Read Oku Jud 1 Bible Online

Jud 1 - Oku bible

Jud 1

¹Lu mɛ Jud nɛ mɛ fɛle se Jesus Christ gese lu wán-no ə Jɛms. Mɛ nyake ŋwaale yin se ghel ghɛ Bay Feyin nè koŋen, è chok, è vii ɛ Jesus Christ ə keghoo.

²Feyine kó yɛ chame ghɛn, foo ɛytem ɛyzəətene se ghɛn gese koŋe ghɛn nduu kɛn ɛ mbiy.

³Sun ə some, mɛ nè ki shii se nyak se ghɛn kum ɛyboy yɛ ghɛsen ghel ɛjim kiin. Mɛ me yɛn ge ke lu ɛ shii ge mɛ nyak ŋwaale yin se ghɛn chikiy, è yɛ tefe ghɛn ge ghɛn noo ketan se loote se ghale kenəə kɛ kum Christ ka Feyine nè foonmen se ghel ə wene kaŋ ɛymok.

⁴Mɛ suuy lɛ bek ge ghel ɛbee ɛlee ghoonemen, è lii se ghɛne məm. Ghene lu ghel ghɛ ɛ́ báà se ke Feyin, ghel ghɛ ɛ́ besen kenəə kɛ kum ɛycham yɛ Feyine chammen ɛysen ə yɛ́sen ka ghele jia yɛ yɛn əbnəə əbbee wɛ ghene momlen. Ghene tunse Jesus Christ wɛ luun kɛn wen Báàba ə wɛsen. Feyine nè dinmen naa se əbməən ge yi yî mak ngɛk se ghel ghine ketuu.

⁵Mɛ me se kɛŋe se tamte əbnəə se ghɛn ge; chèmè lu ka ghɛn loote keen ge Bay nè lô fəyse ghele Islaele se ɛylake Ejibt, dî nɛ lu se ɛybame ten, əb ko yuyté ghel ghɛ ɛ́ nè báà fo ɛytem se wen.

⁶Ghɛn kuume sɛy ge nchiyse-ndaa nə Feyine sɛ se nè ŋàken chian keleŋ è me vəse kelik ə ghen, lu nɛ Feyine kul ghene nɛ̀ əmnchak mɛ əm jia yî teene ɛ mbi nfiine naa ɛ ntiɛ vəəy, è bɛɛse è se chiyte kechii ketaa kii kɛ əb nɛ̂y sak ghene ɛ ten.

⁷Ghɛn kuume sɛy kenəə kɛ ke nè ganen ɛ Sodom nɛ̀ Gomolla nɛ̀ ntɛk sɛ se baksen se seghene, ka ghel ə ghene nè nɛɛyen ka nchiyse-ndaa sebee nɛ̂ shi, jaŋe kenjaŋ, nɛɛye ɛynɛɛye lólò. Feyine nè lô nyok ntɛk nɛ̂ shin nɛ̀ əbvəs wɛ əb fuon əbliy əbjim. Kii nɛ̂ kine se lu əbchəyte se tefe ghel ɛjim.

⁸Vii nɛ̂ vine lu sɛy əbnəə wɛ ghel ghɛ ɛ́ ghoonen ɛ ghɛne məm nɛɛyen. Ghene nɛɛy əbnəə wɛ əb besen ngeŋse ghen, tunse əbtaawe Feyin, gese tɛyle əbyioy wɛ əb luun ɛ ɛyyio, taa ge ɛ́ yɛne nɛ lu ɛ jɛm.

⁹Chèmè lu Mikael wɛ nchiy-ndaa-Feyin ɛyngaŋten fene nè lu əbliy wɛ ghene Satan nè gufnen se ɛygvən nə Moses, əb jia cheme tɛyle Satan. Əb nè suuy kɛn ge Feyine nɛ̂y sak wen.

¹⁰Nfektese əbbuam shine lóó se yɛ suŋnen kebee kum naa ghɛ wɛ ghene báà se ke. Ghene lóó ɛ́ yɛ nɛɛy əbnəə naa lɛɛy ka nyamse əbkwak dì, nɛ lu əbnəə vin wɛ əb besen ghene.

¹¹Lon se ghene. Ghene liɛmen kevəə ɛyjɛl nə Kain. Ghene jasmen ka Balaam bek shii wɛ ghene kiin se əbkaa. Feyine nɛ̂y yuy ghene ka əb nè yuyen Kola wɛ əb nè tunsen Feyin.

¹²Ghel ghine lu ghɛne ghene yiɛ se kefaa kemok, dî choksen choksen kenchinten ə kɛn bek ge ɛ́ gwiye se yɛ nəə, yiɛ gese noole kɛn nɛ̀ ngeŋse ghene. Ghene lu ka ɛyghuu yɛ ɛy koksen, əbfiɛfe me takse, gese lu ka əmkak mɛ chuy koon, əm jia koom, əmkak mɛ ɛ́ choktenmen, əm kuo kejim kejim.

¹³Ghene gese lu ka jio əbliy wɛ əbfiɛfe shiken nɛ ɛy fəəsee, nɛ kefəfəye tene lu jione wɛ ghene nɛɛyen. Ghene ko gese lu ka əmnjes mɛ əm jiŋen jiŋen. Feyine lɛmmen kelik se ghene nɛ lu ɛ nfiine ɛytaa, ghaa ghene yɛ lu, yese lu kɛn luun.

¹⁴Enok wɛ nè luun wán ə Adam ɛbay ntuufe nè lô suuy naa se nguk kum ghene ge: “Yɛn-a! Báàba nɛ̂y gwiy nɛ̀ nchiyse-ndaa nə wen se lanene ɛ nkamse nkamse é

¹⁵se tenen nsak ə ghel ɛjim. Əb náà sak wel əbjim è mak ngɛk se ghel ghɛ ɛ́ báà se ke Feyin bek əbnəə əbbee wɛ ghene momlen, bek ndiy sɛ ghel ghɛ ɛ́ báà se ke Feyin nɛ̂ ghine tɛylen wen so.”

¹⁶Ghel ghine yese vəke gese base ghel ɛlee, nɛɛye nɛ lu əbnəə əbbee wɛ ghene koŋen. Ghene ghaŋse əbghun kum ngeŋse ghen, gese yia əbbuam se ghele kɛn se kiile kefaa kɛ ghene kɛŋen.

¹⁷Sun ə some, ghɛn yɛ kuume əbnəə wɛ ghɛ́ ntum nə Báàba wɛsen Jesus Christ nè suuyen se nguk ge əb yî gan.

¹⁸Ghene nè suuy se ghɛn ge: Náà lóó lu əbchii kenləysen é ghel nɛ̂ ghine fəy è gwiy, nɛ lu ghel ghɛ ghene koŋen se yɛ nɛɛy əbnəə wɛ ɛyghun ə ghene kɛŋen, è yɛ buu ghɛn buun.

¹⁹Lu ghel nɛ̂ ghin ghɛ ghene gwiyen nɛ̀ əbngiabsen ɛ ghɛne məm, bek ka ghene báà se ki keyioy ə Feyin. Ghene nɛɛy nɛ lu əbnəə wɛ əmnduŋ mə ghene kɛŋen.

²⁰Sun ə some, ghɛn yɛ kuy kɛn ɛ kenəə kɛ ghɛn foon ɛytem se ten, jeme ketaan ɛ əbtaawe nə Keyioy Kelanene.

²¹Ghɛn yɛ chii ka ghel ghɛ ɛ́ foon ɛytem se Feyine, koŋe wen, chiyte ka Báàba ə wɛsen Jesus Christ wɛ əb koosen ɛysen se ghɛsen naa fo ɛychii se ghɛsen yɛ ɛy jia yî mɛy.

²²Ghɛn yɛ koosen ɛysen se ghel ghɛ ɛ́ bo maanen əbnəə.

²³Ghɛn kóó ghii dii ghɛ ɛ́ shiin kɛn se fɛy se əbvəs chikiy chikiy. Ghɛn yɛ koosen ɛysen se wel əbjim, dî toknene, è nyiŋ əbnəə əbbee wɛ əbghune yusen ghel ge ghene yɛ nɛɛy naa əbjim.

²⁴Ghɛsen fó ɛykokse se Feyin ə Fɛsen. Lu wen wɛ əb keen se toke ghɛn fɛ ghɛn fɛy, se gese se gwiy nɛ̀ ghɛn ɛ wen ɛyshiɛ ɛlanen, ghàà jas.

²⁵Ghɛsen bɛɛ Báàba ə wɛsen Jesus Christ è yɛ foo ɛykokse se Feyine wɛ əb boysen ghɛsen se mbee. Əb ki ɛyngvəmle, nɛ̀ ɛyghel ɛyghakene, nɛ̀ əbtaawe əbjim se kenkɛɛte se chin se leenen, nɛ̀ se əbliy wɛ əb jia yî mɛy. Amen.