Read Oku Ɛyd 16 Bible Online

Ɛyd 16 - Oku bible

Ɛyd 16

¹Mɛ me yio ka giɛ ɛylee gwiyen ɛ ndaa-ɛykokse se nchiyse-ndaa sɛ saamba shi suuye ge: Ghɛn ndu è səs ɛ ketuu ntiɛ kii dii kɛ ke luun ɛ əbghen wɛ saamba dine ɛyyafse ɛytem nə Feyine.

²Nchiy-ndaa-Feyine yɛ mbiy ndu, è səs kefaa kɛ ke nè luun ɛ wene keghen se ntiɛ. Əmsààmè me se koo ghel ghɛ ɛ́ nè kiin əbchəysene nyam əbkwak gese nɛ̀ ghel ghɛ ɛ́ nè foon ɛykokse se kebambo.

³Kenkumtene nchiy-ndaa-Feyin səs kefaa kɛ ke nè luun ɛ wene keghen se jio ɛyghuy; moome benle è se keke ka əmnduŋ mə kenkuo wel. Əbfua əbjim wɛ əb nè luun ɛ jio me kuo.

⁴Nchiy-ndaa-Feyin yɛ əblik əbtal səs kefaa kɛ ke nè luun ɛ wene keghen se jiose nɛ̀ se ntoŋse jio, sé benle se əmnduŋ.

⁵Mɛ yio ka nchiy-ndaa-Feyine yɛ ɛy kiynen se jio sɛ́ ketuu ntiɛ suuyen ge: Wɛ̀ sakmen ɛ titiy, wɛ̀ lu vi wɛ əb luun əblanen, wɛ̀ lu ɛ leenen nɛ wɛ̀ nè se shi.

⁶Ɛ́ nè yuyte ghele Feyin nɛ̀ ghele ntum nə wene, se lu nɛ wɛ̀ fomen əmnduŋ ghene nəə. Ghene kiile nɛ lu ɛynəkse yɛ ghene luun se kiile.

⁷Mɛ me yio giɛ ɛylee nɛ ɛy gwiye ɛ ketatane ntaŋle suuye ge: Bay Feyin, Wɛ Ba-Əbtaawe-Əbjim, wɛ̀ sɛɛ sak kejuŋ, gese sake ɛ titiy.

⁸Nchiy-ndaa-Feyin yɛ əblik əbkɛɛk səs kefaa kɛ ke nè luun ɛ wene keghen ɛ chuy, ɛ́ vəse chuy nyok ghel nɛ̀ kenkfəm kebee.

⁹Kenkfəme kɛ́ tene nè nyok ghel, ghene lòò è se tɛyle Feyin Fɛ Fe kiin əbtaawe se make ngɛk nɛ̂ shin, dî ghene jia kubsen tetem se yɛ foo ɛykokse se Feyine.

¹⁰Nchiy-ndaa-Feyin yɛ əblik əbtan səs kefaa kɛ ke nè luun ɛ wene keghen se kaba nə nyam əbkwak; mbi fin ɛ kelik kɛ nyam əbkwak nè saken ɛ ten, ghel ɛjime se yio ɛylum toŋe, gese lumle əbleeme ghen.

¹¹Ghene me se tɛyle Feyin fɛ fe luun ɛ ɛyyio, tɛylen bek ka ghene nè yion ɛylum gese ki əblɛɛme ɛ ghene ɛyghun, è chèmè jia se lu se kubsen se fəy se jii sebee.

¹²Nchiy-ndaa-Feyin yɛ əbleŋ ntuufe səs kefaa kɛ ke nè luun ɛ wene keghen se jio ɛyghaken yɛ Yuflet. Jio ten yum se foo jii se tefon tɛ te nè lòòn ɛ ɛybee yɛ chuye sɛɛ too ɛ ten.

¹³Mɛ me yɛn əbyioy əbbee əbtal nɛ əb lu ka əbncham, nɛ əb fəye ɛychio nə keŋaangu ghene nyam əbkwak gese nɛ̀ nfektese əbbuame.

¹⁴Əbyioy əbbee wɛ́ tene nè lu wɛ wel ɛyfim wɛ əb nɛɛyen əbnəə əbchio əbyúméné. Əbyioy wɛ əbtal vin fəymen se baksen tefon tɛ te saken ghel ɛjim ɛ mbi ka ghene baate ghel ɛjim se kelik kemok è noo ɛyghoŋ yɛ yɛ́ kechii ketaa nə Feyine wɛ Ba-Əbtaawe-Əbjim.

¹⁵Báàba me suuy ge: Yɛn-a! Mɛ sasen è gwiy ka əbchoŋ. Ke lu kejuŋ se wel wɛ əb báà se buune, gese toknen nɛ̀ ndəyse wene kejuŋ ka əb jia nɛ̂y yɛ jɛl əbghun əbyum ghuumene.

¹⁶Əbyioy vi nɛy me baate tefon se kelik kemok kɛ ɛ́ toŋten ɛ əblame Heblu ge: Almageddon.

¹⁷Nchiy-ndaa-Feyin yɛ əbleŋ saamba waŋ kefaa kɛ ke nè luun ɛ wene keghen ɛ ɛyyio. Giɛ ɛytaa fəy è gwiy ɛ Feyine kaba ɛ ndaa-ɛykokse ge: Ke kwɛnmen.

¹⁸Mɛ me yɛn ka ɛyghuu liaken, dəmke gese buale nɛ ntiɛ shikene kɛytee, nɛ ɛy nè bɛɛy ghàà yɛ shikene kɛyte ketaan ɛ jii nɛ̂ ghan se kɛ̀ɛ̀tè se ka Feyine nè bomen wele-mesoŋ. Ntiɛ nè shikene naa se ŋaŋ.

¹⁹Ntɛk ɛyghaken nè lô kaken əblik əbtal, ntɛk seghakene sejim ɛ əbtum əbjim bvəəle, Feyine kuume ketum keghakene kɛ Babilon è nɛɛy əb nəə əbbom wɛ əb dinen ɛyyafse ɛytem nə Feyine.

²⁰Əblike ntiɛ wɛ əb nè yɛnsen ɛ jio ɛyghuy lɛy, kfənse buu sɛy.

²¹Əmntiyme me se fɛyke ka ɛtiy ɛghakene, nɛ ɛymoke dile ka kebam ɛsaŋ. Əmtiyme ten nè fɛyke ɛ ghele əbtuu, nɛ ghele tɛyle Feyine bek ge ngɛk yɛ əmntiyme nè gwiyen so nè befe naa se ŋaŋ.