Read Oku 1Jn 2 Bible Online

1Jn 2 - Oku bible

1Jn 2

¹Mɛ nyake əbnəə nɛ̂ vin se ghɛne ghon ə ghome ka ghɛne jia bo yɛ nɛɛye mbee, dî nɛ ke gan ge wel nɛɛy mbee, əb yɛ ke ge ghɛsen ki wel wɛ əb liɛn kelik ə kɛ́sen è se beŋte Bay, nɛ lu Jesus Christ, wele titiy.

²Lu wen taŋle yɛ ɛ́ manen mbee ə sɛsen so, nɛ wiy kɛn sɛsene, ɛ́ mane sɛ́ wel əbjim ɛ mbi fɛn.

³Lòó ghɛsen yɛ ke se əbluuy ge ɛ́ ke Feyin ɛ əbliy wɛ ghɛsen lɛmen nchilse wen.

⁴Wel lòò è yɛ suuy ge yi ke Feyin, dî lɛme wiy nchilse wen, fene əb lu wel əbbuam, nɛ̀ əbluuye wiy ɛ wene ɛytem.

⁵Dî nɛ naa ndɛ wɛ əb yionen giɛ ə Feyin lu wel wɛ ɛykoŋ ə Feyine loote lu ɛ wene ɛytem. Lu ɛ jii nɛ̂ ghan yɛ lòó ghɛsen keele ge ghɛsen lu kefaa kemok ghɛsen nɛ̀ Feyine.

⁶Naa ndɛ wɛ əb suuyen ge yi lu kefaa kemok ghene Feyine lu se yɛ chii ka Jesus nè chiin.

⁷Sun ə some, mɛ báà se nyake ɛysak ɛyfɛɛ se ghɛn, mɛ dì nyake nɛ lu ɛyməə yɛ ghɛn nè se kiin se əbməən. Ɛysak ɛyməə nɛ̂ yine lu ntum yɛ ghɛn nè yionmen.

⁸Se lu nɛ ɛysak yin yɛ mɛ nyaken se ghɛn ko lu ɛyfɛɛ, nɛ əbluuy wɛ əb luun ɛ ten dine ɛ Christe nchiine gese yɛnsen ɛ ghɛne nchiine bek ge nfiine se mɛye, nɛ nkante ɛyban se bane.

⁹Naa ndɛ wɛ əb been ge yi chii ɛyban dî bane wan-no wen, bo bɛɛy kɛn ɛ nfiine.

¹⁰Naa ndɛ wɛ əb koŋen wán-no wen chii ɛ məme ɛyban, nɛ kenəə wiy ɛ wene məm kɛ lòó wel diamten ɛ ten.

¹¹Dî nɛ naa ndɛ wɛ əb banen wán-no wen bɛɛy ɛ nfiine, jɛle ɛ nfiine, ke wiy ge yi sɛ nduu ghááy-a, bek nfiine nɛ̂ yin.

¹²Mɛ nyake se ghɛne ghon ə ghome bek ge Feyine lɛysemen mbee ə sɛn bek Christ.

¹³Mɛ nyake se ghɛne ngɛyse ghele bek ge ghɛn keelemen vi wɛ əb nè luun se kenkɛɛte, nyake se ghɛne wak bek ge ghɛn taamen è chia Satan.

¹⁴Mɛ nyake se ghɛne ghon ə ghome bek ka ghɛn keen Bay, nyake se ghɛn ghɛ luun ngɛyse ghel bek ge ghɛn ke vi wɛ əb nè luun se kenkɛɛte. Mɛ nyake se ghɛne wak bek ka ghɛn kiin ɛytem, nɛ giɛ ə Feyin chii ɛ ghɛne məm, nɛ ghɛne gese se taa chia Satan.

¹⁵Ghàà ghɛn yɛ koŋe mbi yin, kene əbfua wɛ əb luun ɛ ten. Wele koŋe mbi yin fene əb báà se koŋe Bay.

¹⁶Ke lu dî bek ge əbnəə əbjim ɛ mbi fɛn wɛ əbghune yusen ghel se yɛ ki, nɛ̀ wɛ wel yɛnen əb yɛ semte se yɛ ki, nɛ̀ əbnəə wɛ ghele ghaŋsen əbghun bek əbghene, báà lòò se Bay, əb lòò nɛ lu ɛ mbi fɛn.

¹⁷Mbi yin nɛ̀ əbfua əbjim ɛ ten wɛ ghele kɛŋen chia chian, dî nɛ ghel ghɛ ɛ́ nɛɛyen kenəə kɛ Feyine kɛŋen yî yɛ chii kɛn chiin.

¹⁸Ghon ə ghome, əbliye baksenmen wɛ mbi mɛy. Ghɛn nè yiomen ge wel əbbaanese nə Christ náà gwiy. Se lu ɛ leenen nɛ ghel se ɛydio ghɛ ɛ́ banen Christ shi. Lu bek kii nɛ̂ kine kɛ ghɛsen keen ge əbliy wɛ mbi mɛy ɛ ten baksenmen.

¹⁹Ghele əbbaanese nɛ̂ ghine nè báà se loote lu ghele ngoo nə ghɛsen, ghɛy kenəə kɛ ke nè nɛɛyen ghene fəy se ghɛsene ngoo. Ghene nè boy se yɛ lu ghele ngoo nə ghɛsen fene ghene nè bɛɛy ghɛsen nɛ̀ ghene. Ghene nè fəy se ghɛsene ngoo se din kelaanen ge ghene nè báà se loote lu ghele ngoo nə ghɛsen.

²⁰Christ nè fomen Keyioy Kelanen se ghɛn, se lu nɛ ghɛn ghel ɛjim ke əbluuy.

²¹Mɛ báà se nyake se ghɛn ge yi ka ghɛne báà se ke əbluuy; mɛ nyake bek ka mɛ keen ge ghɛn ke əbluuy gese ke ge əbluuy ghene əbbuame sɛɛ jia konen.

²²Lu ghe ndɛ ghel əbbuam? Lu ghii dii ghɛ ɛ́ suuyen ge Jesus wiy Vi wɛ Feyine nè Yiosen. Ghel nɛ̂ ghine lu ghele əbbaanese nə Christ, ghene tunse Bay gese nɛ̀ Wan.

²³Wele tunse wan fene əb tunse Bay, nɛ wel wɛ əb beemen wan lu nɛ əb bééme Bay.

²⁴Ghɛn yɛn ge kii dii kɛ ghɛn nè yionmen se kenkɛɛte lu nɛ ke gok ɛ ghɛne məm. Ke lòò è yɛ lu ɛ ghɛne məm é ghɛne ghe Christ nɛ̀ Bay yɛ lu se kefaa kemok.

²⁵Kefaa kɛ Christ nè kaken se fo se ghɛsen lu ɛychii yɛ ɛy jia yî mɛy.

²⁶Mɛ nyake kine se ghɛn kum ghel ghɛ ɛ́ kɛŋen se yɛ lɛɛse ghɛn.

²⁷Keyioy Kelanene kɛ Christ foonmen se ghɛn bɛɛy se ghɛn, nɛ ghɛn shii wiy ge wel dinte kenəə se ghɛn. Ghɛn yɛ yio kenəə kɛ keyioy ə Christe dinten se ghɛn é ghɛne ghe Christ yɛ lu se kefaa kemok.

²⁸Ghon ə ghome, kɛ ɛ leenene lu ge ghɛne ghe Christ yɛ lu kɛn se kefaa kemok ka əb nɛy loo gwiy, é ghɛsen yɛ ki ɛytem, è jia yɛ lu se lel bek kenghuumen ɛ kechii fo.

²⁹Ghɛn ke ge Christ lu wele titiy nɛ ghɛn lu se yɛ ke ge naa ndɛ wɛ əb nɛɛyen əbnəə wɛ titiye lu wán ə Feyin.