Read Oku Ɛyd 11 Bible Online

Ɛyd 11 - Oku bible

Ɛyd 11

¹Ɛ́ me fo əbfek se mɛ nɛ əb lu əblame mbàŋ è suuy ge: Ndu, è fek ndaa-ɛykokse Feyin gese nɛ̀ ketatane ntaŋle, è taŋ ghel ghɛ ɛ́ luun fo kokse Feyin.

²Wɛ̀ loo feke ndaa-ɛykokse, wɛ̀ vəse ɛybee bɛy. Ghàà fek fo bek ge, ɛ́ fó se ghel əbtume. Ghene náà jɛɛle Ntɛk Ɛylanen yin nɛ̀ ɛvəə se njoŋse njio-sebaa əmmkɛɛk.

³Mɛ náà fo əbtaawe se ghele ntum nə mɛ ɛbaa nɛ ɛ́ mak kebaame, é ghene yɛ fekte kenəə ə Feyin se əbchii nkam nɛ̀ ɛyviɛ ɛybaa nɛ̀ əbchii əmtuufe (1,260).

⁴Ghele ntum ghɛ ɛbaa lu əmkakme olif mɛ əmbua nɛ̀ əbtiɛ əbkaaken wɛ əbbua wɛ əb tiyen ɛ ɛyshiɛ nə Bay wɛ əb saken mbi ɛyjim.

⁵Wel lòò è yɛ mom se nɛɛye kenəə kebee se ghene, əbvəse fəy ɛ ghen ə ɛychio è nyok naa ndɛ wɛ luun wele əbbaanese nə ghene. Lu ɛ jii nɛ̂ ghan yɛ naa ndɛ wɛ əb momen se nɛɛye mbee se ghene náà kuo ɛ ten.

⁶Ghene ki əbtaawe se fen ɛyyio ka ɛyghuu jia bo gwiy se keleŋ əbliy kɛ ghene fekten kenəə ə Feyin. Ghene ki sɛy əbtaawe se bense jiose se əmnduŋ, gese ki əbtaawe se make naa ɛynkii ngɛk sekɛ ɛ ketuu ntiɛ naa ɛ leghɛ wɛ ghene kɛŋen.

⁷Ghene náà fekte ntum ə ghen è mɛyse, é nyam əbkwak kok è gwiy ɛ nkweŋ, è noo ghene è taa è chia ghene è yuyté.

⁸Tegvən ə ghene nɛ̂y yɛ nyiŋ ɛ jii ɛ ntɛk ɛyghuy bene fɛ ɛ́ nè banten Báàba ə ghen. Ɛ́ toŋte ntɛk nɛ̂ yin ɛ giɛ ngan ge Sodom kene Ejibt.

⁹Tegvən ə ghene náà yɛ nyiŋ dî nɛ tenkii ghel tejime, nɛ ghel əbtum əbjime, nɛ̀ tekfəə tejime, nɛ̀ ghɛ́ telam tejime kiye se əbchii əbtal nɛ̀ kengianene beeme wiy ge ɛ́ gvəəme.

¹⁰Ghel ghɛ́ ketuu ntiɛ náà yɛ saŋle. Ghene náà yɛ yiɛ, saŋlee, foo əbfua se ngeŋse ghene bek ge ghele ntum nɛ̂ ghii nè lô gwiy nɛ̀ ngɛkse ɛ ketuu ntiɛ se lu nɛ ghene kuomen.

¹¹Əbchii wɛ əbtal nɛ̀ kengianene chia, é Feyine me tinse keyioy kɛ ke foon ɛychii ke gwiy è lii se ghel ghii ɛyghun, ghene kase loole è teem, wel əbjim wɛ əb yɛnen ghene me se fane naa se ŋaŋ.

¹²Ghele ntum ghii me yio nɛ giɛ ɛytaa gwiye ɛyyio ge: Ghɛn kok è gwiy fɛn. Ghene me kok se ɛyyio ɛ məme mbàkse nɛ ghele əbbaanese nə ghene kiye.

¹³Kɛn əbliy fo, ntiɛ se shiken ɛ jii ɛytaa, keleŋe ntɛk kɛ kemok ɛ məme ɛyvəm me kɛɛse, ghele kuo nkam saamba. Kembɛke ghel se ki ɛyfan naa se ŋaŋ è se foo ɛykokse se Feyin ɛ ɛyyio.

¹⁴Ngɛk sɛ əbleŋ əbbua lɛ chiamen, dî nɛ sɛ əbleŋ əbtale shi ɛ keghoo.

¹⁵Mɛ loo chin nchiy-ndaa-Feyin yɛ əbleŋ saamba tóŋ yɛ́ wene yɛ ɛyshoŋ, giɛ setaa se loole ɛyyio ge: Əbtaawe wɛ yɛ sake mbi so shi ɛ leenen se Báàba wɛsen ghene Vi wɛ Əb nè Yiosen. Ghene yɛ sake mbi se əbliy wɛ əb jia yî mɛy.

¹⁶Chɛɛ sɛ njio sekɛɛk əmbaa sɛ se diom ɛ ghene kabase ɛ Feyine ɛyshiɛ təm tekek ə ghen è se kokse Feyin,

¹⁷suuye ge: Bay Feyin, Wɛ Ba-Əbtaawe-Əbjim, ghɛse bɛɛle wɛ̀. Wɛ̀ lu ɛ leenen nɛ wɛ̀ nè se shi. Wɛ̀ liɛmen kediak ə kiɛ ketaa è se sake mbi so.

¹⁸Ghel əbtume nè yafse ɛytem bek ge əbliy wɛ wɛ̀ din ɛyyafse ɛytem nə wɛ̀ nè kwɛnmen: Lu əbliy wɛ wɛ̀ sak ghel ɛjim ghɛ ɛ́ nè kuonmen. Əbliye kwɛnmen wɛ wɛ̀ laame ghel ɛyfɛl ghɛ ghɛ́ ntum nə wɛ̀ nɛ̀ ghel ə ghiɛ ɛjim ghɛ ɛ́ vəmen wɛ̀, kene lu ɛghakene, kene lu ɛtɛlɛɛ. Shi əbliy se bese ghel ghɛ ɛ́ yúyten ghel ɛ ntiɛ fɛn.

¹⁹Ɛ́ dise əbchio ndaa Feyin ɛ ɛyyio, mɛ yɛn nkuf yɛ ɛ́ nè lɛmen nkakma Feyin ɛ ten. Ɛyghuu nè ŋwankele, buale, dəmke, nɛ ntiɛ shikene nɛ əblike kɛytee, nɛ əmtiyme gese fɛye se kediak.