Read Oku 1Bi 4 Bible Online

1Bi 4 - Oku bible

1Bi 4

¹Kɛn ka Christ nè yɛnen ngɛk se kechak əbghun, ghɛn yɛ ki ɛytem nɛ lu yɛ əb nè kiin ka ghɛne yɛ lu kebaaten se yɛne ngɛk sɛy. Bek ge naa ndɛ wɛ əb yɛnen ngɛk se kechak əbghun lu nɛ əb maaymen mbee,

²è se chii ɛ ketuu ntiɛ fɛn, nɛɛye əbnəə ɛ jii yɛ Feyine kɛŋen, bo nɛɛye wiy wɛ əbghune yusen wen ge əb yɛ nɛɛy.

³Əbliy wɛ ghɛn jefsenmen se nɛɛy əbnəə wɛ ghel ghɛ ɛ́ bɛɛy ghàà beeme nɛɛyen kô kwɛn dî. Ghɛn nè jaŋe kenjaŋ, ki nseemese, lɛme ketuu ɛynəə əmnduk, ɛ́ ndu ɛ kelik è yiɛ, ɛ́ yɛ nɛɛye ka buose, gese mome nkfəm ge ɛ́ kokse əmnyin.

⁴Ke me se lu nɛ ghel ghɛ ɛ́ báà beeme nɛ̂ ghin kane ge sɛ nɛ̀ɛ̀y ghɛ wɛ ghɛne báà gese se chinten ghene ɛychii lólò nɛ̂ ghan-a? Kane dì me tɛylee ghɛn.

⁵Dî nɛ ghene yî taŋle ɛychio ə ghen ɛ ɛyshiɛ nə Feyin wɛ əb baatemen se sake ghel ghɛ ɛ́ bo chiin nɛ ghɛ ɛ́ nè kuonmen.

⁶Ghɛy kenəə kɛ ɛ́ nè fekten kenəə ə Feyin se ghel ghɛ ɛ́ ne kuonmen, ka ghene chèmè nè kuon, se kechak əbghun, nɛ lu jii yɛ Feyine nè saken ghene, dì nɛ ghene ko yɛ chii se keyioy ka Feyin.

⁷Əbliye se báksen gwiye wɛ mbi mɛy. Ghɛn ghal ngeŋ ə sɛn, è kamke è yɛ jem.

⁸Naa kenəə kɛ ke luun ɛ shii ɛ ŋaŋ lu ge, ghɛn yɛ loote koŋnen bek ge wɛ̀ loo koŋe wel é wɛ̀ yɛ lɛyse mbeese wen naa se ɛydio.

⁹Wel se ghɛn yɛ lòò, əb fiisen əblee ɛ wen ə ndaa kejuŋ, vəke wiy se nkan.

¹⁰Feyine lu nɛ əb bose ghɛn fo əbnəə wɛ ghɛne yɛ nɛɛy ɛ jiise jiise, ghɛn yɛ fɛl nɛ̀ əbnəə nɛ̂ vine ɛ jii ɛyjuŋ se giamtene wel nɛ̀ wel.

¹¹Yɛ lu nɛ kiɛ lu se teefe ntum ə Feyin, wɛ̀ yɛ teefe kɛn ntum ə Feyin, kiɛ yɛ lu se yɛ giamten, wɛ yɛ giamten nɛ̀ kediake kɛ Feyine foon se wɛ̀, ka wɛ̀ loo nɛɛy əbnəə əbjim é ɛykokse mɛ yɛ ndu se Feyine chia əbghun nə Jesus Christ wɛ əb kiin ɛykokse nɛ̀ əbtaawe əbliy əbjim nɛ ɛymɛye wiy. Amen.

¹²Sun ə some, ghàà ghɛn yɛ lu nɛ̀ əbchíò əbyúméné kum ngɛk sɛ se nɛɛyen nɛ ghɛn yio ɛylum se ŋaŋ, ka wɛ̀ yɛ gee lu kenəə nɛ ke nè bɛɛy ghàà tese kooy. Ngɛk nɛ̂ shine gwiye dì se mome ghɛn ge ghɛn sɛ lu nɛ ɛ́ loote fo ɛytem se Feyin-a?

¹³Ghɛn sɛ́y lu se yɛ saŋle saŋlen ge ghɛne yɛne ngɛk ka Christ nè yɛne, ka ghɛne náà yɛ saŋle əbliy wɛ əb kasen gwiy nɛ̀ əbtaawe əbchio əbyúméné nə wen.

¹⁴Ke lu kejuŋ se ghɛn ɛ əbliy wɛ ghele tɛylen ghɛn ge yi ka ghɛn luun ghele ngoo nə Christ bek ka Keyioy əbchio əbyúméné kɛ luun kɛ Feyine fɛ́len ɛ ghɛn ɛyghun.

¹⁵Dî nɛ wel se ghɛne loo yɛne ngɛk, ghàà ke yɛ lu ge əb yuy wel, kene əb choŋ kefaa, kene əb nɛɛy kenəə kebee, kene əb vii əbchio se ghele əbnəə.

¹⁶Wɛ̀ loo è yɛ yɛne ngɛk bek ka wɛ̀ luun wele ngoo nə Christ, ghàà wɛ̀ yɛ ghuumen, wɛ̀ sɛ́y yɛ bɛ̀ɛ̀lè Feyin bek ka ɛ́ toŋten wɛ̀ ge wel əbbeemen.

¹⁷Ke lu dî bek ge əbliye kwɛnmen wɛ Feyine tenen nsak ə ghel ɛjim, nɛ əb nɛ̂y kɛɛte nɛ̀ ghel ə wene. Əb lɛ kɛɛte nɛ̀ ghɛsen dì, é ke nɛ̂y yɛ lu lɛɛy se ghel ghɛ ɛ́ báà beeme sakghɛ əbjuŋ wɛ əb lòòn se wen.

¹⁸Ɛ́ nyak ɛ ŋwaale-Feyin ge: “Ghel ə Feyine lɛ sote ɛ ŋaŋ lɛ se geese boy, é ke yî yɛ lu lɛɛy se ghele mbee ghɛ ɛ́ báà beeme Feyin se nkan?”

¹⁹Ke me se lu ge ghel ghɛ ɛ́ yɛ́nen ngɛk nɛ lu ka Feyine kɛŋen, ghene yɛ nɛɛy kɛn əbnəə əbjuŋe, foo ngeŋse ə ghen se Mbom wɛ əb sɛɛ lunse tekak ə wen.