Read Oku Jɛms 3 Bible Online

Jɛms 3 - Oku bible

Jɛms 3

¹Ghone-nyii, ghɛn yɛ ke fɛ ndio ghel ɛ ghɛne məm yɛ kɛŋ se yɛ lu ndintese. Mɛ suuy lɛ bek ge Feyine náà sak ghɛs ghɛ ndintese se ghɛs əbnəə ketaan è chia ka əb náà sak wɛ ghel ɛlee.

²Ghɛsen ɛjime nɛɛye əbjas se ɛydio dî nɛ wel jia yɛ nɛɛye kejas ɛ wen ə kesuŋnen, fene əb loote lu wele wɛ̂ titiy ɛ wen ə nchiine, nɛ lòó əb ghal ngeŋ ə wen ɛyjim sɛy.

³Ghɛsen lóó ɛ́ vii nchak ɛ nyam fenkok əbchio ge ɛy yɛ yionen se ghɛsen, ɛ́ vii dì, ɛ́ me yɛ bense nyam ten nduu so ghaa ɛ́ kɛŋen.

⁴Ghɛn liɛ sɛy nfek se kenək kɛ ke jɛ́len ɛ jio ɛyghuy, chèmè lu ka ke ghaken naa se ŋaŋ, nɛ əbfiɛf wɛ əb nɛɛyen nɛ ke jɛle taa se ŋaŋ, lu nɛ wel wɛ əb gufen bense nɛ̀ fe mbàŋe nɛ fe layte ge, nɛ ke me nduu ghaa əb kɛŋen.

⁵Lu ghɛɛ-ghɛɛ ka keleeme luun kelik əbghun layte kɛn lɛ, nɛ lòó ke yɛ yio əbghun ge yi nɛɛye əbnəə əbtaa. Kekoo chèmè loo ghak lɛɛy, fesɛsɛy əbvəse ko nyok.

⁶Keleeme lu ka əbvəs nɛ̂ vi. Lu kelik ə əbghun kɛ əbnəə əbbee naa əbjim əbjim ɛ mbi fɛn chinten è se lu ɛ ten, ke bese wel naa kejim kejim, nɛɛye nɛ ɛychii wel ɛyjime lu ka ɛ́ nyok ɛ əbvəs. Nɛ əbvəs nɛ̂ vi lòò ɛ kechəm əbvəs wɛ əb jia yî mɛy.

⁷Chèmè lu naa ɛynkii nyam ɛykɛ, kene fenən, kene yio, kene səə fene lòó ɛ́ koo è lamse, nɛ̀ ɛ́ ko nè se koo lamsee,

⁸dî nɛ wel wiy wɛ lòó əb lamse keleeme ə wel. Keleeme lu kefaa əbkwak nɛ ke lun nɛ̀ mbee gese nɛ̀ nlik yɛ yuy wel yuyén

⁹Ghɛsen lóó ɛ́ yɛ kokse Bay Feyin wɛ wɛsen nɛ̀ keleeme nɛ ko lu nɛ̀ keghene kɛ ghɛsen liŋen ghel ghɛ Feyine nè bomen ɛ wen ə kenfeksen.

¹⁰Əbchio əbmoke lóó əb yɛ fɛyse əbnəə əbbua, fəyse mbose, fəyse nliŋma. Ghone-nyii, ke wiy se yɛ lu dî.

¹¹Lɛ lòó ntoŋe jio ɛymok yɛ fəyse moo əmnjuŋ, gese fəyse əmbee-a?

¹²Ghone-nyii, lɛ lòó fetame koom ɛ fekake kefel-a? Moo lɛ lòó kefele koom ɛ əbteŋe fenyak-a? Lòó ɛylee jia yɛ fəy ɛ kelik nɛ mòò əmjuŋ kase fəye fo.

¹³Loo lu ɛ ghɛne məm wele yɛ yɛn ge yi feesene gese ke əbnəə, əb din nɛ̀ ndee ə wen ɛyjuŋ ka əb yɛ nɛɛye əbnəə nɛ̀ ɛyngvəmlee gese nɛ̀ əbfee.

¹⁴Ghɛne yɛ lu kɛne, nɛ kenghɛke like liken ɛ ghɛn ə tetem, nɛ wel luŋe kɛn ge kwɛn kii, ghàà ghɛn yɛ yio əbghun ge ghɛne feesene. Ghɛne nɛɛye dì, fene ghɛne tunse əbluuy.

¹⁵Ɛynkii əbfee nɛ̂ ghan báà lòò se Feyine, əb dì lòò nɛ lu ɛ ntiɛ fɛn, nɛ lu ɛykwaate wel, nɛ ɛy lòò nɛ lu ɛ əbkwak ɛyfim.

¹⁶Nɛ loo lu bene fɛ ghele kiin kenghɛk, nɛ wel luŋe kɛn ge kwɛn kii, əbnəə yɛ jef kɛn jefen nɛ ghele gese momle əbnəə əbbee momlen.

¹⁷Dî nɛ wele loo ki əbfee wɛ əb lòòn se Feyine, kɛ mbiye yɛ lu ge əb chii ɛychii ɛylanen, nɛɛye nɛ ghele chii nɛ̀ əmnyiaŋe, lu ge wɛ̀ɛ̀, yio ntaŋ ə ghel ɛlee, koosen ɛysen, nɛɛye əbnəə əbjuŋe, dine wiy əmndun-ndun, gese lɛɛse wiy ghel.

¹⁸Ghele loo lu ge nyiaŋ, nɛɛye ge ghele yɛ chii nyiaŋ, fene əbmakte ə ghen lu ɛychii yɛ́ titiye.