Read Oku Jɛms 5 Bible Online

Jɛms 5 - Oku bible

Jɛms 5

¹Ghɛn yióté, ghɛn ghɛ ghel ɛghakene, ghɛn lu se yɛ diy diyen gese toŋe bek ɛynkii ngɛk sɛ ghɛn luun se yɛn.

²Ɛykɛŋ ə yɛne foymen, babvəlese laa ndəy ə sɛn.

³Əbfua ə wɛn wɛ ɛ́ təyen ɛ əbkas əbkaa əbtaa bàŋmen əbjim, nɛ ɛybaŋe tene nɛ̂y yɛ lu əbchəyte se din ge ghɛn nè vii tetem ə tɛn nɛ lu ɛ əbfua nɛ̂ ghan, é ɛyghun ə yɛn baŋ sɛy ka nyok əbvəs dî. Ghɛne baate kɛn ɛykɛŋ ə yɛn kuume wiy ge mbi se mɛye.

⁴Yɛn-a, Yio ka ghel ghɛ ɛ́ nè fɛ́len ɛ ghɛn ə teleme toŋen əbkaa ghen wɛ ghɛn nè fifen ghene è jia lak. Ghel ghɛ ɛ́ nè dənen ɛsaŋ se ghɛn toŋmen Báàba, Wɛ Ba-Əbtaawe-Əbjime yio.

⁵Ghɛn nè chii ɛ ketuu ntiɛ fɛn yiɛ kedɛŋ. Ghɛn yiɛmen, è faŋke è kwɛn ka Feyine sɛ́ɛ́ ghɛn.

⁶Ghɛn lu nɛ ɛ́ toymen əbnəə ɛ ghele ghɛ́ titiye ɛyghun, è yuyte ghene[1].

⁷Ke me se lu ɛ ghone-nyii ge, ghɛn yɛ bosene lu chiyte əbliy wɛ Báàba Jesus náà gwiy ɛ ten. Wele sɛ́ɛ́ lem ɛylem əb yɛ bosene lu chiyte ka ɛyghuu guo ə́b vii əbfua. Əb vii, əb ko yɛ bosene lu chiyte ge ɛyghuu gese loo gwiy, é əb kuy.

⁸Ghɛn lu sɛy se yɛ bosene lu, tiy ketaan bek ge əbliy wɛ Báàba Jesus nɛ̂y gwiy ɛ ten se baksene.

⁹Ghɛne loo chiyte mba ghone-nyii, ghàà wel yɛ vəke wán no ə wen fɛ ɛ́ náà sak wen. Yɛn-a, wel ɛytenen nsak se tiy ɛ əbchio ndaa.

¹⁰Ghone-nyii, ghɛn liɛ nfek se ghele ntum nə Feyine. Ghene nè súŋnêne əbtaawe ɛyghel nə Bay, yɛne ngɛk, kule ɛytem ɛ məme ngɛkse.

¹¹Kiy mba, ghɛsen me se toŋte ghene ge ghel ghɛ kɛ ghene luun kejuŋ, nɛ ke lu kejuŋ dì bek ka ghene nè teem ketaan. Ghɛn yiomen kum ka Job nè kiilen ngɛkse, è teem ketaan, è ko se ke sɛy kenəə kɛ Bay nè nɛɛyen se wen. Bay nè lô cham ɛysene wen, è koosen ɛysen se wen.

¹²Ghone-nyii, kɛ ke luun ɛ shii se ŋaŋ lu ge, wele loo suuy kenəə, əb yɛ ke se kane kenəə se toŋte ɛyyio kene ntiɛ kene naa ghɛ. Dî nɛ, wele yɛ beeme kenəə ge ɛɛn yɛ lu nɛ əb beeme beemen, è tun ge aay yɛ lu nɛ əb tune tunen buu dî é Feyine náà sak wen.

¹³Loo lu ɛ ghɛn ɛ məm nɛ wel yɛne ngɛk, əb yɛ jem ge Feyine giamten yi. Wele yɛ saŋle əb yɛ foo ɛykokse se Feyine.

¹⁴Yɛ lu ge wele yafe, ɛ ghɛne məm, əb jaŋ ghele mbiye ghɛ́ ghɛne kenone, ɛ́ gwiy è jem se wen, è yiose wen nɛ̀ əmngvəlme əbtaawe nə Báàba Jesus.

¹⁵Ɛ́ lóò jem dì, ɛ́ fo ɛytem se Feyine, é wel əbyafen bonen, é Feyine me lose wen, yɛ lu nɛ əb nè lô nɛɛy mbee, é Feyine lɛyse se wen.

¹⁶Ke me se jofe ge wel yɛ jas se ŋwɛl, əb taŋle əbchio se wen, nɛ naa ndɛ jeme se wel əblee, ka Feyine yɛ lu se chuke ghɛn. Ɛyjem ə wel wɛ əb nɛɛyen kenəə kɛ Feyine kɛŋen ki kediak, nɛɛye əbnəə əbtaa.

¹⁷Ghɛn keele ge Elija wɛ nè luun wel ka ghɛsen nè lô jem ketaan ge Feyine ten ɛyghuu. Se lu ɛybame nguk setal nɛ̀ kengianene nɛ kemal ɛyghuu báà kum ntiɛ.

¹⁸Əb naa kase jem, ɛyghuu kɛsen se ɛyyio, əbfua dəmen se ntiɛ è se kuye, koome.

¹⁹Ghone-nyii, ke lòò è gan ge wel se ghɛn jas jii, è jia yɛ nɛɛye kenəə kɛ ke luun ɛ titiy, wel əblee yɛn, è tiyse wen ge əb kase fiile è yɛ nɛɛye kenəə kɛ́ titiye,

²⁰ghɛn yɛ ke ge: Naa ndɛ wɛ əb tiysen wele mbee ge əb fiile se jii ɛybee, lu nɛ əb boyse wen se ɛykuo, è nɛɛy Feyine lɛyse mbeese wen sɛ se dion kɛn lɛ.