Read Oku Ɛyd 10 Bible Online

Ɛyd 10 - Oku bible

Ɛyd 10

¹Mɛ gese yɛn nchiy-ndaa-Feyin ɛytaa ɛylee nɛ ɛy səəke gwiye ɛyyio, nɛ mbàkse kal wen è tas, nɛ ɛyfilinjoŋe kaale ketuu ə wen. Ɛykeke ə wene nè bane ka chuy, nɛ ɛyfin ə wene lu ka əbtok wɛ əb baalen.

²Əb nè ki ŋwaale ɛykaalen ɛ wen ə keghoo nɛ ɛ́ yasmen. Əb nè taken, kevəə ə wene kɛ́ əbkoy əbtaa se lu ɛ jio ɛyghuy, nɛ kɛ́ əbkoy əbkiye lu ɛ ntiɛ,

³əb teem dì, è jaŋ ɛ giɛ ɛytaa ka bvələk ɛ əbliy wɛ ɛy toŋen. Əb jaŋ dì, ɛyghuu me dəm kaŋ saamba.

⁴Ka ɛy dəmen dî ɛ leghɛ mɛ loo ge mɛ nyake, è me yio giɛ ɛyyio nɛ ɛy suuy ge: Lete əbnəə wɛ ɛyghuu yɛ ɛy dəmen kaŋ saamba suuyen, ghàà nyak əb ghene.

⁵Nchiy-ndaa-Feyin yɛ mɛ kè yɛnen nɛ ɛy taken è tom kevəə kelee ɛ jio ɛyghuy è tom kelee ɛ ntiɛ me lose əbkoy ə wen əbtaa ɛyyio,

⁶è lek ɛ ɛyghel nə vi wɛ əb chiin əbliy əbjim, vi wɛ əb nè bomen ɛyyio nɛ̀ əbfua əbjim wɛ əb luun ɛ ten, è bom ntiɛ nɛ̀ əbfua əbjime wɛ əb luun ɛ ten è bom jio ɛyghuy nɛ̀ əbfua əbjim wɛ əb luun ɛ ten. Ɛy nè lek ge: Ɛyjefse əbliye jia bo yɛ lu.

⁷Nchiy-ndaa-Feyin yɛ əbleŋ saamba nɛ̂y toŋ ɛyshoŋ ə wen é Feyine me nɛɛy əbnəə wɛ əb nè leten kɛn ka əb nè suuyen se ghel ɛyfɛl nə wen ghɛ ghɛ́ ntume.

⁸Giɛ yɛ mɛ kè yion nɛ ɛy suŋnen se mɛ ɛyyio me gese suuy se mɛ ge: Ndu, è fii ŋwaale ɛykaalen yɛ ɛy luun ɛyyásen ɛ keghoo nə nchiy-ndaa-Feyin yɛ əbfin əblee tiyen ɛ jio ɛyghuy, nɛ əblee tiy ɛ ntiɛ.

⁹Mɛ ndu se nchiy-ndaa-Feyin yi, è suuy se wen ge əb fó ŋwaale ɛykaalen yɛ́ ten. Əb suuy san ge: Ko, è kfəl, ɛy yɛ lem ɛ wɛ̀ əbchio ka əbluu, è lii əblɛɛ è yɛ luy luyen.

¹⁰Mɛ fii ŋwaale yɛ ten se keghoo nə nchiy-ndaa-Feyin yi, è kfəl nɛ ɛy leme kɛn naa ka əbluu ɛ mɛ əbchio. Mɛ mii, ɛy me se luye luyen ɛ mɛ əblɛɛ.

¹¹Əb gese suuy se mɛ ge: Wɛ̀ lu se fekte kenəə ə Feyin se ɛynkii ghele se ɛydio, nɛ̀ əbtume se ɛydio nɛ̀ se ghel ghɛ ɛ́ suŋnen telam se ɛydio, gese nɛ̀ tefone se ɛydio.