Read Oku 1Jn 3 Bible Online

1Jn 3 - Oku bible

1Jn 3

¹Bay Feyine lu nɛ əb koŋmen ghɛsen ɛ jii ɛy kanen, è me nɛɛy ɛ́ se toŋte ghɛsen ge ghon ə Feyin! Ghɛsen lu ghon ə Feyin se əbluuy nɛ ghɛy kenəə kɛ ke nɛɛyen ghele ghɛ mbi fɛne jia se ke ghɛsen. Ghene báà se ke ghɛsen bek ka ghene nè báà se ke Feyin.

²Sun ə some, Ghɛsen lu ghon ə Feyin ɛ leenen, ne ghɛsen bɛɛy ghaa tese keele ge ghɛsene sɛ nɛ̂y yɛ lu lɛɛy-a? Dî nɛ ghɛsen ke ge náà loo lu ɛ kechii kɛ Christe gwiyen ɛ ten, é ghɛsen yɛ lu ka wen, bek ka ghɛsene náà loote yɛn ka əb luun.

³Ghel ɛjim ghɛ ɛ́ foon ɛytem è se chiyte ɛygwiye Christ luŋe se yɛ chii ɛychii ɛylanene, kɛn ka Christ luun əblanen.

⁴Wel wɛ əb nɛɛyen mbee lu nɛ əb kolmen ɛysak ə Feyin bek ge se nɛɛye mbee lu se kol ɛysak.

⁵Kene ghɛn ke ge Christ nè gwiy se suu mbeese wele-mesoŋ sejim. Dî nɛ Christ se wene ngeŋ báà se ki mbee.

⁶Ke me se lu ge lòó wel wɛ shiin wɛ Christe jia bo yɛ nɛɛy ndu wiy nɛ̀ mbee. Wel wɛ əb nɛɛyen nduun nɛ̀ mbee bɛɛy ghàà yɛn Christ, è jia se ke wen.

⁷Ghon ə ghome, ghɛn yɛ ke fɛ wel lɛɛse ghɛn. Wel wɛ əb nɛɛyen kenəə kɛ titiye lu wele titiy kɛn ka Christ luun wele titiy.

⁸Wel wɛ əb nɛɛyen mbee lu wele Satan bek ge Satan nè yimen nɛɛy mbee se kenkɛɛte. Nɛ kenəə kɛ wan Feyin nè gwiyen nè lu se bvəŋse ɛyfɛle Satan.

⁹Wel wɛ luun wán ə Feyin lòó əb jia yɛ nɛɛy ndu nɛ̀ mbee, ɛ jii yɛ əb fuosen Feyin, se lu nɛ lòó əb jia bo yɛ nɛɛye ndu nɛ mbee bek ka əb luun wán ə Feyine.

¹⁰Lu ɛ jii nɛ̂ ghan yɛ lòó ɛ́ keele ge lɛɛ wán ə Feyin nɛ dii wɛ̂ Satan. Naa ndɛ wɛ əb báà se nɛɛy kenəə kɛ titiye báà se lu wán ə Feyin, nɛ naa ndɛ wɛ əb koŋen wiy wán-no ə wen ko wiy sɛ̂y wan ə Feyin.

¹¹Sakghɛ wɛ ghɛn nè yion naa se mbiy lu vin ge: Ghɛsen yɛ koŋnen.

¹²Ghàà ghɛn yɛ lu ka Kain nè luun, wele Satan wɛ̂ əb nè yuyen wán-no wen. Əb nè yuy wán-no ə wen se ghɛ? Əb nè yuy wen ge yi ka yi nɛɛyen əbnəə ɛ jii ɛybee nɛ wan-no vi nɛɛy ɛ titiy.

¹³Ghone-nyii, mbi loo bane ghɛn, ghɛn ghàà yɛ lu nɛ̀ ɛykane.

¹⁴Ghɛsen ke ge ghɛsen fəymen se ɛykuo, è lii se ɛychii. Ghɛsen ke dì bek ka ghɛsen koŋen ghel ɛlee. Wel wɛ əb koŋen wiy ghele ɛlee bo bɛɛy ɛ məme ɛykuo.

¹⁵Wel wɛ əb banen wel əblee lu wel wɛ əb yuyen wel, nɛ ghɛn ke ge wel wɛ əb yuyen wel báà se ki ɛychii yɛ ɛy jia yî mɛy.

¹⁶Lòó ghɛsen keele kefaa kɛ luun ɛykoŋ ɛ jii ghan ge: Jesus Christ nè fo ngeŋ ə wen è kuo bek ghɛsen nɛ ghɛsen lu sɛy se foo ngeŋ ə sɛsen se kuo bek ghel ɛlee.

¹⁷Wel lɛ lòò è yɛ ki ɛykɛŋ, è yɛn nɛ wan-no ə wen lu ɛ shii kefaa, əb jia cham ɛysen se wen è giamten, é əb ghan lɛɛy se suuy ge yi koŋe Feyin.

¹⁸Ghon ə ghome, ghàà ghɛsen yɛ bee been, suuy suuyen ge ɛ́ koŋe ghone-nyii. Ghɛsen yɛ koŋe ghene se əbluuy dine nɛ kenɛɛy kɛ́sene.

¹⁹Di lɛɛ jii yɛ lòó ghɛsen keele ge ghɛsen tiy ɛ jii nɛ Feyine, nɛ lu yɛ̂ əbluuy, nɛ̀ ka lòó teteme tɛsene yɛ́ ki nzəəte ɛyshiɛ nə Feyine.

²⁰Ke lu dî bek ka loo lu əbliy wɛ teteme tɛsene saken ghɛsen, ghɛsen yɛ ke ge Feyine ke əbnəə chia teteme tɛsen; gese ke əbnəə əbjim.

²¹Ke me se lu ɛ sun ə some ge: Tetem ə tɛsen loo lu è jia yɛ sake ghɛsen, é ghɛsen yɛ tiy ɛ Feyin ɛyshiɛ maanen wiy ge ghɛsen lu ɛ titiy.

²²È yɛ lu se kiile naa ghɛ se wen kɛ ghɛsen kɛŋen bek ka ghɛsen lɛmen tesak ə wen gese nɛɛy kenəə kɛ əb kɛŋen.

²³Ɛysak ə wen yɛ əb foon lu ge ghɛsen fó ɛytem se wan ə wene Jesus Christ, è gese yɛ koŋe ngeŋ ə sɛsen ka əb nè suuyenmen.

²⁴Naa ndɛ wɛ əb lɛmen tesak ə Feyin lu ghene Feyin nɛ Feyine lu ghene wen. Lòó ghɛsen keele ge əb chii ɛ ghɛsene məm ɛ jii ghan ge: Keyioy kɛ əb foon se ghɛsen nɛɛy nɛ ghɛsen keelee.