Read Oku 1Jn 5 Bible Online

1Jn 5 - Oku bible

1Jn 5

¹Naa ndɛ wɛ əb beemen ge Jesus lu Vi wɛ Feyine nè Yiosen, lu wán ə Feyin; wele loo koŋe wel əb yɛ koŋe wán ə wele ten sɛy.

²Lòó ghɛsen keele ge ɛ́ koŋe ghon ə Feyin ɛ jii ghan ge: Ghɛsene koŋe Feyin gese yionen se yɛ lɛme nchilse wen.

³Lɛɛ ka ghɛsen lòó ɛ́ yɛ koŋe Feyin: Ghɛsen lu se yɛ yionen se wen lɛme nchilse wen nɛ se taa wiy ghake ghɛsen se yɛ lɛm.

⁴Ke lu dî bek ge naa ndɛ wɛ luun wan Feyine taa chia kediake kɛ mbi fɛne. Ghɛsen noo è yiɛ mbi nɛ lu nɛ̀ ɛytem yɛ ghɛsen foon se Feyine.

⁵Lòó noo ndɛ mbi è yiɛ? Lòó yiɛ wel wɛ əb beemen ge Jesus lu wán ə Feyin.

⁶Jesus Christ lu vi wɛ əb nè gwiyen nɛ̀ moome ghene əmnduŋme.[1] Əb nè báà gwiy kɛn nɛ̀ moome, əb nè gwiy sɛy nɛ̀ əmnduŋme. Keyioy ə Feyine toose ge kenəə nɛ̂ kin lu əbluuy bek ge Keyioy ə Feyine lu keyioye əbluuy.

⁷Əbnəə lu əbtal wɛ əb toosen kii nɛ̂ kine,

⁸lu Keyioy Feyin, nɛ̀ moome, gese nɛ̀ əmnduŋme. Vii nɛ̂ vine əbtal lɛ toose kɛn kenəə kemok.

⁹Wele sɛɛ yɛne kenəə è loo suuy, ghɛsen beeme, dî nɛ kenəə kɛ suuyen Feyine taa chia, nɛ Feyine súúy kenəə nɛ̂ kin nɛ lu kum wán ə wen.

¹⁰Naa ndɛ wɛ əb foon ɛytem se Wan ə Feyin lu nɛ əb beeme kenəə nɛ̂ kin ɛ wen ɛytem; dî nɛ ghii dii ghɛ ɛ́ báà beeme Feyin lu nɛ ɛ́ nɛɛymen ge Feyine yɛ yɛnsen se wel əbbuam, bek ka ghene báà beeme kenəə kɛ Feyine toosen kum wán ə wen.

¹¹Kenəə kɛ Feyine nè toosen kum wán ə wen lu ge: Feyine nè fomen ɛychii yɛ ɛy jia yî mɛy se ghɛsen nɛ ɛychii nɛ̂ yine lóò se wan ə wen.

¹²Naa ndɛ wɛ əb kiilen wan Feyin se ki ɛychii yɛ ɛy jia yi mɛy, nɛ naa ndɛ wɛ əb báà kiile wán ə Feyine báà se ki ɛychii yɛ ɛy jia yi mɛy.

¹³Mɛ nyake kine se ghɛn ghɛ ɛ́ foonmen ɛytem se wan ə Feyine ka ghɛne keele ge ghɛn ki ɛychii yɛ ɛy jia yî mɛy.

¹⁴Ghɛsen lu ghɛsen nɛ̀ Feyine bo fane wiy kefaa, bek ka ghɛsen ke ge ghɛsen bif naa ghɛ ɛ jii yɛ əb kɛŋen ge əbnəə yɛ lu, é əb yio ghɛsen.

¹⁵Ka ghɛsen keen ge ɛ́ bif kefaa naa ɛ leghɛ, é əb yio ghɛsen, lu nɛ ghɛsen lòó jia bó yɛ maanen ge ɛ́ bif naa ghɛ se wen əb fo.

¹⁶Wel yɛn nɛ wan-nyii nɛɛy mbee nɛ lu yɛ lòó ɛy jia me mɛyse ɛychii wen ɛ məm nə Feyine, əb jem é Feyine fó ɛychii se wen. Mɛ suuy kine nɛ lu kɛn kum wel wɛ əb nɛɛyen mbee yɛ lòó ɛy jia me məyse ɛychii wen kɛn mɛysen. Mbee ɛylee lu yɛ wele nɛɛyen ɛy mɛyse ɛychii wen kɛn meysen, nɛ mɛ báà se suuy ge wel yɛ jem kum ɛynkii mbee nɛ̂ ghàn.

¹⁷Kenəə kebee kejim lu mbee, nɛ̀ mbee ɛylee lòó ɛy jia me mɛyse ɛychii wel kɛn mɛysen.

¹⁸Ghɛsen ke ge naa ndɛ wɛ luun wan ə Feyin bo nɛɛy nduu wiy nɛ̀ mbee. Vi wɛ luun wan Feyin lu nɛ Feyine tɛɛke fɛ Wel əbbee bese.

¹⁹Ghɛsen ke ge ghɛsen lu ghon ə Feyin, chèmè lu ka mbi ɛyjim luun ɛyshaa ɛysak nə wel əbbee.

²⁰Ghɛsen ke sɛy ge Wan ə Feyin nè gwiymen è nɛɛy ge ghɛsen yɛ ke əbnəə ka ghɛsene keele Feyin Fɛ luun Fɛ́ əbluuye. Ghɛsen shi ghɛsen nɛ̀ Feyine Fɛ́ əbluuye, lu ghɛsen nɛ̀ Jesus Christ. Di lu wen Feyine Fɛ̂ əbluuye, nɛ foo wen ɛychii yɛ ɛy jia yî mɛy.

²¹Ghon ə ghome, ghɛn lɛk ɛykokse əmnyin.