Read Oku 2Jn 1 Bible Online

2Jn 1 - Oku bible

2Jn 1

¹Ŋwaale yin lòò se chɛɛ wel yɛ mɛ nɛ mɛ nyake se wɛ̀ əbvii wɛ Feyine nè chokenmen ghɛne ghon ə ghiɛ, ghɛn ghɛ mɛ nè koŋen se əbluuy. Báà se koŋe kɛn mɛ ghɛn, ghel ɛjim ghɛ ɛ́ keen əbluuy koŋe ghɛn.

²Ɛykoŋe tene lu bek əbluuy wɛ əb luun ɛ ghɛse məm nɛ əb yî yɛ yese lu kɛn luun.

³Bay Feyin ghene Jesus Christ wɛ wán ə wen ko cham ɛysene ə yɛ́sen, è koosen ɛysen se ghɛsen è fo əmnyiaŋ se ghɛsen bek əbluuye nɛ ɛykoŋe yɛ ghɛsen kiin.

⁴Mɛ saŋle naa se ŋaŋ se yɛn ge ghon ə ghiɛ ɛlee chii ɛychii əbluuy kɛn ka Bay nè foon ɛysak.

⁵Ke me se lu ɛ no-wan nɛ mɛ báà se foo nchil ɛyfɛɛ se wɛ̀, nchil nɛ̂ yin nè shi se kenkɛɛte. Mɛ lone ge ghɛsen yɛ koŋe ngeŋ ə sɛsen.

⁶Ɛykoŋe lu ɛ jii ghan ge: Ghɛsen yɛ chii ka ɛysake Baye dinen, ka ghɛn ko nè yionmen se kenkɛɛte, ɛysake wene suuy ge ghɛn yɛ chii ɛ məme ɛykoŋ.

⁷Mɛ suuy lɛ bek ka ghel əbbuame lu se ɛydio ghɛ ɛ́ ghanen ɛ mbi ɛyjim lɛɛse ghel ge Jesus nè báà yi gwiy ka wele-mesoŋ ɛ ketuu ntiɛ fɛn. Wele suuy di fene lu wel əbbuam nɛ gese lu wel əbbaanese nə Christ.

⁸Ghɛn yɛ toknen se lɛye kii dii kɛ ghɛn fɛlenmen è kiile. Ghɛn yɛ luŋ se kiile əbmakte wɛn əbjim.

⁹Naa ndɛ wɛ əb gisen kenəə se wɛ Christ nè dinten dî bo chii wiy ka Christe kɛŋen, gese wiy wele Feyin. Naa ndɛ wɛ əb lɛmen əbnəə wɛ Christe dinten lu wele Bay gese lu wele wan.

¹⁰Wel gwiy se ghɛn è yɛ dinte kenəə nɛ wiy kɛ Christe, ghàà ghɛn fiisen wen, è chèmè jia chakte wen.

¹¹Naa ndɛ wɛ əb chakte wel ka əbghen lu nɛ əb chinten wele ten ɛ wen ɛyfɛl ɛybee.

¹²Mɛ ki əbnəə se ɛydio se suuy se wɛ̀ dî koŋe wiy se nyak nyaken. Mɛ sɛy ki ɛykwaate se ghane wɛ̀ ka ghɛsoo yɛnen nɛ̀ ɛykeke è suŋnen ka ghɛsoo yɛ mɛyse saŋle.

¹³Ghon ə jɛmte yiɛ yɛ Feyine nè chokenmen tinse ɛychakte se wɛ̀.