Read Oku Jɛms 2 Bible Online

Jɛms 2 - Oku bible

Jɛms 2

¹Ghone-nyii, ghɛn ka ghel ghɛ ɛ́ viin ɛytem se Báàba Jesus Christ əbghun wɛ əb ngaŋten chia, bɛɛy wiy se yɛ dine əmndun-ndun.

²Lɛ loo lu ɛ ghɛn ɛydiom ghele yɛ lii gwiy ɛbaa, nɛ əblee mak ndəyse əbkaa əbtaa, è vii nchakse nɛ ɛ́ tio nɛ̀ ɛytiane, nɛ əblee lu wele ketan nɛ əb mak əbfua nɛ əb keke se nchɛk,

³ɛshiɛ ghɛne loote ndu kɛn ɛ wel əbghaken vi əbghun. Ghɛne me suuy se wen ge: Gwiye è diom jii fɛne Babɛy, è suuy se wele ketan vi nɛ lu ge: Teem fɛy, buu dì wɛ̀ gwiy è sɛsen fɛn.

⁴Lɛ loo lu ghɛne nɛɛy dì fene ghɛne báà din əmndun-ndun, è se kiye ghel nɛ̀ tekwaate tebee-a?

⁵Ge mbaa ghone-nyii, Feyine lɛ báà chok ghele ketan ɛ mbi fɛn è loote nɛɛy ghene vii tetem ə ghen se wen əbghun, se lu ghene ghɛ ɛ́ kiin kelik ɛ məme ɛysak nə wen yɛ əb nè kaken ghel ɛjim ghɛ ɛ́ koŋen wen so-a?

⁶Ghɛne choksen ghɛ́ ketane choksen dî nɛ lu ghɛ́ əmkaa ghɛ ɛ́ nəksen ghɛn, liɛ nduu so se ndaa nsak.

⁷Lɛ báà se lu ghɛ́ əmkaa nɛ̂ ghin ghɛ ɛ́ suuyen əbnəə əbbee kum ɛyghel ə Báàba yɛ ɛ́ nè foon se ghɛn-a?

⁸Kè loo lu ghɛne yɛ loote lɛme nchil ɛytaa yɛ əbfone kɛŋen ge ghɛsen yɛ lɛm, yɛ ɛy luun ɛ ŋwaale-Feyin ge: Wɛ̀ lu se yɛ koŋe naa ndɛ kɛn ka wɛ̀ koŋen ngeŋ ə yiɛ, fene ghɛne nɛɛye kenəə kɛ́ titiye.

⁹Dî nɛ ghɛn lòò è yɛ dine əmndun-ndun, fene ghɛne nɛɛye mbee, nɛ ke lu kelaanen ɛ ɛyshiɛ nə Feyine ge ghɛne báà lɛm nchil ə wen.

¹⁰Wele lɛme nchilse Feyin sejim è kol ɛymok fene əb jasmen sejim.

¹¹Ke lu dî bek ge Feyin wɛ əb nè suuyen ge: Ghàà wel yɛ liɛ wiy ə wel, ko gese lu wen wɛ əb nè suuyen ge: Ghàà wel yuy wel. Wel loo lu è jia yɛ liɛ wiy ə wel, dî è yuy wel, fene əb lu nɛ əb jas nchil.

¹²Ke me se lu ge ghɛn yɛ suŋnen gese nɛɛye əbnəə ka ghel ghɛ Feyine náà sak ghene nɛ̀ nchil yɛ ɛy nɛɛyen ge wel yɛ lu keyayten ɛ kenəə ə Feyin.

¹³Ke lu ge, Feyine náà loo tenene nsak ə ghel, è jia yɛ koosen ɛysen se wel wɛ əb nè báà se koosen ɛysen se ghel ɛlee. Dî nɛ wel wɛ əb lóó əb yɛ koosen ɛysen se ghele lu nɛ lòó əb jia fɛy nsak.

¹⁴Ghone-nyii, wel lɛ suuye ge yi fomen ɛytem se Feyin, dî nɛ kenɛɛy ə wen dine wiy fene sɛke ten lu ghɛ se wen? Lɛ lòó Feyine boyse wen ge yi ka əb foon ɛytem se yi ɛ jii nɛ̂ ghan-a?

¹⁵Lɛ loo lu wan-nyii əbluumen, kene əbkiy, gwiy se wel se ghɛn ge yi ki wiy ndəyse se yɛ mak ghene əbfua-əbyíɛ́ne wɛ yiɛ se kechii,

¹⁶wɛ̀ tinse wen kɛn tinsen ge: Jɛle kejuŋ, è ndu, è yɛ lumte gese yiɛ kejuŋ, nɛ̀ wɛ̀ báà fo əbfua vi wɛ əb shiin se toke kechak əbghun so fene sɛke ten lu ghɛ?

¹⁷Di lɛ ka wel lòò è yɛ suuy ge yi fo ɛytem se Feyine, nɛ̀ kenɛɛy ə wen dine wiy fene ɛyteme tene lu ɛykuon.

¹⁸Tame wel suuy ge: Kɛ wel əblee lu ge yi fo ɛytem nɛ lu se Feyine, nɛ kɛ́ wel əblee lu ge yi nɛɛye ka Feyine kɛŋen. Mɛ me fise kome se wel nɛ̂ vi ge: Dine se mɛ ka lòó é wɛ̀ fó ɛytem se Feyine ghàà kenɛɛy kɛ Feyine kɛŋen, é mɛ din se wɛ̀ nɛ̀ kenɛɛy ə kome ge mɛ lu nɛ mɛ fó ɛytem se Feyine.

¹⁹Wel beeme ge Feyine lu kɛn femok, é kii nɛ̂ kine yɛ lu kejuŋ. Dî nɛ wɛ̀ lu se yɛ ke ge chèmè lu ɛyfim fene ɛy beeme sɛy dì, naa gese fane, chiŋe.

²⁰Mɛ din se kengoo tene ge wel fo ɛytem se Feyine nɛ kenɛɛy ə wen dine wiy fene lu kenəə lólò.

²¹Feyine lɛ nè báà bensen Ba ə wɛsen Ablaham ge əb lu əbkwɛnten se yi nɛ lu bek kenəə kɛ əb nè nɛɛyen-a? Əb nè nyiŋsen Ayzek wɛ wán ə wen se ketatane ntaŋle ge yi fo ɛyfô so se Feyine.

²²Ghɛn yɛn yi ka Ablaham nè foon ɛytem ə wen se Feyine è se nɛɛye ka Feyine kɛŋe. Kii nɛ̂ kine me nɛɛy ge ɛytem yɛ əb foon se Feyine yɛ lu loote kenəə.

²³Ghɛy kenəə kɛ ŋwaale-Feyin suuyen ge: Ablaham fo ɛytem ə wen se Feyine, Feyine me liɛ ge əb lu wel wɛ əb kwɛnten se yi, ɛ́ me se toŋte wen ge sun ə Feyin.

²⁴Ghɛn lòó ɛ́ yɛn ge Feyine sɛɛ bénséne wel ge əb kwɛnten se yi bek kenɛɛy ə wen, nɛ wiy kɛn ge əb fo ɛytem se yi mɛy mɛy.

²⁵Ko lu sɛy ka kenəə Lahab wɛ nè luun kejɛl nè luun. Kenəə kɛ ke nè nɛ̀ɛ̀yèn Feyin bensen wen ge wel əbkwɛnten lu kɛ əb nè nɛɛyen. Əb nè fiisen ghel ɛyshiɛ ghɛ́ Islaele è din jii ɛychin ghene nyiŋ ɛ ten.

²⁶Ke me se lu ge, ka əbghun wɛ əb báà se ki keyioy luun kefaa kekuone, lu kɛn ghɛɛ-ghɛɛ ka kenəə kɛ wel yɛ suuy ge yi fo ɛytem se Feyine, nɛ kenɛɛy ə wen dine wiy luun kenkuo kenəə.