Read Oku Ɛyd 15 Bible Online

Ɛyd 15 - Oku bible

Ɛyd 15

¹Mɛ me gese yɛn əbchəyte əbchio əbyúméné əblee ɛyyio. Mɛ yɛn nchiyse-ndaa nə Feyine selee saamba nɛ se gwiye nɛ̀ tenkii lònse saamba nɛ lu sɛ́ kenləysene bek ge lu kenləysene jii yɛ Feyine dinen ɛyyafse ɛytem nə wen ɛ ten.

²Mɛ yɛn kefaa nɛ ke lu ka jio, liakte ka kenkiy nɛ ɛ́ fis nɛ̀ əbvəse. Mɛ yɛn ghel ghii ghɛ ɛ́ nè noon è yiɛ nyam əbkwak ghene kebambo wene gese nɛ̀ nchəəy ɛyghel nə wen. Ɛ́ nè tiy ɛ əbghune jio ɛyliaken fɛy nɛ̀ teluŋ ə Feyine ɛ ghene ɛghoo.

³Ghene nè tiy dî yeme njàŋe Moses wɛ wel ɛyfɛl nə Feyine gese nɛ̀ yɛ̂ wan-njiɛ suuye ge: “Bay Feyin, Wɛ Ba-Əbtaawe-Əbjim, wɛ̀ nɛɛy əbnəə əbchio əbyúméné, Wɛ̀ sake əbtum əbjim, jii ə shiɛ lu ɛ titiy nɛ kenloke wiy ɛ ten.

⁴Báàba, wel wɛ jia yɛ fane wɛ̀, kokse wiy ɛyghel ə yiɛ lu ndɛ? Lu kɛn wɛ̀ wɛ̀ nyiŋ wɛ wɛ̀ luun əblanen. Əbtum əbjime yî gwiy è fo ɛykokse se wɛ, bek ge wel əbjim yɛne əbnəə wɛ́ titiye wɛ wɛ̀ nɛɛyen.”

⁵Se ɛybame ten mɛ yɛn ndaa-ɛykokse ɛyyio ka ɛ́ disen nɛ̀ əbtaa əblanene ɛ ten.

⁶Mɛ yɛn nchiyse-ndaa nə Feyine sɛ saamba sɛ se nè gwiyen nɛ̀ tenkii lone saamba nɛ se fəy è gwiy ɛ ndaa-ɛykokse fɛy, nɛ se laf ɛ ndəy sefəfene nɛ se njante nɛ ɛ́ gese tem əbfua nɛ ɛ́ tio nɛ̀ ɛytiane se ghene əbnkàŋele.

⁷Kemok ɛ məme əbfua wɛ əbkɛɛk me fo əbghén saamba nɛ ɛ́ tio nɛ̀ ɛytiane se nchiyse-ndaa nə Feyine sɛ saamba, nɛ əbghene tene lun nɛ əmnduk mɛ əm dinen ɛyyafse ɛytem nə Feyin Fɛ Fe chiin yese chii kɛn chiin.

⁸Ndaa-ɛykokse chinten è se lu felik felik bek ɛyban ɛyghakene, nɛ̀ əbtaawe Feyine. Ke me se lu nɛ lòó wel jia lii se ndaa-ɛykokse fo buu ge lòn sɛ saamba sɛ nchiyse-ndaa sɛ saamba gwiyen so náà mɛy.