Read Oku 2Bi 1 Bible Online

2Bi 1 - Oku bible

2Bi 1

¹Lu mɛ Simon Bita, mɛ fɛle se Jesus Christ, gese lu wele ntum nə wen. Mɛ nyake ŋwaale yin se ghɛn ghɛ ɛ́ foon ɛytem se Feyine kɛn ɛ jii yɛ ghɛs ghɛ ghɛ́ ntume foon ɛ ten, bek ka Feyin ə Fɛsen fɛ luun mboyse ə yɛsen Jesus Christ sɛɛ nɛɛy kɛn əbnəə wɛ əb luun ɛ titiy.

²Feyine ko loote cham ɛysen ə yɛn, è gese nɛɛy é ghɛn yɛ loote ki əmnyiaŋ bek ka ghɛn keen kenəə kɛ kum Feyin ghene Báàba ə wɛsen Jesus Christ.

³Bek kediak ə wen ka Feyin, əb lu nɛ əb fomen əbfua əbjim wɛ ghɛsen shiin se yɛ chii ka ghel ə Feyin. Əbfua nɛ̂ vin əbjim lu wɛsene bek ka ghɛsen looten keen Christ. Əb nè chok ghɛsen ka ghel ə wen ɛ jii yɛ əb nè nɛɛyen ge ghɛsen yɛ yio əbjuŋ əbghaake nə wen gese ki ndee ɛyjuŋ.

⁴Lu ɛ jii nɛ̂ ghan yɛ əb foonmen əbfua əbtaa se ghɛsen wɛ lòó ɛ́ jia yun nɛ̀ əbkaa, nɛ lu əbfua wɛ əb nè kaken ghɛsen so. Ghɛsen me se lu nɛ ɛ́ boymen se əbnəə wɛ əb besen ghel ɛ mbi fɛn wɛ əbghune yusen ghel ge ɛ́ yɛ momle, è me se ki ndee nɛ lu yɛ Feyin.

⁵Ke me se lu ge ka ghɛn foonmen ɛytem se Feyine, ghɛn yɛ mom se yɛ lu ghel ɛjuŋe, se gise se kii nɛ̂ kine gese mome se yɛ loote ke Feyin;

⁶gese mome se yɛ ghale ngeŋ ə sɛn, gese mome se yɛ kul ɛytem, gese mome se yɛ chii ka ghel ə Feyin;

⁷gese mome se yɛ giɛknen, gese mome se yɛ koŋe wel əbjim.

⁸Ghɛn lòò è yɛ nɛɛye əbnəə vin nduu kɛn ɛ mbiy, é əb nɛɛy é ghɛn jia yɛ lu ka ghele lólò, è jia lɛy se lólò ɛykeele yɛ ghɛn keen Báàba ə wɛsen Jesus Christ.

⁹Dî nɛ ghɛn yɛ ke ge wel lòò è jia yɛ nɛɛye əbnəə vin, fene əb lu ka wel wɛ əb báà se loote yɛne əblik, kene kenfef gese lu nɛ əb lɛysenmen ge Feyine nè suumen mbee sɛ əb nè nɛɛyen.

¹⁰Ke me se lu ghone-nyii ge, ghɛn yɛ mom ketaan nduu kɛn ɛ mbiy ɛ jii nɛ̂ ghan se din ge Feyine nè nɛɛy fo se choke ghɛn ka ghel ə ghi. Ghɛn lòò è yɛ nɛɛy dì, é ghɛn jia bo yî jas jii.

¹¹Lu bek kii nɛ̂ kine kɛ Feyine náà mɛyse fo jii se ghɛn ge ghɛn lii se məme ɛysak yɛ ɛy jia yî mɛy yɛ luun yɛ Báàba ə wɛsen wɛ luun mboyse yɛsen Jesus Christ.

¹²Me se lu nɛ mɛ nɛ̂y yɛ tamte əbnəə vin se ghɛn əbliy əbjim chèmè lu ka ghɛn se keen əbghene, nɛ ghɛne teem ketaan ɛ əbluuy wɛ ghɛn kiin.

¹³Mɛ yɛne ge ka mɛ bo chiin, ke lu ɛ titiy ge mɛ yɛ tamte əbnəə nɛ̂ vin se ghɛn, fɛ ghɛn lɛysen,

¹⁴ka mɛ keen ge se moote lɛ, é mɛ vəse ketuu ntiɛ kin ka Báàba ə wɛsen Jesus Christ nè suuyen san.

¹⁵Mɛ me se mome ketaan ge ɛ nɛ̂y loo lu nɛ mɛ vəsemen ketuu ntiɛ kin, é ghɛn yese è yɛ kuume əbnəə nɛ̂ vin əbliy əbjim.

¹⁶Əbnəə wɛ ghɛs nè dinten se ghɛn kum ɛygwiy yɛ Báàba ə wɛsen Jesus Christe yî gwiy ɛ wen əbghaake lu nɛ ghɛs nè báà se suuye nɛ lu əbnəə wɛ ghele bomten nɛ̀ ɛytofe, ghɛs nè suuy əbnəə wɛ ghɛs nè yɛnen nɛ̀ ɛshiɛ ə ghɛse.

¹⁷Bay Feyin wɛ əbfon əbghaken nè lô fo ɛykokse se wen ɛ əbliy wɛ əb nè suuyen ge: Vin lu wán ə wom wɛ mɛ koŋen, mɛ saŋle bek wen naa se ŋaŋ.

¹⁸Ghɛs se ghɛse ngeŋse nè lô yio ka giɛ ə Feyine səəken se wen ɛ ɛyyio əbliy wɛ ghɛse ghene nè luun ɛ ketuu kfən nə Feyine.

¹⁹Kii nɛ̂ kine nɛɛy ghɛs loote beeme əbnəə wɛ ghɛ ntum nə Feyine nè fekten. Ghɛn yɛn ge ghɛn lu nɛ ɛ́ loote fo shii ə wɛn se əbnəə nɛ̂ ghan bek ge əb lu ka kekaaken kɛ ke banen ɛ kelike nfiine se chin se ka əbtəke yio, é fenjese fɛ bvəse bvəse ban ɛ ghɛne tetem.

²⁰Kenəə ketaa kɛ mɛ kɛŋen ge ghɛn keele lu ge kenəə wiy ɛ ŋwaale-Feyin kɛ ghɛ ntum nə Feyine nè suuyen nɛ lu ɛykwaate ə wel.

²¹Ke lu dî bek ge ghɛ́ ntume nè báà se fekte əbnəə wɛ wɛ́ ghene, ghene nè fekte əbtaawe nə Keyioy Kelanene, fekte əbnəə wɛ əb lòòn se Feyine.