Read Oku 2Bi 3 Bible Online

2Bi 3 - Oku bible

2Bi 3

¹Sun ə some, mɛ nyake ŋwaale yin se ghɛn ɛ leenen ge sebaa. Lu ɛ ŋwaalese fɛn nɛ mɛ loo nyak, mɛ yɛ mom se lose tetem ə tɛn te lanen tii, ka mɛ tamte əbnəə nɛ̂ vin se ghɛn.

²Mɛ kɛŋe ge ghɛn kuume əbnəə wɛ ghele ntum nə Feyine ɛlanene nè yimen suuy è gese kuume nchil sɛ Báàba ə wɛsen wɛ mboyse nè nɛɛyen ghɛ ntum nə wene fó se ghɛn.

³Kɛ mbiye lu nɛ ghɛn keele ge ɛ́ nɛ̂y loo lu əbchii kenləysen, é ghel ɛŋakene tum è fəy è yɛ buu ghɛn buun, è yɛ nɛɛy nɛ lu əbnəə wɛ ɛyghune ghene yusen ge ɛ́ yɛ nɛɛy.

⁴Ghene nɛ̂y yɛ buu dì bife ge: Christ nè kak ge yi nɛ̂y kase gwiy; əb waay ɛ leenen? Se ka əb nè kaken, ɛbaa ə ghɛsene kuokemen nɛ əbnəə əbjime bo tiy kɛn ɛyghɛl se kɛ̀ɛ̀tè ka ɛ́ nè bomen mbi.

⁵Ghene lóó ɛ́ yɛ bukle ge ɛ́ ke wiy ge Feyine nè bom ɛyyio kɛn nɛ̀ giɛ ə wen naa se əbməən, gese se lu kɛn nɛ̀ giɛ ə wen yɛ əb nè suuyen ntiɛ fəy è gwiy ɛ məme moo.

⁶Se lu kɛn nɛ̀ moome nɛ̂ min mɛ jio nè lunen, Feyine bese mbi ɛyməə so.

⁷Ko se lu ɛyyio ghene ntiɛ nɛ̂ yin yɛ ɛy bɛɛyen, yɛ Feyine tɛɛken nɛ̀ giɛ ə wen se náà se bese nɛ̀ əbvəse. Feyine bɛɛse se náà se bese ɛ kechii kɛ əb náà yɛ sake ghel ghɛ ɛ́ nè báà se yionen se wen.

⁸Sun ə some, ghɛn keele se əbluuy ge, lu se Báàba nɛ ndun ndun wiy se kechii kemok ghene nguk nkam. Lu se wen nɛ əbliye tene lu kɛn ghɛɛ-ghɛɛ.

⁹Báàba báà se gufe əbghun se lunse nkakma yɛ əb nè kaken, ka ghel ɛlee kwaaten. Əb di bosen lu ge wɛ̀ɛ̀, bek ka əb báà se kɛŋe ge wel náà lɛy, əb kɛŋe ge wel əbjim kubsen ɛytem.

¹⁰Kechii gwiye kɛ Báàba yî sasen è gwiy ka əbchoŋe sɛɛ lóó əb gwiy. Ɛ náà loo lu ɛ kechii fo, ɛyyio bvəs è me lɛy, é əbfua əbjim wɛ əb luun ɛ ɛyyio fuo è mɛy, é ketuu ntiɛ nɛ əbfua əbjim ɛ ten fuo è bvək.

¹¹Ka ke luun ge Feyine yî bese mbi ɛ jii fɛn, ghɛn lu se yɛ lu ɛynkii ghel ɛkɛ? Ghɛn lu se yɛ chii ɛychii ɛylanene, nɛ ghɛne fó ngeŋ ə sɛn se Feyine.

¹²Ghɛne loo chiyte kechii kɛ Feyine yî tenen nsak, ghɛn yɛ noole ge ke yaŋse gwiy. Lu kechii kɛ ɛyyio yî fuo è kɛyte, é əbfua wɛ əb luun ɛ ɛyyio fuo è buŋ.

¹³Dî nɛ ghɛsen chiyte nɛ lu nkakma ə Feyin yɛ luun ɛyyio ɛyfɛɛ nɛ̀ ntiɛ ɛyfɛɛ, bene fɛ əbnəə əbjime nɛ̂y yɛ ndu kɛn ɛ titiy.

¹⁴Ke me se lu, sun ə some ge, ka ghɛne chiyten kechii kin, ghɛn yɛ mom ketaan se yɛ lu ɛlanen, ki wiy kejas ɛ ɛyshiɛ nə Feyine, gese chii kejuŋ ghɛne ghe Feyine.

¹⁵Ghɛn liɛ ɛymoo yɛ Báàba ə wɛsen moon se gwiy é ɛy yɛ lu nsan yɛ əb foon se ghɛn ge ghɛn chia ɛ ten è kiile ɛyboy, kɛn ka wan-no ə wɛsen Bool nè nyaken se ghɛn nɛ̀ əbfee wɛ Feyine nè foon se wen.

¹⁶Lu əbnəə nɛ̂ vin wɛ əb nè nyaken ɛ wene ŋwaalese naa sejim. Əbnəə əbtáán əblee lu ɛ wene ŋwaalese wɛ ghel ghɛ ɛ́ keen wiy əbnəə nɛ̀ ghɛ ɛ́ báà teem ketaan fekten se ghele nɛ ɛybame me bɛɛy ngɛkse se ghene ketuu. Lu sɛy ka ghene nɛɛyen nɛ̀ əbleŋe ŋwaale-Feyin əblee, me bɛɛy ngɛkse se ghene ketuu.

¹⁷Sun ə some, ka ghɛn se keen əbnəə vin lɛ, ghɛn yɛ toknen fɛ əbjas ə ghel ghɛ ɛ́ báà se ke Feyin nɛɛy é ghɛn jas jii è maay keleŋ kɛ ghɛn tiyen ɛ ten ghɛne ghe Feyine.

¹⁸Ghɛn yɛ chii kɛn ɛ jii yɛ ghɛne yɛ yio əbjuŋ ɛysen yɛ Báàba wɛ mboyse yɛsen chammen se ghɛsen. Ɛykokse yɛ lu se wen ɛ leenen nɛ̀ se əbliy əbjim. Amen.