Read Oku Ɛyd 14 Bible Online

Ɛyd 14 - Oku bible

Ɛyd 14

¹Mɛ gese loo kiy, è yɛn wan-njiɛ nɛ əb tiy ɛ ketuu kfən Zion. Əb nè tiy fo ghene ghele nkam əbviɛ nɛ̀ njio sekɛɛk əmmkɛɛk nɛ ɛ́ nyak ɛyghel ə wen nɛ̀ yɛ Ba ə wene se ghene əbyes-ɛshiɛ.

²Mɛ yio nɛ giɛ gwiye ɛyyio ka ɛyfɛy ɛ əbliy wɛ ɛy buun, gese ka buale ɛyghuu. Giɛ ten nè kume ka ɛ́ buke ɛyluŋ.

³Ghel ghɛ nkam əbviɛ nɛ̀ njio sekɛɛk əmmkɛɛk teem ɛ ɛyshiɛ kaba, nɛ̀ əbfua əbkɛɛke gese nɛ̀ chɛɛse, è se yeme njàŋ ɛyfɛɛ. Nè lòó wel jia yiɛke njàŋe ten buu kɛn ghel ghɛ nkam əbviɛ nɛ̀ njio sekɛɛk əmmkɛɛk ghɛ Feyine nè boysenmen ɛ ntiɛ.

⁴Ghel nɛ̂ ghin lu ghel ghɛ ɛ́ nè bɛɛy ghàà bese ngeŋse ghen nɛ̀ əbkiye. Ghene jumte wan-njiɛ naa ghááy ghaa əb nduun. Feyine nè tenmen ghene se mbi, ghene se lu ka əmtame mɛ́ mbiy mɛ ɛ́ foon se Feyine ghene wan-njiɛ.

⁵Ghene nè bɛɛy ghàà yia əbbuam, è jia nɛɛy kenəə kebee se nkan.

⁶Mɛ me gese yɛn nchiy-ndaa-Feyin ɛylee nɛ ɛy tane ɛ feteten ɛyyio ki sakghɛ əbjuŋ wɛ əb jia yî mɛy se fekte se ghel ghɛ ɛ́ chiin ɛ ketuu ntiɛ, nɛ̀ əbtum əbjime, nɛ̀ tekfəə tejime, nɛ̀ ghɛ ɛ́ suŋnen telam tejime gese nɛ̀ tenkii ghel tejime.

⁷Ɛy nè suuy ɛ giɛ ɛytaa ge: Ghɛn yɛ vəme Feyin, kokse wen bek ge əbliy wɛ əb sak ghel ɛ ten kwɛnmen. Ghɛn yɛ kokse wen wɛ əb nè bomen ɛyyio ghene ntiɛ, nɛ̀ jio seghakene gese nɛ̀ ntoŋse jio.

⁸Nchiy-ndaa-Feyin ɛylee gwiy se yi ɛybam è se suuy ge: Əb fɛymen, Babilon əbghuy fɛymen. Əb nè nɛɛy ghel ɛjime nəə əmnduk mə wen mɛ nè luun ɛychii kenjaŋ.

⁹Nchiy-ndaa-Feyin yɛ əbleŋ əbtal gwiy ɛ ɛybame se sebaa shii è se suuy ɛ giɛ ɛytaa ge: Naa ndɛ wɛ əb koksen nyam əbkwak ghene kebambo wene gese ki əbchəysen ɛ wen əbyes-ɛshiɛ nɛ̀ se wen ə keghoo lu nɛ

¹⁰əb nɛ̂y nəə əmnduk mɛ əm dinen ɛyyafse ɛytem nə Feyine. Əmnduk nɛ̂ min lu mɛ Feyine báàn ketaan nɛ̀ ɛyyafse ɛyteme. Feyine yî nəkse ghel nɛ̂ ghin ɛ məme əbvəs nɛ̀ kefuu əbvəse ɛyshiɛ nə nchiyse-ndaa nə Feyine se lanene, nɛ̀ ɛyshiɛ nə wan-njiɛ.

¹¹Felik fɛ fe fəyen ɛ əbvəs wɛ ɛ́ nəksen ghene ɛ ten yî yɛ loolè se əbliy wɛ əb jia naa mɛy. Ghel ghi ghɛ ɛ́ koksen nyam əbkwak ghene kebambo wene nɛ ɛ́ gese nyak əbchəysen ɛyghel nə nyam əbkwak ɛ ghene əbyes-ɛshiɛ jia yî yɛ lu ɛ njuŋ, kene nɛ̀ nchuy, kene nɛ̀ ntəke.

¹²Kine dine ge ghel ə Feyine lu se yɛ kul ɛytem nɛ lu ghel ghɛ ɛ́ lɛmen ɛysak ə Feyin, gese foo ɛytem se Jesus.

¹³Mɛ gese yio giɛ ɛyyio nɛ ɛy suuye ge: Nyake kine ge: Ke lu kejuŋ se ghele ghii dii ghɛ se kɛ̀ɛ̀tè ɛ leenen lu nɛ ghene kuo ɛyfɛl nə Báàba. Keyioy ə Feyine bente ge: Ghene náà yɛ yio əbjuŋ, è chəəke se ghene ɛyfɛl bek ge ɛyfɛl ə ghen ɛyjuŋe nɛ̂y yɛ jumte ghene.

¹⁴Mɛ kiy, è yɛn mbàk sefəfene nɛ kefaa diom ɛ ten lu ka wele-mesoŋ nɛ əb sooy kefole tefon ɛ wene ketuu, ki fefiak ɛysɛɛ ɛsaŋ ɛ wene keghoo.

¹⁵Nchiy-ndaa-Feyin ɛylee fəy ɛ ndaa-ɛykokse è toŋ ɛ giɛ ɛytaa se vi wɛ əb diom ɛ mbàkse ge: Liɛ fefiak ɛysɛɛ ɛsaŋ nə wɛ̀ è yɛ sɛɛ ɛsaŋ so bek ka ketuu ntiɛ kwɛnmen ɛysɛɛ.

¹⁶Vi wɛ əb kè diom ɛ mbàkse me jik fefiak ə wen ɛ ketuu ntiɛ, è kaa əbfua ɛ ketuu ntiɛ.

¹⁷Nchiy-ndaa-Feyin ɛylee fəy ɛ ndaa-ɛykokse ɛyyio ki sɛy əmfiak mə ɛysɛɛ ɛsaŋ.

¹⁸Nchiy-ndaa-Feyin ɛylee me fəy è gwiy ɛ ketatane ntaŋle nɛ lu yɛ ɛy kiin əbtaawe se əbvəs. Ɛy fəy dî, è jaŋ è suuy ɛ giɛ ɛytaa se vi wɛ əb kiin fefiak ɛysɛɛ ɛsaŋ fetofene ge: Liɛ fefiak ə fiɛ, è sɛɛ əmtam əmjim so ɛ kengɛy əmtam ɛ ketuu ntiɛ bek ge əmtame ten taamen.

¹⁹Nchiy-ndaa-Feyin yi me jik fefiak ə wen ɛ ketuu ntiɛ è koyte əmtam se əmkak è mak se kelik kɛ Feyine sɛɛ nɛyte əmnduk mɛ əb dinen ɛyyafse ɛytem nə wen.

²⁰Ɛ́ jɛɛle əmtame ten ɛ ɛyghaŋe ntɛke Jolesalem, əmnduŋme se fəye ɛ kelik əmnduk fo lɛŋe ka ɛytaŋ ɛyviɛ ɛybaa dî sooy ka əbkoy əbful dì.