Read Oku 1Bi 2 Bible Online

1Bi 2 - Oku bible

1Bi 2

¹Ke me se lu ge ghɛn maay nchiinen sebee naa sejim, è jia yɛ lɛɛse ghel, nfefse wiy, ghɛke wiy kenghɛk gese make wiy koghoŋ naa se nkan.

²Kɛn ka ghon ɛbole lóó ɛ́ yɛ koŋ se yɛ nyoŋ ɛyghen lu ghɛɛ-ghɛɛ ka ghɛn luun se yɛ koŋe giɛse Feyin ka ghɛne yɛ kuy kiile ɛyboy nduu mbiy.

³Ke lu ghɛɛ-ghɛɛ ka ŋwaale-Feyin suuyen ge: “Ghɛn lu nɛ ɛ́ yɛn se ghɛne ngeŋse ge Báàba ki ɛytem ɛyjuŋe.”

⁴Ghɛn gwiy se Báàba wɛ luun ɛytiy yɛ ɛy kiin ɛychii yɛ ghele nè maayenmen ge lu kefaa lólò, Feyine sɛ́y chok ge lu nkante kefaa.

⁵Ghɛn gwiy ka ɛtiy ghɛ ɛ́ kiin ɛychii, fo ngeŋ ə sɛn é ɛ́ baklé ndaa-ɛykokse Feyin so yɛ ghɛne yɛ fɛl ɛ ten ka ghɛ́ ntaŋlee, foo ntaŋle se Feyine yɛ lòó əb fii bek ka ghɛn luun ghel ə Jesus Christ.

⁶Ke lu dî kɛn ka ŋwaale-Feyin suuyen ge: “Yɛn-a, mɛ lu nɛ mɛ chok nkante ɛytiy yɛ mɛ bomen ɛybuu ndaa so ɛ Zion nɛ naa ndɛ wɛ əb foon ɛytem se ɛytiy nɛ̂ yine jia yî kiile kenchoksen.”

⁷Ɛytiy nɛ̂ yin lu nkante kefaa se ghɛn ghɛ ɛ́ foon ɛytem se Jesus, dî nɛ se ghel ghɛ ɛ́ báà fo ɛytem nɛ lu: “Ɛytiy yɛ ghɛ kembome nè maayen ge kefaa lólò ka shiin ɛytiy yɛ ɛ́ tomen ɛybuu ndaa so.”

⁸Ŋwaale-Feyine gese suuy ge: “Lu ɛytiy nɛ̂ yin yɛ ghele nɛ̂y diamten ɛ ten, nɛ lu ɛyghok yɛ ɛy nɛy mak ghel se ɛydio.” Ghene diamten ɛ ten bek ka ghene báà se yionen se giɛse Feyin kɛn ɛyghɛl ka Feyine nè lɛmmen ge ghene yî nɛɛy.

⁹Dî nɛ ghɛn lu ɛykfəə nɛ nè chok Feyin, ghɛ ntaŋle nə əbfon wɛ luun Feyin, ghɛn lu ketum kelanene, lu ghel ghɛ ghɛ́ Feyine, ka əb choken ge ghɛn yɛ fekte əbnəə əbchio əbyúméné wɛ əb nɛɛyen. Lu wen wɛ əb nè jaŋen ghɛn ge ghɛn lòò se nfiine è fəy è gwiy se ɛyban yɛ luun yɛ əbchio əbyúméné.

¹⁰Nè lu əbliy əblee nɛ ghɛn wiy ghel ə Feyin, se lu ɛ leenen nɛ ghɛn shi ghel ə Feyine. Nè lu əbliy əblee nɛ Feyine báà cham ɛysen ə yɛn, se lu ɛ leenen nɛ əb chammen ɛysen ə yɛn.

¹¹Ghone-nyii, bek ka ghɛn luun əbngwiy, bɛɛ bɛɛn ɛ ketuu ntiɛ fɛn, mɛ lone ge, ghɛn maay əbnəə wɛ əbghune yusen ge ghɛn yɛ nɛɛy bek ge əb kase loo noo nɛ lu ngeŋ ə sɛn.

¹²Ghɛne loo chii ɛ məm nə ghel ghɛ ɛ́ báà se ke Feyin, ghɛn yɛ ki ndee ɛyjuŋ ɛ jii yɛ ge ghene chèmè lòò, è yɛ toye ghɛn ge lɛɛ əbnəə əblee wɛ ghɛne nɛɛyen é ghɛn ko yɛ lu se yɛn ge ghɛne nɛɛye nɛ lu əbnəə əbjuŋe, é yî loo lu ɛ kechii ke Báàba kasen gwiyen é ghene yɛ foo ɛykokse se Feyine.

¹³Ka ghɛn shiin ghel ə Báàba, ghɛn yɛ yionen se ghɛ ɛysake. Ghɛn yɛ yionen se əbfone Lûm wɛ ketuu.

¹⁴Kene əbchɛl ə wen wɛ əb lɛmmen ge əb yɛ nəkse ghel ghɛ ɛ́ jasen gese bente ghel ghɛ ɛ́ nɛɛyen əbnəə wɛ əb luun ɛ titiy.

¹⁵Feyine kɛŋe ge ghɛn yɛ nɛɛy əbnəə wɛ əb luun ɛ titiy ka əbngoo wɛ əb suŋnen se nchɛk loo yɛn, è maa kenəə kɛ lòó ghene bo suuy.

¹⁶Ghɛn yɛ chii ka ghel ghɛ ghene luun se ghene ngeŋse, dî liɛ wiy ge ka ghɛn shiin se ghɛne ngeŋse lòó ghɛn me yɛ nɛɛye mbee. Ghɛn yɛ chii ka ghel ghɛ ɛ́ luun ɛ ɛyshas nə Feyine.

¹⁷Ghɛn yɛ ngvəmle wel əbjim, koŋe ghone-nyii se ghɛne kenon ka ghel ɛbeemene, fane Feyin gese ngvəmlee əbfone Lûm.

¹⁸Ghɛn ghɛ ɛ́ fɛ́len se ghele, ghɛn yɛ yionen se ɛbaa ɛyfɛl nə ghɛne gese ngvəmle ghene naa kejuŋ. Ghàà ghɛn yɛ ngvəmle kɛn ghii dii ghɛ ɛ́ kiin ndee ɛyjuŋ gese chɛklee se ghɛn. Ghɛn yɛ ngvəmle sɛy ghii dii ghɛ ɛ́ chɛfken.

¹⁹Ke lu kejuŋ se wel wɛ əb kulen ɛytem è se yɛne ngɛk yio ɛylum ghaa jas, bek ka əb nɛɛyen kenəə kɛ Feyine kɛŋen.

²⁰Wɛ̀ lòò è yɛ yɛne ngɛk, fimsene ka ɛ́ tɛlen wɛ̀ nɛ wɛ̀ nɛɛy nɛ lu kenəə kebee é sɛke ten yɛ lu ghɛ se wɛ̀? Dî nɛ wɛ̀ kè fimsene ka ɛ́ nəksen wɛ̀ se kenəə kejuŋe kɛ wɛ̀ nɛɛyen é Feyine yɛ saŋlee.

²¹Feyine nè chok ghɛn ge ghɛn yɛ yɛne ɛynkii ngɛk nɛ̂ ghan. Christ se wen ə ngeŋ nè lô yɛn ngɛk bek ghɛn se din se ghɛn ka lòó ghɛn yɛ yɛne ngɛk.

²²Əb nè báà yi nɛɛy mbee naa se nkan, è jia yi lɛɛse wel naa ghɛy.

²³Ɛ́ nè tɛylee wen nɛ əb fise wiy, ɛ́ se nəkse wen, nɛ əb foo wiy kàkse se ghele, dî è se lɛme ɛykwaate wen ɛ əbghun nə Feyin wɛ əb tene nsakse ghel ɛ titiy.

²⁴Christ se wen ə ngeŋ nè lô bɛɛy mbee ə sɛsen se wen əbghun è kuo so ɛ kentam ka ghɛsene kuo è lòò se əbghune mbee, è me yɛ chii, nɛɛy əbnəə wɛ titiye. Ke me se lu nɛ nɛɛy əblɛɛme ə wen ge ghɛsen bonen.

²⁵Ghɛn dì nɛ lu ka njiɛ sɛ se nè jasenmen jii se lu nɛ ghɛne kasemen gwiy se nchiy yɛ ɛy chiyen əbyioy ə wɛn.