Read Oku 2Bi 2 Bible Online

2Bi 2 - Oku bible

2Bi 2

¹Nè lô se lu se mbiy nfektese əbbuam fəy ɛ ghele məm è se lɛɛse ge ghene lu ghele ntum nə Feyine. Lu ghɛɛ-ghɛɛ ka ndintese əbbuame náà fəy ɛ ghɛne məm è yɛ dinte əbnəə əbbuam. Ghene náà nyiake gwiy nɛ̀ ɛyyiɛke əbbuame yɛ lòó ɛy bese ghel besen, è me maa naa Báàba ə ghen wɛ əb nè boysen ghene. Ghene náà nɛɛy dî é Feyine mak ngɛk se ghene ketuu kɛn se əbliy.

²Ghene náà lóó nɛɛy dì é ghel se ɛydio beknen ghene è yɛ momle sɛy əbnəə jione, é kii nɛ̂ kine nɛɛy é ghel ɛlee yɛ suuy əbnəə əbbee kum kenəə ə Feyin.

³Ndintese əbbuam nɛ̂ shine ki shii se əbkaa, nɛ ghene nɛ̂y yɛ lɛɛse ghɛn nɛ̀ teyiɛke əbbuam nə ghene ka ghene kooy əbfua. Feyine nè gham ghene naa se nguk ge yi lu se naa se bese ghene. Feyine báà se buune kum ɛykak yɛ əb nè kaken ge yi naa mak ngɛk se ghene.

⁴Feyine di nè báà babte nchiyse-ndaa nə wen sɛ se nè nɛɛyen mbee. Əb nè tinse ghene se kemboo əbvəs, bene fɛ ɛ́ kulen ghene nɛ̀ əmnchakme, è lɛm ɛybee nɛ ɛy fine ge, ghene se chiyte kechii nsak.

⁵Ghɛsen ke ge Feyine nè lô mak ngɛk se ghel ghɛ ɛ́ nè báà beeme wen naa se nguk. Əb nè nɛɛy jio lun è liɛ ghene naa ɛjim ɛ mbi, əb boyse kɛn Noa ghene ghel ɛlee saamba. Noa nè lu wel wɛ əb nè fekten ka lòó ghele yɛ chii ɛychii ɛylanene.

⁶Feyine ko nè lô gham ntɛke sɛ Sodom ghene Gomolla è tinse əbvəs əb nyok ghene. Kii nɛ̂ kine nè lu əbchəyte se dine kenəə kɛ ke náà gan se ghel ghɛ ɛ́ báà se ke Feyin.

⁷Əb loo nyok dì, è boyse Lot wɛ nè luun wel əbjuŋ. Lot nè báà se saŋle naa se kan kum ɛychii lólò yɛ ghel ɛbee nè chiin.

⁸Nè lu dî nɛ wel əbjuŋ nɛ̂ vin chii ɛ ghene məm, yɛne gese yio əbnəə əbbee wɛ ghene momlen kechii nɛ̀ kechii, nɛ ɛytem ə wene saŋle wiy bek əbnəə əbbee nɛ̂ vi.

⁹Əbnəə vine dine ge Feyine ke se boyse ghel ə wen ɛ əbliye ngɛkse, gese ke se nyable nɛ̀ ghel ɛbee se chin se kechii nsak,

¹⁰ɛ ŋaŋ ŋaŋ, ghel ghɛ ɛ́ tunsen ɛysak ə Feyin è se nɛɛye nɛ lu əbnəə wɛ əbghune yusen ge ghene yɛ nɛɛy. Ndintese əbbuam shine fane wiy kefaa, taa ketuu, gese ngvəmle wiy əbyioy wɛ əb luun ɛ ɛyyio ki əbtaawe; sɛ́y tɛyle ghene tɛylen

¹¹Chèmè lu ka nchiyse-ndaa nə Feyine kiin əbtaawe nɛ̀ kediake chia ghene, lu nɛ se loo ghàà se yɛ tɛyle ghene ɛ Bay ɛyshiɛ.

¹²Dî nɛ ndintese əbbuam shine lóó se yɛ nɛɛy əbnəə ka nyam sɛ se kiin wiy ɛytof, nɛ ɛ́ nè bom ge ɛ́ yɛ koo yuyte. Ghene loo ɛ́ yɛ tɛyle əbfua, ke wiy ka əb luun, nɛ Feyine yî yuyté ghene kɛn ka ɛ́ yúyte nyamse əbkwak.

¹³Ɛ́ nɛ̂y lak ghene nɛ̀ ngɛkse bek ngɛk yɛ ghene nɛ̀ɛ̀yen ghele se yɛne. Ghene lóó ɛ́ yɛ saŋle se nɛɛy naa ghɛ ɛ dɛɛne kɛ əbghune ghene jofen ge ɛ́ nɛɛy. Lu kenəə kenghuumen gese nɛ̀ kenchoksene se ghɛn ka ghɛne ghene lóó ɛ́ yɛ yiɛ se kefaa kemok nɛ ghene saŋle kum jiise əbbuam nə ghen.

¹⁴Ghene yɛn wel ɛ́ yɛ kiy nɛ̀ ɛyshiɛ kenjaŋe. Ɛytof ə ghene lóó ɛy yɛ lu kɛn ɛ əbnəə əbbee əbliy əbjim. Ghene yɛne wel wɛ ɛybeeme ə wene boolen ɛ́ lobte əb nɛɛy mbee. Shii ə ghen lu kɛn se kiile kefaa. Kii nɛ̂ kine lu liŋma.

¹⁵Ghene vəsemen jii yɛ titiy, è jia se ke ghaa ɛ́ nduun, è se jumte jiise Balaam wɛ wán ə Beol. Balaam nè koŋe əbkaa wɛ ɛ́ laken wen so se əbnəə əbbee wɛ əb nɛɛyen.

¹⁶Dî kembɛɛybiye naa wamnen wen ɛ əblam nə wel, nfekte yi maay ɛynɛɛy əbnəə əbbee wɛ əb nè nɛɛyen ka əb jake jaken.

¹⁷Ndintese əbbuam nɛ̂ shine lu ka ntoŋse jio sɛ se nè yumenmen, gese lu ka mbàk sɛ əbfiɛf əbtaa taksen. Feyine lɛmmen ge yi náà mak ghene ɛ kelik ɛ nfiine ɛytaa.

¹⁸Ghene lóó ɛ́ yɛ yio əbghun suuye əbnəə lólò, liɛ əbnəə əbbee wɛ əbghune yusen ge ghene yɛ nɛɛy lobte ghel so ghɛ ɛ́ bo fəyen fəyen se ngoo nə ghel ɛbee.

¹⁹Ghene lóó ɛ́ yɛ foo ɛykak se ghele ge ghene yî boyse ghene, naa nɛ ghene se ghene ngeŋse bo bɛɛy əbkos se əbnəə əbbee wɛ ghene nɛɛyen nɛ əb bese ghene, bek ge naa ghɛ kɛ wel foon ketuu se ten lu nɛ əb shi kekos se keghene.

²⁰Ghele loo lu nɛ ɛ́ nyiŋmen è fəy se ɛynɛɛy əbnəə əbbee wɛ̂ mbi fɛne bek ka ghene keelen Báàba wɛ mboyse ə yɛsen Jesus Christ, dî è kase tàŋle ngeŋse ghen nɛ̀ ɛychii ɛyməə, kɛ ghene me foy è chia ka ke nè luun nɛ ghene bɛɛy ghàà keele Jesus Christ.

²¹Nè lòó ke yɛ lu naa kejuŋ se ghene se jia se keele sakghɛ əbjuŋ chia ka ghene keele, è maay nchil ɛylanen yɛ Feyine nè foon se ghene.

²²Ɛynkii ghel ghane nɛɛy kenəə kɛ ɛ́ nè maan ngan ge: Buo kase yiɛ kefaa kɛ ɛy kè suken, nɛ ɛ́ suu nkfəənyam, ɛy kase bite əbghun ɛ əbchiale.