Read Oku Jɛms 4 Bible Online

Jɛms 4 - Oku bible

Jɛms 4

¹Nɛ́ɛ̀ye ghɛ ge ghɛn yɛ noo gese təme ɛyghoŋ? Lɛ wiy nseemese əbnəə lólò sɛ ghɛn kiin ɛ ghɛn ə tetem ka sé domen ghɛn ge ghɛn yɛ nɛɛy əbnəə ten-a?

²Ghɛne shii əbfua, kiile wiy, me yuyte ghel, gese semte əbfua kooy wiy me noo, təme ɛyghoŋ. Ghɛne kiile wiy kefaa kɛ ghɛne kɛŋen, bek ka ghɛne lonen wiy nɛ lu se Feyine.

³Ghɛn chèmè lone ghàà ɛ́ kiile bek ge ghɛne lone nɛ̀ ɛybame se yɛ nɛɛye əbnəə wɛ ɛyghun ə yɛne yusen ge ghɛn yɛ nɛɛy so.

⁴Ghɛn lu ka əbvii wɛ əb kaalen lum, ghɛne báà se ke ge se koo əbsun ghɛne ghele ghɛ́ mbi fɛne lu se yɛ bane Feyin-a? Ke me se lu ge naa ndɛ wɛ əb koŋen əbfua wɛ mbi lu nɛ əb se bane Feyin.

⁵Moo ghɛne kwaate ge əbluuye wiy ɛ kenəə kɛ ɛ́ nyaken ɛ ŋwaale-Feyin ge, Keyioy kɛ Feyine nè viin ɛ ghɛsen ɛyghun ki shii se ghɛsen naa se ŋaŋ.

⁶Ɛycham yɛ Feyine chamen ɛysen se ghɛsen gese chia shii nɛ̂ vin kɛn ka ŋwaale-Feyin suuyen ge: “Feyin náà səkse ghel ghɛ ɛ́ yion əbghun, è cham ɛysene ghel ghɛ ɛ́ ngvəmlen Yi.”

⁷Ghɛn fó ngeŋ ə sɛn è yɛ yionen se Feyine, è tunse Satan, é əb nyiŋ se ghɛn ɛybam.

⁸Ghɛn kokte è baksen se Feyine, é Feyine kokte è baksen se ghɛn. Ghele mbee, ghɛn suu ɛghoo ə ghɛn. Ghel ghɛ ɛ́ kiin tekwaate tebaa, ghɛn fəyse ɛybee se tetem é te yɛ laane.

⁹Ghɛn yɛ soo əbtuu, gese diye. Ghɛn vəse ɛychɛk è yɛ diy diyen. Ghɛn vəse ɛysaŋle, è yɛ soo əbtuu.

¹⁰Ghɛn liɛ ngeŋ ə sɛn ɛ ntiɛ ɛ ɛyshiɛ nə Feyine, ə́b náà lose ghɛn.

¹¹Ghone-nyii, ghàà ghɛn yɛ suuye əbnəə əbbee kum ghone-nyii ɛlee. Naa ndɛ wɛ əb suuyen əbnəə əbbee kum wán no ə wen lu nɛ əb se suuye əbnəə əbbee kum nchil, nɛ wel suuye əbnəə əbbee kum nchil fene əb báà se nɛɛye ka nchil kɛŋen. Wel nɛ̂ vi se suuye ge nchil lu kefaa lólò.

¹²Lu kɛn Feyin wɛ əb foon nchil, nɛ̀ lu wen wɛ əb ghamen ghel sɛy. Lu kɛn wen wɛ lòó əb boyse ghel, nɛ lu kɛn wen wɛ lòó əb yuy wel se wen ə njio. Wɛ̀ me se kwaate ge wɛ̀ lu ndɛ se yɛ suuye əbnəə əbbee kum wel əblee.

¹³Ghɛn yióté, ghɛn ghɛ ɛ́ suuyen ge: Ɛ́ loo lu lan kene likebvəchi é ghɛn chio ɛytin è yɛ chii ɛ ntɛk fɛn, chii ɛ ntɛk fɛɛy se nguk əbful nɛɛye əbwɛy kiile sɛk.

¹⁴Ghɛn lɛ lóó ɛ́ yɛ taŋe ntaŋ dì ke ka likebvəchi luun, gese ka ɛychii yɛne luun-a? Ɛy lu ka mbàk yɛ gvəm se keleŋ əbliy è me kase takle.

¹⁵Ghɛn lu se yɛ suuye nɛ lu ge: Feyine giamten é ghɛs yɛ lu ɛtaa, é ghɛs nɛɛy kenəə kin kene kenəə kii.

¹⁶Dî nɛ ghɛn yio əbghune lólò, gese taa əbchio. Ɛyghaŋse əbghune tene ɛyjim lu kenəə kebee.

¹⁷Ke me se lu ge naa ndɛ wɛ əb keen kenəə kejuŋe kɛ əb nɛɛy, è jia nɛɛy, lu nɛ əb nɛɛy mbee.