Read Oku 1Bi 3 Bible Online

1Bi 3 - Oku bible

1Bi 3

¹Lu ghɛɛ-ghɛɛ ka ghɛn ghɛ əbkiye luun se yɛ yionen se ɛlum ə ghɛne, ka ghene ɛlee ghɛ ɛ́ báà beeme Feyine yɛn nchiine ə yɛn ɛyjuŋ, è kubsen tetem ə ghen, è beeme se Feyine; nɛ ɛ́ báà suuy suuyen,

²bek ka ghene yɛ́nen nɛ ghɛn ki ɛygvəmle gese nɛ̀ ndee ɛyjuŋ.

³Ghàà əmngon ə wɛne yɛ lu ɛylaf yɛ ghɛne lafsen ngeŋ ə sɛn ɛ ɛynɛyte əbtuu, ɛyvii əmnchak, gese nɛ̀ ɛymake ndəyse.

⁴Əmngon ə wɛne lu se yɛ lòò nɛ lu ɛ ghɛne tetem tɛ ghele báà se yɛne, dì ghɛy əmnchak mɛ əm jia yî baŋ, mɛ luun ɛychii yɛ nyiaŋ. Di ghɛy nkante kenəə ɛ ɛyshiɛ nə Feyine.

⁵Əbkiy ɛlanene ghɛ mbiye dì nè keke kejuŋ nɛ lu ɛ jii yɛ ghene nè lɛmen ɛykwaate ə ghen se Feyine è se ngvəmle ɛlum ə ghen.

⁶Ghɛy ka Sala nè luun. Əb nè yionen se Ablaham, toŋte wen ge Báàba ə vi. Ghɛn loo lu è yɛ nɛɛy kenəə kɛ ke luun ɛ titiy, fane wiy kefaa, fene ghɛn di shi ghon ə Sala.

⁷Lu ghɛɛ-ghɛɛ ka ghɛn ghɛ ɛluumene lu se yɛ chii ghɛne ghe əbkiy ə ghɛne, chii di ke ge ghene lu ghele ndzək-ɛybol. Ghɛn yɛ goote ghene bek ka ghɛne ghene ghele ɛjime nɛ̂y kiile fomɛ wɛ Feyine foon se ghele ge ghene kiile ɛychii ɛyfɛɛ. Ghɛy ka ghɛne yɛ chii fɛ Feyine báà tɛn se yɛ yiote ɛyjem ə yɛn.

⁸Se mɛyse kenəə kɛ mɛ kè suuyen, é mɛ yɛ suuy se ghɛn ge ghɛn yɛ ki ɛykwaate ɛymok, koosen ɛysen se wel nɛ̀ wel. Wel se ghɛn lu se yɛ koŋe wel əblee ka wán-nyii. Ghɛn yɛ giɛknen, ki ɛyvəm se wel nɛ̀ wel gese ki ndee ɛybonen.

⁹Wel nɛɛy kenəə kebee se wɛ̀, ghàà wɛ̀ seese nɛ̀ kenəə kebee. Wele tɛy wɛ̀, ghàà wɛ̀ seese. Wel tɛy wɛ̀, wɛ̀ sɛ̂y yɛ lon ge Feyine bose wen bosen, bek ge lu ɛybose nɛ̂ yin yɛ Feyine nè choken ghɛn ge ghɛn yî yɛ ki.

¹⁰Ke lu dî kɛn ka ŋwaale-Feyine suuyen ge: “Wel loo koŋ se yî se loote se chii se yio əbjuŋ, Əb maay kesuŋnen kebee, è gese yal ɛyyia əbbuam.

¹¹Əb lu se fiile se ɛybam əbnəə əbbee se yɛ nɛɛy nɛ lu njuŋ: Əb lu se yɛ luŋ, fɛle ketaan se yɛ fəy kejuŋ ghene ghele.

¹²Bek ge ɛshiɛ ə Feyine lu əbghun nə ghel ghɛ ɛ́ chiin ɛ titiy, nɛ əbtuule wene lu ɛyyio se yiote ɛyjem ə ghen. Dî nɛ Feyine ba se beeme kenəə kɛ ghele mbee nɛɛyen.”

¹³Lòó nɛɛy ndɛ kenəə kebee se ghɛn ɛ lefɛ ghɛne mommen ketaan se yɛ nɛɛye əbnəə wɛ əb luun ɛ titiy.

¹⁴Ghɛn chèmè lòò è yɛ yɛne ngɛk bek əbnəə wɛ titiye wɛ ghɛne nɛɛyen, é Feyine nɛ̂y bose ghɛn. Ghàà ghɛn yɛ fane wel, nɛ ghàà tetem ə tɛne yɛ foo ngɛk se ghɛn.

¹⁵Ghɛn lu se yɛ kokse nɛ lu Christ ɛ ghɛn ə tetem ka Báàba ə wɛn, lu kebaaten əbliy əbjim se fise naa ndɛ wɛ əb bifen ge sɛ lu bek ghɛ wɛ ghɛn foon ɛytem se Christ-a? Ghɛne loo fise, ɛ́ yɛ fise ge wɛ̀ɛ̀ gese fise nɛ̀ ɛyvəme.

¹⁶Ghɛn lɛm tetem ə tɛn telaanen ka ghel ghɛ ɛ́ suuyen əbnəə əbbee ɛ ghɛn əbghun bek ndee ə yɛn ɛyjuŋ yɛ ghɛn kiin ka ghel ə Christe loo yɛn è yɛ ki kenghuumen.

¹⁷Ke lu kejuŋ ge ghɛn yɛ yɛne ngɛk bek əbnəə əbjuŋe wɛ ghɛne nɛɛyen, nɛ Feyine dî yɛn ge ghɛy ka ke yɛ lu chia ka ghɛn yɛ yɛne ngɛk nɛ ghɛne nɛɛy nɛ lu kenəə kebee.

¹⁸Christ se wen ə ngeŋ nè kuo bek mbee ə sɛsen kɛn kaŋ ɛymok, ke kwɛn dì. Əb nè báà yi nɛɛy mbee, dî è kuo bek ghele mbee se nɛɛy ge ghene yɛ lu ghel ə Feyin. Ghele nè yuy wen, əb kuo kɛn se kechak əbghun, dî Feyine nɛɛy keyioy ə wene se chii kɛn chiin,

¹⁹è ndu è fekte kenəə ə Feyin se əbyioy wɛ əb nè luun ɛ nchak.

²⁰Əbyioy nɛ̂ vin lu wɛ ghel ghɛ ɛ́ nè báà yionen se Feyin əbliy wɛ Feyine nè bosen chiyten ɛ əmchii mɛ Noa nè baklen kenək ə wen. Ghele naa lii ɛ kenək fo kɛn ɛyfaame, è boy se moome jio yɛ ɛy nè lunen.

²¹Kii nɛ̂ kine lu ka əbchəyte ɛyfii moo mɛ əm boysen ghɛsen ɛ leenen ɛ əbtaawe ɛyloole nə Christ se ɛykuo. Moo nɛ̂ mine báà se suu nɛ lu ɛyliŋ se ghɛsen əbghun, əm lu jii yɛ ghɛsen chian ɛ ten lone Feyin nɛ̀ ɛytem ɛylaanene.

²²Əb nè kokmen se ɛyyio è diom jii ɛybee əbkoy əbtaa nə Feyine è se sake nchiyse-ndaa nə Feyine sejim gese nɛ̀ əbyioy əbjim wɛ əb kiin əbtaawe gese ki kediak.