Read Oku 1Jn 1 Bible Online

1Jn 1 - Oku bible

1Jn 1

¹Ghɛse nyake se ghɛn kum Giɛ ɛychii. Giɛ nɛ̂ yin nè lu se kenkɛɛte. Ghɛs nè yiomen wen, è yɛn se ghɛse ngeŋ, è kiy, è kum nɛ̀ ɛghoo ghɛse.

²Giɛ Ɛychii nɛ̂ yin nè lômen din ngeŋ ə wen, ghɛs yɛn wen, è mè se suŋnen kum wen. Ghɛse fekte se ghɛn kum ɛychii yɛ ɛy jia yî mɛy, yɛ ɛy nè luun ghene Bay, è mè din ngeŋ ə wen se ghɛs.

³Ghɛse fekte kenəə se ghɛn nɛ lu kɛ ghɛs yɛnenmen è yio, ka ghɛne chinten é ghɛsen yɛ lu se kefaa kemok, nɛ kenchinten kɛ́sen nɛ̂ kine lu ghɛsen nɛ̀ ghe Bay, nɛ̀ wan ə wen Jesus Christ.

⁴Ghɛse nyake kine lɛ̂ ka ghɛse me yɛ loote saŋle.

⁵Ntum yɛ ghɛs nè yion se Jesus Christ è se teefe se ghɛn lu kine ge: Feyine lu ɛyban, ki wiy kenəə se nɛɛy nɛ̀ nfiine ghɛy.

⁶Ghɛsen lòò è yɛ suuy ge ghɛsen nɛ̀ Feyine lu se kefaa kemok, dî jɛle ɛ nfiine, fene ghɛsen yia əbbuam, nɛ əbluuye wiy ɛ ghɛsen ɛychii.

⁷Dî nɛ ghɛsen lòò è yɛ chii ɛyban kɛn ka əb luun ɛ ɛyban, fene ghɛsen jɛle se kefaa kemok, nɛ əmnduŋ mə Jesus wɛ wán ə wen me suu ghɛsen se mbee naa sejim.

⁸Ghɛsen lòò è yɛ suuy ge ghɛsen báà se ki jas fene ghɛsen lɛɛse əbtuu ə wɛsen, nɛ̀ əbluuye wiy ɛ ghɛsene məm.

⁹Dî nɛ ghɛsen taŋle əbchio ə wɛsene kum mbee ə sɛsen é Feyine lunse ɛykak ə wen, è nɛɛy kenəə kɛ əb yɛnen ge ke lu ɛ titiy se lɛyse mbee sɛ́ tene; se gese se suu ghɛsen se əbnəə əbbee əbjim.

¹⁰Ghɛsen lòò è yɛ suuy ge ghɛsen báà nɛɛy mbee, fene ghɛsen suuye ge Feyine lu wel əbbuam, nɛ̀ ke dine ge giɛ ə wen ki wiy kelik ɛ ghɛsene məm.