Read Oku 1Jn 4 Bible Online

1Jn 4 - Oku bible

1Jn 4

¹Sun some, ghàà ghɛn beeme se naa ndɛ wɛ əb been ge yi ki Keyioy ə Feyin. Ghɛn lu se mome wel nɛ̂ vi se yɛn ge Keyioy tene sɛ lòò se Feyine-a. Mɛ suuy lɛ bek ge nfektese əbbuame se ɛydio saakenmen əblik əbjim ɛ mbi.

²Lɛɛ jii yɛ lòó ghɛn keele ge Keyioye tene lu kɛ́ Feyine. Naa ndɛ wɛ əb suuyen ge Jesus nè gwiy ɛ ketuu ntiɛ ka wele-mesoŋ lu wel wɛ əb kiin keyioy kɛ ke lòòn se Feyine.

³Dî nɛ naa ndɛ wɛ əb báà se beeme ge Jesus nè gwiy ka wele-mesoŋ lu nɛ keyioy kɛ əb kiin báà lòò se Feyine. Keyioy ə wene lòò nɛ lu se wel əbbaanese nɛ Christ, nɛ lu wel wɛ ghɛn nè yion ge əb yî gwiy, se lu nɛ əb shi ɛ mbi leenen.

⁴Ghon ə ghome, ghɛn di lu ghel ə Feyin nɛ ghɛne taamen è chia nfektese əbbuam bek ge wel wɛ əb luun ɛ ghɛne məm taa chia wɛ əb luun ɛ mbi fɛn.

⁵Ghene lu ghele ghɛ mbi fɛne, suuy nɛ lu əbnəə wɛ mbi fɛne nɛ ghele ghɛ mbi fɛne yio se ghene,

⁶dî nɛ ghɛsen lu ghel ə Feyin. Naa ndɛ wɛ əb keen Feyin yio se ghɛsen nɛ ghel ghɛ ɛ́ báà se ke Feyin lòó ɛ́ jia yio se ghɛsen. Lu ɛ jii nɛ̂ ghan yɛ lòó ghɛsen keele keyioy kɛ əbluuye nɛ kɛ əbbuame.

⁷Sun ə some, ghɛsen yɛ koŋnen bek ge ɛykoŋe lóò nɛ lu se Feyine. Naa ndɛ wɛ əb koŋen wel əblee lu wán ə Feyin gese ke Feyin.

⁸Wel wɛ əb koŋen wiy əblee báà se ke Feyin. Ke lu dî bek ge Feyine lu ɛykoŋ.

⁹Lɛɛ jii yɛ Feyine nè dinen ɛykoŋ ə wen se ghɛsen: Əb nè tinse wan wen wɛ əbmok ɛ ketuu ntiɛ fɛn ka əb nɛɛye ghɛsen yɛ chii.

¹⁰Lɛɛ nkante ɛykoŋ lɛ: Ke báà se lu ge nè koŋ ghɛsen Feyin, nè koŋ wen ghɛsen naa se ŋaŋ è tinse wán ə wen ka ntaŋle yɛ ɛy man mbee ə sɛsen.

¹¹Sun ə some, ka Feyine nè koŋenmen ghɛsen se ŋaŋ lɛ mba; ghɛsen yɛ koŋnen.

¹²Wel nè bɛɛy ghàà yi yɛn Feyin di nɛ ghɛsen lòò è yɛ koŋnen fene lu ghɛsen nɛ̀ ghene, é ɛykoŋe wene me nɛɛy é ghɛsen yɛ loote nɛɛye kenəə kɛ əb kɛŋen.

¹³Ghɛsen ke ge Feyine lu ghɛsen nɛ̀ ghene, nɛ ghɛsen lu ghɛsen nɛ̀ Feyine ɛ jii yɛ əb foonmen ghɛsen nɛ̀ Keyioy ə wene.

¹⁴Ghɛsen yɛnmen, è se suuy se ghel ɛlee ge Bay nè tinsemen wán ə wen ge əb boyse ghel ɛjim ɛ mbi fɛn.

¹⁵Naa ndɛ wɛ əb beemen ge Jesus lu wán ə Feyin lu nɛ Feyine lu ghene wen nɛ əb lu ghene Feyine.

¹⁶Ke me se lu ge ghɛsen ke ɛynkii ɛykoŋ yɛ Feyine koŋen ghɛsen nɛ ɛ́ gese fo ɛytem se ten. Feyine lu ɛykoŋ, nɛ naa ndɛ wɛ əb kiin ɛykoŋ ɛ wene məm lu sɛy ghene Feyine, nɛ Feyine lu ghene ŋwɛl.

¹⁷Ɛykoŋe Feyine loote dinen ɛ ghɛsene məm ka ghɛsene yɛ lu bo fane wiy kenəə kum kechii nsak; bo fane wiy dî bek ka ghɛsen shiin ka wen ɛ mbi fɛn.

¹⁸Ɛyfane sɛɛ jia lu ɛytem nə wel wɛ əb kiin ɛykoŋ, ɛ jii yɛ nkante ɛykoŋe jummen ɛyfan, ke lu dî bek ka wele sɛɛ fan nɛ lu njio fɛ ɛ́ vii yi se ngɛkse. Wel wɛ əb fanene báà se loote nɛɛy kenəə kɛ ɛykoŋe Feyine kɛŋen.

¹⁹Ghɛsen koŋe Feyine, nɛ̀ ghele ɛlee bek ka nè kɛɛten Feyin è koŋ ghɛsen.

²⁰Wel lòò è yɛ suuy ge: Mɛ koŋe Feyin, dî bane wán-no ə wen fene əb lu wel əbbuam bek ge wele yɛne wán-no-wen koŋe wiy wen fene lòó əb jia yɛ koŋe Feyin wɛ əb yɛ́nen wiy.

²¹Feyine nè lômen fo ɛysak yin se ghɛsen ge: Wele koŋe Feyin fene əb tiy se yɛ koŋe wán-no ə wen.