Read Oku Ɛyd 13 Bible Online

Ɛyd 13 - Oku bible

Ɛyd 13

¹Mɛ me yɛn nyam əbkwak ɛylee nɛ ɛy fəye gwiye ɛ jio ɛyghuy. Ɛy nè ki ndoŋse ɛyvəm nɛ̀ əbtuu saamba, nɛ ndoŋse tene ki əbfole tefon nɛ ɛ́ nyak teghel ɛ əbtuu wɛ saamba nɛ te tɛyle Feyin.

²Nyam ten nè fuosen baa nɛ ɛvəə chil nɛ ngɛyse gese diafke ka sɛ nyam yɛ ɛ́ toŋten ge bɛ́ɛ̀, nɛ əbchio lu ka wɛ bvələke. Keŋaangu ki me chiase kediak ə wen, nɛ̀ kaba ə wen gese nɛ̀ əbtaawe ə wen əbjim se nyam əbkwak ɛybɛɛmen yi.

³Ketuu nyame ten kelee nè keke ka ke nè lô se ki kelɛɛme kebɛɛmene dî nɛ ke nè bonenmen. Mbi ɛyjim se lu nɛ̀ əbchíò əbyúméné, è se jumte nyam yɛ ten.

⁴Ghel ɛjime me se kokse keŋaangu bek ka ke nè foon əbtaawe ə wen se nyam əbkwak ɛybɛɛmen yi gese kokse nyam əbkwak nɛ̂ yi suuye ge: Lu ndɛ ka nyam əbkwak yin? Lòó noo ndɛ ɛyghen.

⁵Ɛ́ vəse nyam yi ɛy se suuy əbnəə ɛyghaŋse əbghun, tɛyle Feyin gese dine əbtaawe wen se njoŋ njio-sebaa əmmkɛɛk.

⁶Ɛy me se tɛyle Feyin, suuye əbnəə əbbee kum ɛyghele Feyin, tɛyle kelik kɛ əb chiin ɛ ten, gese tɛyle ghel ɛjim ghɛ ɛ́ luun ɛ ɛyyio.

⁷Ɛ́ gese vəse ge ɛy noo ghel ə Feyin è yiɛ. Ɛ́ fó əbtaawe ge ɛy yɛ sake ghel ɛjim, kene lu ɛykfəə ɛykɛ, kene ketum kekɛ, kene ɛ́ suŋnen əblam əbkɛ, kene ɛynkii wel əbkɛ.

⁸Ghel ɛjim ghɛ ɛ́ luun ɛ ketuu ntiɛ nɛ̂y ngvəmle nyam nɛ̂ yi, buu kɛn ghel ghi ghɛ ɛ́ nè nyakenmen teghele ghen ɛ ŋwaale ɛychii nɛ ɛ́ bɛɛy ghàà bom mbi, nɛ lu Ŋwaale ɛychii nə wan-njiɛ wɛ ɛ́ nè yuyten.

⁹Naa ndɛ wɛ əb kiin əbtuule yio.

¹⁰Naa ndɛ wɛ Feyine nè lɛmen ge ɛ́ náà koo, lu nɛ ɛ́ náà koo, nɛ naa ndɛ wɛ Feyine nè lɛmen ge ɛ́ náà yuy nɛ̀ fiak, lu nɛ ɛ́ náà yuy nɛ̀ fiak. Kine dine ge ghel ə Feyin lu se yɛ tiy ketaan, foo ɛytem se Feyine.

¹¹Mɛ me gese yɛn nyam əbkwak ɛylee nɛ ɛy fəye gwiye ɛ ntiɛ. Ɛy nè ki ndoŋ sebaa ka sɛ wan-njiɛ, nɛ̀ giɛ lu ka yɛ́ keŋaangu.

¹²Ɛy me fii əbtaawe nyam əbkwake yɛ̂ mbiy əbjim, è se nɛɛy əbnəə wɛ ɛy nè nɛɛyen kɛn ɛ ɛyghen ɛyshiɛ, è me kan ghel ɛjim ɛ mbi ge ɛ́ yɛ foo ɛykokse se nyame yɛ̂ mbiy yɛ ɛy nè kiin kelɛɛme kebɛɛmene kɛ ke nè bonenmen.

¹³Nyame yɛ́ kenkumten yin nè lô se nɛɛy əbnəə əbchio əbyúméné, è nɛɛy əbvəse lòò ɛyyio, è səəke ɛ ketuu ntiɛ nɛ ghele yɛne.

¹⁴Ɛ́ nè lô vəse ɛy se nɛɛy əbnəə əbchio əbyúméné, lɛɛse ghel ɛjim ghɛ ɛ́ chiin ɛ mbi ɛyshiɛ nə nyame yɛ̂ mbiy. Ɛy me suuy se ghel ɛjim ɛ mbi ge ghene fɛl kebambo kɛ ke yɛ fuosene nyame yɛ̂ mbiy, yɛ ɛ́ nè lɛmsen nɛ̀ fiak ɛy ko se chii, è fɛl dì è se koksee.

¹⁵Ɛ́ nè lô vəse nyame yɛ̂ kenkumten yi nɛɛy kebambo kii me se yioye suŋnene gese yuyte ghel ɛjim ghɛ ɛ́ báà se kokse keghene.

¹⁶Ɛy nè lô gese kan wel əbjim, ka əb ghaken, ka əb layten, ka luun wel əbghaken, ka luun wele ketan, ka luun kekos, ka wiyen kekos, ge əb kiile əbchəysen ɛ wen əbkoy əbtaa kene ɛ wen əbyes-ɛshiɛ.

¹⁷Kii nɛ̂ kine nè lu se nɛɛy ge wel nè loo lu è jia yɛ ki əbchəysen nɛ̂ vin kene nchəəy ɛyghel nə nyam əbkwak nɛ̂ ghan é əb jia yɛ nɛɛy əbwɛy.

¹⁸Kine dine ge ghɛn yɛ feesen. Naa ndɛ wɛ əb tofen lòó əb feknen əbchəysene nyam əbkwak nɛ̂ ghan bek ge əbchəysene tene lu ɛyghel ə wel, nɛ ɛy lu ge ɛyviɛ ntuufe nɛ njiose-ntuufe əmntuufe (666).