Read Oku 1Bi 5 Bible Online

1Bi 5 - Oku bible

1Bi 5

¹Kɛ ɛ leenene lu nɛ mɛ ka wele mbiye lone lonen ghele ngoo nə mɛ ghɛ ɛ́ luun ɛ ghɛne məm, mɛ ka wel wɛ əb nè yɛnen ka Christ yɛnen ngɛk, gese lu sɛy wel əblee se náà se kiile njuŋ yɛ əb yî gwiyen so, mɛ me se lone ge,

²kiy ghɛn, ghɛn ko yɛ toknen nɛ̀ ghel ə Feyine kɛn ka gay toknen nɛ̀ nase. Ghɛn lu se yɛ fɛl bek ka ghɛne koŋen se yɛ fɛl, nɛ wiy ka ɛ́ kane ghɛn kanen. Ghɛn yɛ fɛl nɛ̀ ɛytem ə yɛn ɛyjime nɛ wiy bek əbkaa.

³Ghɛn yɛ din nɛ lu əbchəyte se ghel ə Feyine. Ghàà ghɛn yɛ kwante ghene kwanten.

⁴Ghɛn loo nɛɛy dì, ɛ́ nɛ̂y loo lu əbliy wɛ ketuu se ghel ghɛ ɛ́ kiynen ghel ə Feyine gwiyenmen, é ghɛn kiile əbmakte əbchio əbyúméné wɛ ɛykeke tene kubsen wiy.

⁵Wak, ghɛn yɛ lu sɛy se yɛ ngvəmlee ghele mbiy. Ghɛn ghel ɛjim sooy ɛyngvəmle se ketuu è yɛ giamtene wel nɛ̀ wel, bek ge Feyine yio wiy se wel wɛ əb ghaŋsen əbghun, dî bose wel wɛ əb liɛ ngeŋ ə wen ɛ ntiɛ.

⁶Ghɛn səkse ngeŋ ə sɛn ɛ ɛyshiɛ nə Feyin wɛ əb kiin kediak ka əbliye nɛ̂y kwɛn, é əb lose ghɛn.

⁷Ghɛn gwiy nɛ̀ ngɛk ə sɛne nɛ lu se wen bek ka əb toknen nɛ̀ ghɛn.

⁸Ghɛn ghal ngeŋ ə sɛn è yɛ yiole əblik bek ge wel əbbaanese nə ghɛn wɛ Satane ngvəme ka bvələk yɛ ɛy nyamken, kɛŋe wel se kfəl.

⁹Ghɛn teem ketaan ɛ ghɛn ɛybeeme, è jia fo jii se wen. Ghɛn yɛ ke ge ghone-nyii ɛlee mbi ɛyjime yɛne kɛn nɛ lu ɛynkii ngɛk yɛ ghɛne yɛ́nen.

¹⁰Ɛ́ yɛ lu ka ghɛn yɛnenmen ngɛk se kentime əbliy, é Feyin wɛ əb chammen ɛysen ə ghel ɛjime, wɛ ko luun wen wɛ əb nè choken ghɛn ge ghɛn yɛ ki əbghaake wɛ əb jia yî mɛy ka ghel ə Christ me kase siyse ghɛn, é ghɛn teem ɛ ghɛn ə ɛvəə, è yɛ loote taa bo shikle wiy.

¹¹Əbtaawe əbjime lu se Feyine əbliy əbjim. Amen.

¹²Giamten Silas mɛ ge mɛ nyak feŋwaale fin se ghɛn. Əb lu wán-nyii wɛ mɛ samsen. Mɛ nyak lɛ se lumse ghɛn ge ghɛn yɛ loote ke ge Feyine chame ɛysen ə yɛn. Ghɛn loote ghal kenəə nɛ̂ kin ketaan.

¹³Kenone ghel ɛbeemene kɛ ke luun ɛ Babilon, kɛ Feyine nè choken ghɛɛ-ghɛɛ ka əb choken ghɛne chakte ghɛn, nɛ wan ə wome Mak ko chakte sɛy ghen.

¹⁴Ghɛn chakte ngeŋ ə sɛn se din ɛykoŋ yɛ ghɛn kiin ka ghel ə Christ. Mɛ jeme ge ghɛn ghɛ ghele Jesus Christ yɛ ki əmnyiaŋ.