Read Oku Ɛyd 17 Bible Online

Ɛyd 17 - Oku bible

Ɛyd 17

¹Nchiy-ndaa-Feyine ɛylee ɛ məme sɛ saamba sɛ se nè kiin əbghén wɛ saamba gwiy è suuy se mɛ ge: Gwiye é mɛ din se wɛ̀ jii yɛ Feyine náà nəkse kejɛl keghuye kɛ luun ntɛk ɛyghaken yɛ ɛ́ baklen ɛ əbghooye jiose se ɛydio.

²Tefone tɛ ketuu ntiɛ fɛne nè lô chem ɛyjɛl ghene ghe kejɛl keghuuye nɛ̂ kine, ghele ghɛ ntiɛ fɛne nəə əmnduk mə ndee ɛybee nə wen naa əm koo ghene.

³Keyioy ə Feyine liɛ ɛykwaate ə yom, nchiy-ndaa-Feyin yi me ndu nɛ̀ mɛ se əbkwak əbyume, mɛ me yɛn əbvii nɛ əb diom ɛ ketuu nyam əbkwak ɛybaŋen nɛ ɛy ki teghel əbghun əbjim nɛ te tɛylen Feyin. Nyam ten nè ki əbtuu saamba nɛ̀ ndoŋse ɛyvəm.

⁴Əbvii ten nè mak ndəy se baŋene, nɛ ɛ́ chite tol əbghune wen əbjim nɛ̀ ɛytiane, gese nɛ̀ kenloo ɛtiy əbkaa əbtaa, gese nɛ̀ ɛshiɛ baŋe. Nè lu dî nɛ əb ghal əbbom nɛ ɛ́ tio nɛ̀ ɛytiane, nɛ nkfəm gese nɛ̀ əbbee lun ɛ ten, dine nchiinen kenjaŋ nə wen.

⁵Ɛ́ nè lô nyak ɛyghel ɛylee ɛ wen əbyes-ɛshiɛ nɛ wel kewiy kenəə kɛ ɛy dinen. Ɛ́ nè nyak ge: Ketum keghakene kɛ Babilon, no əbjɛl əbjim wɛ əbnəə əbbee əbjime ɛ mbi lòòn se wen.

⁶Mɛ gese yɛn ge əbvii ten nəəmen əmnduŋ mə ghele Feyine əm koo, nɛ̀ gese lu əmnduŋ mə ghel ghɛ ɛ́ nè yuyen bek ka ghene nè nduun ka Jesuse kɛŋen. Mɛ yɛn wen dì è se lu nɛ̀ əbchíò əbyúméné.

⁷Nchiy-ndaa-Feyin bif se mɛ ge: Əbchio yume wɛ̀ bek ghɛ? Mɛ din kenəə kenlete kɛ kum əbvii vin se wɛ̀, gese nɛ̀ kenəə kɛ kum nyam əbkwak yɛ ɛy bɛɛyen wen yɛ ɛy kiin əbtuu saamba nɛ̀ ndoŋse ɛyvəm.

⁸Nyam əbkwak yɛ wɛ̀ kè yɛnen nè lô se lu taa, se lu leenen nɛ ɛy bo bɛɛy wiy. Ɛy shi se lòò se nkweŋ se kok se gwiy nɛ ɛ́ yúy. Ghel ghɛ ɛ́ chiin ɛ ketuu ntiɛ nɛ ɛ́ nè bɛɛy ghàà nyak teghel ə ghen se ŋwaale ɛychii se kɛɛ se kenkɛɛte mbi nɛ̂y yɛ kiye nyam əbkwak nɛ̂ yin lu nɛ əbchio əbyúméné bek ka nyam ten nè luun, se lu nɛ ɛy bo bɛɛy wiy, dî nɛ ɛy náà kase gwiy.

⁹Kine dine ge wel lu se yɛ feesen gese ke əbnəə. Əbtuu nyam wɛ saamba lu kfənse saamba sɛ əbvii vi diom ɛ ten, nɛ ko gese lu tefon saamba.

¹⁰Tɛ tetane nè kuomen, nɛ wɛ əbmok bo sake, nɛ̀ wɛ əbmok bɛɛy ghàà yɛnsen. Əb nɛ̂y yɛnsen è yɛ lu se sak kɛn se əbliy se ɛylaay.

¹¹Nyam əbkwak yɛ ɛy nè luun ɛytaa, è kase jia se lu, lu əbfon wɛ ge ɛyfaame se gise se tefon tɛ saamba, nɛ əb se nduu kɛn bene ɛ́ yúy.

¹²Ndoŋse ɛyvəm sɛ wɛ̀ kè yɛnen lu tefon ɛyvəm tɛ te bɛɛy ghàà kɛɛte se yɛ sak, dî nɛ ɛ́ nɛ̂y fo əbtaawe é ghene ghe nyam əbkwak sak ka tefon se chuy ɛymok.

¹³Tefon nɛ̂ tin ki ɛykwaate ɛymok, nɛ ghene náà fo kediak nɛ̀ əbtaawe ghene se nyam əbkwak.

¹⁴Ghene náà noo Wan-njiɛ, dî nɛ Wan-njiɛ ghene ghɛ ɛ́ nè jaŋen, ghii dii ghɛ ɛ́ nè choken, ɛ́ se jumte wen nɛ̀ ɛyteme, nɛ̂y noo è yiɛ ghene bek ka əb luun Báàba ə báàbase, gese lu əbfone tefon.

¹⁵Nchiy-ndaa-Feyin yi gese suuy se mɛ ge: Jio sɛ wɛ̀ kè yɛnen nɛ əbvii əbjɛlene diom ɛ ten lu əbtum, nɛ̀ tenkii ghele, nɛ̀ tekfəə, gese nɛ̀ telame.

¹⁶Nyam əbkwak yɛ wɛ̀ kè yɛnen nɛ̀ ndoŋse ɛyvəm, nɛ̂y yɛ bane əbvii əbjɛlen vi. Ghene nɛ̂y fii əbfua əbjim wɛ əb kiin é əb yɛ lu kenchokele. Ghene nɛ̂y kfəl njia əbghun nə wen è nyok wen nɛ̀ əbvəse.

¹⁷Ke lu dî bek ge Feyine nɛɛymen ɛyteme se lume ge ghene yɛ nɛɛy əbnəə wɛ yi kɛŋen se kefaa kemok, gese foo əbtaawe se nyam əbkwak ge ɛy yɛ sak se chin se ka giɛse Feyine yî yɛ lu selunsen.

¹⁸Əbvii wɛ wɛ̀ kè yɛnen lu ntɛk ɛyghuy yɛ əbfone tene saken tefone tɛ́ ketuu ntiɛ.