Read Oku Ɛyd 12 Bible Online

Ɛyd 12 - Oku bible

Ɛyd 12

¹Əbchəyte əbchio əbyúméné əblee me yɛnsen ɛ ɛyyio. Əbvii əblee yɛnsen fo nɛ chuye lim wen ka ndəyse, nɛ əb tom ɛvəə ə wen ɛ njoŋ è sooy kefole tefon nɛ əmnjesme lu ɛ ten njio-sebaa ɛyvəm.

²Əb nè lu nɛ̀ əblɛɛ nɛ əb shi se bii, əb loo lum è se yio ɛylum, toŋe.

³Əchəyte əbchio əbyúméné əblee gese yɛnsen ɛ ɛyyio. Keŋaangu keghuye kelee yɛnsen fo baŋe baŋen, ki əbtuu saamba nɛ̀ ndoŋse ɛyvəm, nɛ ketuu kemoke ki kefole tefon.

⁴Keŋaangu ki yɛs keleŋ əmnjes kɛ kemok ɛ məme wɛ əbtale nɛ̀ əbkun ə wene, è səkse se ntiɛ, è teem ɛ əbvii vi ɛyshiɛ, è se chiyte ge əbvii vi yɛ bii wan ɛ leghɛ é yi kfəl.

⁵Əb bii wán əbluumen nɛ lu wen wɛ əb yî sak əbtum əbjim nɛ̀ əbtaawe əbghuye. Ɛ́ me fɛf wan ten è kok so se Feyine ɛ wene kaba.

⁶Əbvii ten nyiŋ è ndu əbkwak əbyume nɛ lu kelik kɛ Feyine nè siysen ge yi nɛ̂y yɛ toknen nɛ̀ wen ɛ ten se əbchii nkam nɛ̀ ɛyviɛ ɛybaa nɛ̀ əbchii əmtuufe.

⁷Ɛyghoŋe me kɛɛte ɛyyio. Mikael ghene nchiyse-ndaa nə wene se noo keŋaangu ki ghene nchiyse-ndaa nə wene, nɛ keŋaangu ki ghene nchiyse-ndaa nə wene noo ghene sɛy.

⁸Ɛ́ yiɛ keŋaangu ghene nchiyse-ndaa nə wene, è jia gese beeme ge ghene nchiyse-ndaa nə wene bo yɛ lu ɛyyio.

⁹Ɛ́ me jum keŋaangu ki se ɛyyio, kɛ luun yio ɛyməə-ɛyməə yɛ ɛ́ toŋten ge: Wel ɛyfim, kene Satan. Lu wen wɛ əb lɛɛsen ghel ɛ mbi ɛyjim. Ɛ́ nè jum wen dì è mak ɛ ketuu ntiɛ ghene nchiyse-ndaa nə wene.

¹⁰Mɛ me yio nɛ giɛ ɛytaa gwiye ɛyyio suuye ge: Lɛɛ ɛ leenen wɛ Feyin ə Fɛsene boyse ghele wen, è din kediak ə wen ka əbfon. Vi wɛ Feyine nè Yiosen é din əbtaawe ə wen. Bek ge vi wɛ əb nè teem ɛ Feyin ə Fɛsen ɛyshiɛ nɛ̀ nchuy nɛ̀ ntəke toye əbnəə ɛ ghone-nyii əbghun lu nɛ ɛ́ jummen wen se ɛyyio.

¹¹Ghone-nyii taamen è chia wen ɛ əbtaawe nə əmnduŋ mə wan-njiɛ gese nɛ̀ əbluuy wɛ ghene nè fekten. Ghene nè lu kebaaten se kuo bek ɛybeeme ghen.

¹²Ke me se lu ge ghɛn ghɛ ɛ́ luun ɛ ɛyyio yɛ saŋle. Dî nɛ lon lu se ghɛne ghɛ́ ketuu ntiɛ nɛ̀ jio seghuye bek ge wel ɛyfim səəkemen è gwiy se ghɛn nɛ ɛyyafse ɛyteme bek ka əb keen ge əbliy ə vii se təmse.

¹³Keŋaangu ki nɛy yɛn ge ɛ́ makmen yi se ntiɛ è me se kɛŋe se koo əbvii vi wɛ əb nè biin wán əbluumen.

¹⁴Ɛ́ me fo ɛghaa kebaba keghuye se əbvii vi ge əb tan è ndu əbkwak əbyume bene fɛ ɛ́ yɛ toknen nɛ̀ wen se nguk setal nɛ̀ kembɛkee nɛ lòó Satan jia chin fo.

¹⁵Əb tan è ndu fo dî, keŋaangu fəyse jio ɛ wen əbchio ge ɛy liɛ əbvii ten è ndu so.

¹⁶Dî ntiɛ giamten wen è kaken, moome mɛ keŋaangu ki kè fəysen ɛ wen əbchio me səəke è ndu se ntiɛ.

¹⁷Keŋaangu yafse ɛytem se əbvii vi, è me ndu è se noo ghone əbvii ten ɛlee nɛ lu ghel ghɛ ɛ́ yionen se Feyine gese foo ɛytem se əbluuy wɛ Jesus dinen.

¹⁸Keŋaangu kii me ndu è se tiy ɛ əbghooye jio ɛyghuy.