Read Oku 1Bi 1 Bible Online

1Bi 1 - Oku bible

1Bi 1

¹Lu mɛ Bita wɛ wele ntum nə Jesus Christ. Mɛ nyake ŋwaale yin se ghel ə Feyine ka Jesus wɛ̂ Nazalet nè choken ghɛ ɛ́ jumen, ɛ́ saanken, è bɛ̀ɛ̀ ɛ Bontus, nɛ̀ Galashia, nɛ̀ Kabadosia, nɛ̀ Asia gese nɛ̀ ɛ Bitinia.

²Feyin wɛ Bay nè lômen chok ghɛn kɛn ka əb nè yimen lɛm, keyioy ə wene me nɛɛy ghɛn se lu ghel ɛlanene. Ghɛne me se yionene se Jesus Christ, wɛ əb suun ghɛn nɛ̀ əmnduŋ mə wen. Feyine ko loote cham ɛysen ə yɛn, è nɛɛy é ghɛn yɛ ki nzəəte.

³Ghɛsen yɛ kokse Feyine wɛ Bay se Báàba ə wɛsen wɛ Jesus Christ, bek ka əb nè chamen ɛysen ə yɛ́sen naa se ŋaŋ, è fo ɛychii ɛyfɛɛ se ghɛsen ka əb nè losen Jesus Christ se ɛykuo. Se lu bek kii nɛ̂ kine, ghɛsen me se chii ki ɛykwaate,

⁴ghɛsene yî yiɛ əbtik wɛ Feyine lɛmen ɛ ɛyyio se ghɛsen nɛ lu əbtik wɛ əb jia yî foy, è jia yî kubsen ɛykek.

⁵Feyine tɛɛke ghɛn nɛ̀ kediak ə wene bek ka ghɛn foon ɛytem se Jesus. Əb nɛ̂y tɛɛke ghɛn se chin se ka əbliy ɛyboy nə ghɛne kwɛn yɛ əb baaten se gwiy so ɛ kenləysene kechii.

⁶Ke me se lu ge, ghɛn yɛ saŋle kɛn saŋlen bek kii nɛ̂ kine, chèmè lu ka ghɛn bɛɛyen se yɛne ngɛk ɛ leenen ɛ jiise ɛ jiise.

⁷Ngɛk nɛ̂ shine gwiye se ghɛn se mome ghɛn ka ɛ́ mom kesaa, se yɛn ge ghɛn sɛ lu nɛ ɛ́ loote fo ɛytem se Jesus-a. Kesaa kɛ ɛ́ mommen nɛ̀ əbvəse lóó ke ko bef. Ɛytem yɛ ghɛn foon se Jesus chia kesaa nɛ̂ kin. Ɛ́ mom ghɛn è yɛn nɛ ghɛne fó ɛytem se Jesus ketaan, é ghɛn yî me kiile ɛykokse nɛ̀ ɛyngvəmlee əbliy wɛ Jesuse kase gwiyen.

⁸Chèmè lu ka ghɛne bɛɛy ghàà tese yɛn wen dì nɛ ghɛn koŋe wen. Ghɛn chèmè yɛne wiy wen ɛ leenen dì, nɛ ɛ́ ko fo ɛytem se wen. Ghɛne me se saŋle naa se ŋaŋ ɛ jii yɛ lòó wel jia keele se fek,

⁹bek ka Feyine foon ɛyboy se ghɛn nɛ lu kefaa kɛ ghɛn nè foon ɛytem se wen bek keghene.

¹⁰Ghele ntum nə Feyine ghɛ ɛ́ nè fekten kum ɛycham yɛ Feyine chamen ɛysen se ghɛn nè lô kiynen, è kiite se keele jii yɛ Feyine nɛ̂y boyse ghɛn.

¹¹Ghene nè kiite se keele ge Feyine sɛ nɛ̂y boyse ghel ɛ leghɛ-a, è kiite se keele ge Fe sɛ nɛ̂y boyse lɛɛy-a? Ghɛy əbliy wɛ Keyioy ə Christ, kɛ ghene nè kiin ɛ ghene ɛ məm nè chioten se ghene, dine ge Christ yi yɛn ngɛk é ɛykokse ə wene me gwiy.

¹²Feyine nè lô din se ghɛ tum nɛ̂ ghine ge, ghene báà se fɛle bek ngeŋse ə ghen, è din ge ghene fɛle nɛ lu bek ghɛn. Əbnəə nɛ̂ vin wɛ ghene nè fekten lu əbghene wɛ ghɛne yion ɛ leenen se ghɛ ntum ghɛ ɛ́ fekten sakghɛ əbjuŋ nè kediake Keyioy Kelanene ke Feyine tumen ɛ ɛyyio. Nchiyse-ndaa nə Feyine ko shii se keele əbnəə nɛ̂ vin.

¹³Ke me se lu ge ghɛn kuume ngeŋ ə sɛn è yɛ lu kebaaten se nɛɛy ɛyfɛl. Ghɛn ghal ngeŋ ə sɛn è loote lɛm ɛykwaate ə yɛn nɛ lu ɛ njuŋ yɛ ghɛne nɛ̂y kiile əbliy wɛ Jesus Christ kasen gwiy.

¹⁴Ghɛn yɛ yionen se Feyine nduu kɛn ɛ mbiy, nɛ ghàà wel kase fiile se ɛychii ɛyməə yɛ ghɛn nè chiin nɛ ɛ́ bɛɛy ghàà yɛ ke Feyin.

¹⁵Ghɛn lu se yɛ lu ɛlanen ɛ əbnəə əbjim wɛ ghɛne nɛɛyen kɛn ka vi wɛ əb nè choken ghɛn luun əblanen,

¹⁶ghɛɛ-ghɛɛ ka ŋwaale-Feyine suuyen ge: “Ghɛn yɛ lu ɛlanen kɛn ka mɛ luun əblanen.”

¹⁷Ghɛne lóó ɛ́ yɛ toŋte wen ge Bay ɛ əbliy wɛ ghɛne jemen, nɛ lu wen wɛ əb tenen nsak ə wel əbjim kɛn ghɛɛ-ghɛɛ ka wel nɛɛyen, dine wiy əmndun ndun. Ke me se lu ge ghɛne loo chii ɛ ketuu ntiɛ fɛn ka ghel ghɛ ɛ́ bɛɛn bɛ́ɛ̀n, ghɛn yɛ ngvəmlee wen.

¹⁸Kéné ghɛn ke ge Feyine nè ten ghɛn fɛ ghɛn baa kuo əbnəə əbbee wɛ ɛbaa ə ghɛne nè biin ghɛn ɛ ten; əb nè báà ten nɛ lu nɛ əbkaa wɛ əb lóó əb bef.

¹⁹Əb nè ten nɛ lu nɛ̀ əmnduŋ mə Jesus Christ mɛ loote lu kefaa ketaa. Əb nè lu Ka wán bvəy njiɛ wɛ əb kiin wiy mbee, ki wiy kelas naa se nkan.

²⁰Feyine nè lômen lɛm ge ɛ́ yî yɛ lu wen naa nɛ mbi geese kɛɛte. Əbliye kwɛn ɛ leenen əb me gwiy nɛ̀ wen ka ghɛne kiile njuŋ.

²¹Se lu bek ɛyfɛl ə Christ nɛ̂ vin wɛ ghɛn foon ɛytem se Feyin fɛ fe nè losen wen se ɛykuo, è fo ɛykokse se wen. Kii nɛ̂ kine me nɛɛy ɛybeeme ə yɛne nɛ̀ ɛykwaate ə yɛne me se yɛkte kɛn əbghun nə Feyine.

²²Leenen wɛ ghɛn suutemen ɛychii ə yɛn bek ka ghɛne yionen se Feyine, è se ki ɛykoŋe yɛ əbluuye se ghone-nyii, ghɛn yɛ koŋe wel nɛ̀ wel nɛ̀ ɛytem ə yɛne ɛyjim.

²³Ke lu dî bek ka ɛ́ biinmen ghɛn ɛfɛɛ bek giɛse Feyin sɛ se mɛyen wiy, sɛ ghɛn yionmen. Bay wɛ əb biin ghɛn wiy wel wɛ lòó əb kuo, lu Feyin fɛ lòó fe jia kuo,

²⁴kɛn ka ŋwaale-Feyine suuyen ge: “Wele mesoŋ lu ka əbgii, nɛ ɛyjof ə wen lu kɛn ka əbmbvəse lu ɛ keghen. Əbgii yoble, əbmbvəse tene me yalen

²⁵Dî nɛ giɛse Baye mɛye wiy.” Giɛ nɛ̂ shin lu sakghɛ əbjuŋ wɛ ɛ́ nè fekten se ghɛn.