Əbliye gwiye, wɛ mɛ wɛ Bay Feyin nɛ̂y laa kelek kechine ghɛse ghele Islaele gese nɛ̀ ghele Juda.

⁹Ke jia nɛ̂y yɛ lu ka kelek kɛ ghɛse ɛbaa ɛbaa ghene nè laan, ɛ əbliy wɛ mɛ nè ghalen ghene, è fəy so se ɛylake Ejibt. Ghene nè báà gese se chii ka kelek ə kome dinen, mɛ me ben jim se ghene. Suuy mɛ wɛ Bay Feyin.

¹⁰Mɛ wɛ Bay Feyine suuy ge: Lɛɛ kelek kefɛɛ kɛ ghɛse ghele Islael nɛy laa əmchii mɛ əm gwiyen: Mɛ nɛ̂y nɛɛy é ghene keele tesak ə tom, è lɛm se ghene tetem. Mɛ nɛ̂y yɛ lu Feyin ə ghen, nɛ̀ ghene lu ghel ə ghom.

¹¹Wel se ghene jia nɛ̂y yɛ dinte əbnəə se ghel ɛlee, kene wele yɛ suuy se wan-nyii ge: Keele wel wɛ luun Báàba. Bek ka ɛ́ nɛ̂y yɛ lu nɛ ghene ghel ɛjime ke mɛ, kene wel əbtɛlɛ, kene əbghaken.

¹²Mɛ nɛ̂y lɛyse mbeese ə ghen, è jia bo yɛ kuume əbjas ə ghen ghɛy.”

¹³Ka Feyine toŋten keleke kine ge kefɛɛ, lu nɛ kɛ mbiye shi kefaa keməə nɛ naa ghɛ kɛ ke məəsenmen, è gese lom se moote se buu.