Read Oku Heb 9 Bible Online

Heb 9 - Oku bible

Heb 9

¹Keleke kɛ́ mbiye nè ki tesak tɛ te dinen ka ghele yɛ kokse Feyin, gese ki kelik ɛ ntiɛ fɛn kɛ ɛ́ baklen ge ɛ́ yɛ kokse Feyin ɛ ten.

²Ɛ́ nè lô bàklè fendaa, è tenen è se toŋte ɛybee bɛy ge kelik kelanene. Lu ɛ kelik nɛ̂ fo, nɛ ketatane kɛ tomen kekaaken ɛ ten lu, gese nɛ̀ ketatan ɛylɛme keban kɛ ɛ́ nè chiysen Feyin so.

³Kelike nɛ̀ lu ɛybame ndəy sɛ nè tenen ndaa ten so nɛ ɛ́ toŋte ge Kelik kɛ ke Lanen è Chia.

⁴Lu ɛ məm fo nɛ ɛ́ lɛm ketatan ɛynyoke kelɛy nɛ ɛ́ tio nɛ̀ ɛytiane, nɛ̀ nkuf wɛ luun nkufe kelek nɛ ɛ́ yiose nɛ̀ ɛytiane tebee tejim. Lu ɛ məme nkuf fo nɛ bas əblee lu nɛ ɛ́ fɛl nɛ̀ ɛytiane nɛ keban kɛ manna[1] lu ɛ məme ten. Mbàŋ ə Aalon nɛ ɛy nè tookemen nè lu ɛ məme nkuf nɛ̂ fo, nɛ̀ ɛtiye ghɛ ɛ́ nè nyaken tesak ə Moses ɛ ten ɛbaa.

⁵Lu ɛ ketuu nkuf fo nɛ ɛ́ lɛm əbnfeksene nchiyse-ndaa nə Feyine əbbua wɛ əb dinen ge Feyine lu fo. Ɛghaa tene nè diaf è ndu, è chite kelik kɛ ɛ́ chíɛ̀ten nɛ̀ əmnduŋme se din ɛylɛyse mbeese nə ghele. Leenen wiy əbliy wɛ kè lòó ɛ́ yɛ sayte əbnəə əbjim se ghɛn.

⁶Lɛɛ jii yɛ ɛ́ nè siysen əbfua vin əbjim ɛ ten. Ghɛ́ ntaŋlee me se lii ɛybee bɛy kechii nɛ kechii nɛɛye ɛyfɛl ə ghen.

⁷Nè lii kɛn ketuu se ghɛ́ ntaŋlee se ɛybee məm kɛn kaŋ ɛymok se nguk, lii wiy ghàà əmnduŋ mɛ əb fó se Feyine, se taŋle ngeŋ ə wen, gese nɛ̀ mbee sɛ ghele nè nɛɛyen ke wiy.

⁸Keyioy Kelanene dine se ghɛsen ge, jii se lii ɛ məme Kelik kɛ ke Lanen è Chia bo bɛɛy ɛyfenen, bek ka əbfua nɛ̂ vine bo bɛɛyen.

⁹Kii nɛ̂ kine lu əbchəyte se din se ghɛsen ɛ mbi lan ge əbfua wɛ ɛ́ foon gese nɛ̀ nyam sɛ ɛ́ taŋlen Feyine so lòó se jia loote siyse tetem ə ghel ghɛ ɛ́ koksen Feyin é te yɛ lu ɛ titiy.

¹⁰Əbnəə vin wɛ ɛ́ suuyen ki kenəə se nɛɛy kɛn nɛ kefaa kɛ yíɛ́ kene kɛ nəə, gese nɛ̀ jii sɛ ɛ́ nè suun ghel se nɛɛy ge ɛ́ laane ɛyshiɛ nə Feyine. Tii nɛ̂ tine nè lu tesak te kum kɛn kechak əbghun, nɛ te nɛ̂y mɛy ɛ əbliy wɛ Feyine kubsen əbnəə əbjim.

¹¹Se lu nɛ Christe gwiymen, nɛ lu ketuu se ghɛ́ ntaŋlee kɛ ke gwiyen nɛ̀ əbnəə əbjuŋe wɛ ghɛsen kiin ɛ leenen kelik kɛ əb fɛ́len ɛ ten jofe chia, gese loote lu nkante kelik chia kɛ ghɛ́ ntaŋlee fɛ́len ɛ ten, nɛ nè báà bàklè ghel, nɛ báà chèmè se lu kɛ mbi fɛne.

¹²Christ nè loo lii se kelik kɛ ke Lanen è Chia, è jia liɛ nɛ lu əmnduŋ mə bvəy kene mɛ̂ nà se taŋle ntaŋle so. Əb nè liɛ nɛ lu mɛ̂ wen mɛ əmnduŋ è ten ghɛsen so kaŋ ɛymok, ke kwɛn dî.

¹³Nè lu se mbiy nɛ wele nɛɛy kenəə kebee ɛ́ liɛ əmnduŋ mə bvəy kene mɛ̂ nà gese nɛ̀ kebvəl kɛ ɛ́ nyoken wan nà è koote è waŋle ɛ wen əbghun ka əb laane se wen əbghun ka ndee ɛylake dinen.

¹⁴Əmnduŋ mə nyamse lɛ nè ki əbtaawe se nɛɛy əbnəə ka vine é wɛ̀ yɛ ke ge mɛ̂ Christ nɛ̂y nɛɛy lɛɛy? Əb fo ngeŋ ə wen se Feyine ka ntaŋle yɛ ɛy báà se ki jas, nɛ giamten keyioy ə Feyin wen. Əb fo dì se suu tetem ə tɛsen ka ghɛsene yɛ kokse Feyin fɛ fe chiin, bo nɛɛye wiy əbnəə əbbee wɛ əb gwiyen nɛ̀ ɛykuo.

¹⁵Lu bek kii nɛ̂ kine kɛ Christ tiyen ɛ nsan nə Feyine ghene ghele se siyse kelek kefɛɛ se nɛɛy ge ghel ghɛ Feyine nè chokenmen kiile əbtik wɛ əb jia yî mɛy ka Feyine nè kaken. Ɛ́ kiile dì, bek ɛykuo yɛ Christ nè kuon se boyse ghel se əbnəə əbbee wɛ ghene nè nɛɛyen ɛ əbliy wɛ kelek keməə nè bo bɛɛyen.

¹⁶Wele sɛɛ tefe ketef, ke naa liɛ kelik kɛn ɛ əbliy wɛ ghele keelemen ge əb kuomen.

¹⁷Ke lu dî bek ge ketefe, lóó ghàà ke yɛ ki ɛyfɛl ɛ əbliy wɛ wel wɛ əb tefen bo chiin. Ke lóó ke yɛ ki ɛyfɛl kɛn ɛ əbliy wɛ əb kuonmen.

¹⁸Ghɛy kenəə kɛ keleke kɛ mbiye nè luun nkante kenəə, nɛ lu kɛn bek əmnduŋ se din ge ɛykuo lu nɛ ɛy liɛ kelik.

¹⁹Nè lu əbliy wɛ Moses nè dintenmen se ghele tesak tejim tɛ Feyine nè foon se wen, əb liɛ əmnduŋ mə nà nɛ̀ mɛ bvəy, è fis nɛ̀ moome, è liɛ əbtame fekake hissob è baksen se ndaf əbbaŋen è chəə se əmnduŋ fɛy, è mis se ŋwaale tesak è gese mis se ghel ɛjim ɛyghun.

²⁰Əb nè mise dì suuye ge: Əmnduŋ mine bɛyte kelek kɛ Feyine nè foon ge ghɛn yɛ́ lɛm.

²¹Lu kɛn ghɛɛ-ghɛɛ ka Moses ko nè gese misen əmnduŋ se əbtaa ɛykokse gese nɛ̀ se əbfua əbjim wɛ ɛ́ nè koksen Feyine so.

²²Kɛ əbluuye lu ge, ɛ́ nè diote lanse əbfua se mbiy nɛ̀ əmnduŋme kɛn ka ɛysake nè dinen, nɛ loo lu nɛ əmnduŋme báà səəke é Feyine jia lɛyse mbeese ghel.

²³Ke nè lu kɛn naa ɛ shii ge ɛ́ yɛ taŋle ntaŋlese, se suu əbfua wɛ ɛ́ feksen nkante əbfua wɛ əb luun ɛ ɛyyio so. Dî nɛ əbfua wɛ əb luun ɛyyio shii ntaŋle yɛ ɛy chian shii nɛ̂ shii.

²⁴Christ di nè báà lii nɛ lu ɛ kelik kelanene kɛ baklen ghel, kɛ ko luun kenfeksene nkante kelik, se taŋle ntaŋle. Əb nè lii kɛn naa ɛyyio bene fɛ əb tiyen ɛ Feyine ɛyshiɛ ɛ kelik nə ghɛsen.

²⁵Ketuu se ghɛ́ ntaŋlee nè sɛɛ lii ɛ kelik kelanene nɛ lu nɛ̀ əmnduŋ mə nyam se taŋle ntaŋle kaŋ ɛymok se nguk; dî nɛ Christ nè báà lii se ɛyyio se yɛ foo ngeŋ ə wen ka ntaŋle ɛ kaŋ ɛ kaŋ ka ghɛ́ ntaŋlee nè nɛɛyen.

²⁶Ke nè bóy se yɛ lu dî fene əb nè kuo ɛ kaŋ ɛ kaŋ kɛɛte se əbliy wɛ Feyine nè bomen mbi. Se lu nɛ əbliye se baksene wɛ mbi mɛy, əb gwiy kaŋ ɛymok, è fo ngeŋ ə wen ka ntaŋle se suu mbeese ghel.

²⁷Ke lu ge wel əbjim lu se kuo kaŋ ɛymok, se ɛybame ten é Feyine sak wen.

²⁸Lu ghɛɛ-ghɛɛ ka Christ nè foon ngeŋ ə wen kaŋ ɛymok ka ntaŋle se suu mbeese ghel se ɛydio. Əb náà kase gwiy ge kaŋ ɛbaa, nɛ báà se lu se suu mbeese ghel. Əb yî gwiy se boyse nɛ lu ghii dii ghɛ ɛ́ chiyten wen.