Read Oku Ɛyd 18 Bible Online

Ɛyd 18 - Oku bible

Ɛyd 18

¹Se ɛybame ten mɛ yɛn nchiy-ndaa-Feyin ɛylee nɛ ɛy səəke gwiye ɛyyio. Ɛy nè ki əbtaawe əbghuye bane kaake ketuu ntiɛ kejim.

²Ɛy toŋ ɛ giɛ ɛytaa ge: Babilon əbghuy fɛymen! Əb fɛymen! Fo shi kelik kɛ ɛyfime bɛɛn ɛ ten, nɛ lu bene fɛ əbyioy əbbee əbjime chiin gese nɛ̀ tenkii əmnən əmbee.

³Ke lu dî bek ge əbtum əbjime nəəmen əmnduk mə wen mɛ luun mɛ̂ nseemese kenjaŋ. Tefone tɛ́ ketuu ntiɛ fɛne shi ɛykon ɛ ketuu nɛ̀ əbvii wɛ̂ ten, nɛ ghel əbwɛye ghɛ́ mbi fɛne kuymen bek əbkaa wɛ əb foon se ghene bek shii wɛ əb kiin se kenyiim.

⁴Mɛ gese yio nɛ giɛ ɛylee gwiye ɛyyio suuy ge: Ghel ə ghome, ghɛn fəy se Babilon, ghɛn fəy se wene məm fɛ ghɛn baa nɛɛy mbee ka əb nɛɛyen, è yio ɛylum yɛ əb yion.

⁵Mbeese wene yommen əbghun è kok è kum ɛyyio. Feyine náà kuume mbeese wen se nəkse wen.

⁶Ghɛn yɛ lu se seese əbnəə wɛ əb nɛɛyen se ghɛn kɛn ghɛɛ-ghɛɛ è yɛ lu naa se seese kaŋ ɛbaa chia ka əb nè nɛɛyen. Ghɛn vii əmnduk ɛ wen əbbom nɛ əm taa naa se ŋaŋ chia mɛ əb nè siysen se ghɛn.

⁷Ghɛn fó ngɛk se wen, è nɛɛy é əb yɛ yio ɛylum kɛn ɛ əbfek wɛ əb nè yion əbjuŋ ɛ ten. Bek ge əb ghaŋse əbghun ɛ wen ɛytem suuy ge: Mɛ diom fɛn ka no əbfon. Mɛ báà se lu wiy-nkfə. Nɛ mɛ jia yî yɛn ngɛk.

⁸Lu bek kii nɛ̂ kine kɛ Feyine náà mak teyaf é te mɛyse wen kɛn se kechii. Kendəme yî gwiy, é ɛytoŋe gwiy; é jeŋ gese koo. Feyine yî nyok wen ɛ əbvəs. Bek ge Báàba Feyin wɛ əb yî sak wen lu vi wɛ əb ngaŋten chian ɛjim.

⁹Ɛ́ yî yɛ lu ka tefone tɛ mbi fɛne tɛ te nè shiken kenjaŋ se wen nɛ ghene ghene yiɛ əbghun yɛne ka felik əbvəs wɛ ntɛk ɛyghuy nɛ̂ yine fuon ɛ tene loolen, é ghene me yɛ səkse əmshiɛ, toŋnene.

¹⁰Ghene náà yɛ tiy naa əbtəm bek ka ghene fanen se yɛn sɛy ngɛk yɛ əb yɛnen. Tiy dì suuy ge: Ke befe, ke bɛme. Ntɛk ɛyghuy yɛ Babilon, ntɛk ɛytaa! Feyine mɛysemen wɛ̀ kɛn se əbliy.

¹¹Ghel ghɛ ɛ́ bɛ́ɛ́len əbwɛy ɛ mbi fɛne náà yɛ toŋ gese jɛflee bek ka wel bo bɛ́ɛ́yen wiy wɛ yun əbfua əbwɛy nə ghen.

¹²Wel bɛɛy wiy se yun ɛytian ə ghen, nɛ̀ kekas əbkaa, ɛtiy əbkaa əbtaa, əbfua kendoŋ, kenlaŋlaŋ, ndəy se baŋene, fenchii tenkii tejim, bèè, əbfua əbjim wɛ ɛ́ fɛlen ɛ ɛsoŋe ketam, nɛ̀ wɛ ɛ́ fɛlen ɛ əmkakme əbkaa əbtaa, nɛ̀ ɛytiane, nɛ̀ əbkase, gese nɛ̀ ɛytiye kengwɛle.

¹³Wel bo bɛɛy wiy se yɛ yune felum ə ghen, nɛ̀ əbfua əbləktene əblee; nɛ̀ kelɛye ɛ tenkii tenkii, nɛ̀ əmndukme, nɛ̀ əmngvəlme, nɛ̀ əmkfəŋme, nɛ̀ ɛsaŋe, nɛ̀ nyamse na ghene bvəyse-njiɛ, nɛ̀ nyamse fenkoke, nɛ̀ tekal tɛ se gufen, bo bɛɛy wiy se yun əbkos, gese wiy se yune wel naa ghɛy.

¹⁴Ghel ɛybɛɛle əbwɛye náà suuy se Babilon ge: Əbfua əbjime wɛ wɛ luŋen se yɛ ki di buumen, ɛykɛŋe yiɛ ghene əmngone viɛ buu, nɛ wɛ jia bo yi gese yɛn əbghene ghɛy.

¹⁵Ghel ɛybɛɛle əbwɛy ghɛ ɛ́ nè kiilen əbkaa bek ka ɛ́ nè bɛ́ɛ́len ɛ ntɛk fô náà teem əbtəm bek ka ghene fanen se yɛn sɛy ngɛk yɛ əb yɛ́nen. Ghene náà yɛ diy gese toŋe suuy ge:

¹⁶Ke befe, ke bɛme se ntɛk ɛyghuy yɛ ɛy nè yese lafen ɛ ndəy sejuŋe, nɛ̀ sɛ se baaŋen baaŋen, nɛ̀ sɛ ɛ́ siysen lɛ kejuŋ, əb vii əbfua se əbghun nɛ ɛ́ tio nɛ̀ ɛytiane, gese nɛ̀ kenloo ɛtiy əbkaa əbtaa, è gese vii ɛshiɛ baŋ.

¹⁷Əbghaake wen nɛ̂ vin dì sasenmen è lɛy kɛn se keleŋ əbliy! Ɛbaa əbnək, nɛ̀ ghel ghɛ ɛ́ jɛ́len ɛ əbnək, gese nɛ̀ ghel ghɛ ɛ́ gufen əbnək, gese nɛ̀ ghel ghɛ jii ɛykɛŋ nə ghene luun ɛ jio ɛyghuye náà teem ɛ əbtəm,

¹⁸è yɛ kiy ka ntɛke tene fuon nɛ felike loolee, ghɛyte ge: Ntɛke jia bo yî yɛ lu ka ntɛk ɛyghuy yin.

¹⁹Ghene náà yɛ biŋle ɛ kebvəl, diye gese toŋe ge: Ke befe, ke bɛme se ntɛk ɛyghuy yɛ ghel ghɛ ɛ́ kiin əbnək ɛ jio ɛyghuy nè kiilen əbghaake se wen. Əb sasenmen è se lu kefaa lólò kɛn se keleŋ əbliy.

²⁰Ghɛn ghɛ ɛ́ luun ɛ ɛyyio yɛ saŋle, ghɛn yɛ saŋle ghele Feyine, é ghɛn yɛ saŋle ghɛ́ ntume. Ghɛn yɛ saŋle bek ka Feyine benenmen nsak ə yɛn è mak ngɛk se wene ketuu.

²¹Nchiy-ndaa-Feyin ɛytaa me lose lum ɛytiy ka ɛytiye keban, è mak ɛ jio ɛyghuy è suuy ge: Lɛɛ ka ɛ́ yî mak ntɛk ɛyghuy yɛ Babilon se ntiɛ nɛ̀ kediake, é wel jia bo yî yɛn ɛyghen.

²²Wele jia bo yî yio kebin kɛ ghɛ́ teluŋe, nɛ̀ ghɛ́ nyofe, nɛ̀ ghɛ́ ndoŋsee; nɛ̀ ghɛ́ tesoŋe nè buken ɛ məm nə wɛ̀. Wel wɛ fɛl náà ɛynkii kefaa kekɛ nɛ̀ keghoo jia bo yî yɛ lu ɛ wɛ̀ məm. Wel cheme jia bo yî yio ka ɛytiye kebane kumen. Wel wɛ fɛl naa ɛynkii kefaa kekɛ nɛ̀ keghoo jia bo yî yɛ lu ɛ wɛ̀ məm.

²³Kekaakene jia bo yî ban ɛ Babilon ghɛy, nɛ ɛ́ jia bo yî yio ka lum jen ghene jene suŋnen gho. Ghel ɛybɛɛle əbwɛy nə wɛ̀ nè lu ghel ɛtaa ɛ mbi ɛyjim. Wɛ̀ nè lɛɛse mbi ɛyjim nɛ̀ ɛyfime yiɛ.

²⁴Ɛykuo ghele ntum nə Feyine gese nɛ̀ ghel ə Feyine ɛlee ghɛ ɛ́ nè yuyten ɛ mbi fɛn lu ɛ keghoo nə wɛ̀ Babilon.