Read Oku Ɛyd 19 Bible Online

Ɛyd 19 - Oku bible

Ɛyd 19

¹Se ɛybame ten, mɛ yio giɛse nɛ lu dî ka kóò feliɛ wel ɛ ɛyyio suuy ge: Ghɛsen yɛ kokse Feyin! Lu wen Feyin ə Fɛsen Fɛ Fe boysen ghel; əbghaake nɛ̀ əbtaawe lu wɛ́ wene,

²bek ge əb sake ghel nɛ̀ əbluuye gese sake ɛ titiy. Əb makmen ngɛk ɛ ketuu nə kejɛl keghuuye kɛ ke nè besen mbi nɛ̀ ɛychii kenjaŋe. Feyine sakmen wen è mak ngɛk se wene ketuu bek ka əb nè yúyten ghel ɛyfɛl nə wen.

³Feliɛ wel fii gese zəəme suuy ge: Ghɛsen yɛ kokse Feyin. Felik fɛ ntɛk ɛyghuy yɛ Babilone fuon nɛ fe loole jia bo yî tenen.

⁴Chɛɛ sɛ njio sekɛɛk əmbaa ghene ghe əbfua wɛ əbkɛɛke təm ɛləy è se foo ɛykokse se Feyine nɛ əb diom ɛ kaba. Ghene nè kokse wen suuye ge: Amen! Ɛ́ yɛ kokse Feyin!

⁵Giɛ gwiy ɛ kaba suuye ge: Ghɛsen yɛ kokse Feyin ə Fɛsen, ghɛn ghɛ ghel ɛyfɛl nə wen ɛjim. Ghel ɛjim ghɛ ɛ́ fanen wen, kene ɛghakene, kene ɛtɛlɛɛ, wel əbjim fó ɛykokse se wen.

⁶Mɛ gese yio giɛse nɛ lu dî ka kóò feliɛ wel nɛ fe buu ka ɛyfɛy ɛyghuye, gese buale ka ɛyghuu suuye ge: Ghɛsen yɛ kokse Báàba wɛ Feyine Fɛsen Wɛ Ba-Əbtaawe-Əbjim, lu wen əbfon.

⁷Ghɛsen yɛ saŋle gese yio əbjuŋ. Ghɛsen yɛ kokse wen, foo ɛygvəmle se wen bek ka əbliye əbjen nə wan-njiɛ kwɛnmen, nɛ jen wɛ wɛ̂ ə wen baatemen ngeŋ ə wen se ten.

⁸Ɛ́ fomen ndəyse se wen ge əb mak nɛ se laane, gese njantee. Ndəyse nɛ̂ shine lu əbnəə wɛ titiy wɛ ghel ə Feyine nɛɛyen.

⁹Nchiy-ndaa-Feyin yi suuy se mɛ ge: Nyake kine ge: Ke lu Kejuŋ se ghel ghɛ ɛ́ jaŋen ghene se əbjen nə wan-njiɛ. Ɛy gese suuy ge: Shine lu giɛse əbluuy nə Feyine.

¹⁰Mɛ me təm ɛləy ɛ wen ɛyshiɛ se yɛ kokse wen. Əb suuy se mɛ ge: Ghàà mom, mɛ lu sɛy wel ɛyfɛl kɛn ka ghɛne ghone-nyii ghɛ ɛ́ tiyen ɛ əbluuy wɛ Jesus nè dinen. Yɛɛ kokse nɛ lu Feyin bek ge əbluuy wɛ Jesus nè dinen lu kefaa kɛ ke banlen ghele ntum nə Feyine ka ɛ́ yɛ teefe ntum Feyin.

¹¹Mɛ me yɛn əbchio ɛyyio əb disen nɛ nyam fenkok ɛyfəfen tiy fo. Wel nè lu ɛ ketuu ten nɛ ɛ́ toŋte ge: Wel wɛ əb foon ɛytem è se fɛle nɛ̀ əbluuye. Əb tenen nsakse gese təme ɛyghoŋ ɛ titiy.

¹²Ɛshiɛ ə wene nè njantee, bane ka keleeme əbvəs, nɛ əb sooy əbfole tefon se ɛydio ɛ wene ketuu. Əb nè ki ɛyghel nɛ ɛ́ nyak ɛ wen əbghun nɛ wel ke wiy, buu kɛn wen.

¹³Əb nè mak ndəyse nɛ ɛ́ chəə se əmnduŋ, nɛ ɛyghel ə wene lu ge: Giɛ ə Feyin.

¹⁴Ghel ɛyghoŋe ghɛ ɛyyio se nduu ɛ wen ɛybam ɛ ketuu nyamse fenkok nɛ ɛ́ mak ndəyse nɛ se fəfe fəfen gese laane.

¹⁵Fiak əblee fəy ɛ wen əbchio tofe ge, nɛ lu wɛ əb nɛ̂y koo əbtum so. Əb nɛ̂y yɛ sake ghene nɛ̀ mbàŋe kekas. Əb nè yɛn ghene ka ɛ́ jɛɛlen əmtam se nɛyte əmnduk. Kine lu se din ɛyyafse ɛytem nə Feyine Wɛ Ba-Əbtaawe-Əbjim.

¹⁶Ndəy sɛ əb nè maken nɛ̀ lu nɛ ɛ́ nyak ɛ ten ge: Əbfone tefon, nɛ̀ Báàba se báàbase.

¹⁷Mɛ me yɛn nchiy-ndaa-Feyin nɛ ɛy tiy ɛ ɛyyio ɛ chuy. Ɛy jaŋ è suuy ɛ giɛ ɛytaa se əmnən əbjim mɛ əm tanen naa ɛyyio ge: Ghɛn kaame é Feyine fó ntal ə wen ɛyghaken se ghɛn.

¹⁸Ghɛn gwiy è kfəl nyam yɛ luun njia əbghun nə tegvəne tefone, nɛ̀ njia əbghun nə tegvəne əbtuu ɛyghoŋe, nɛ̀ njia əbghun nə tegvəne ghel ɛyghoŋe, nɛ̀ njia əbghun nə nyam sɛ luun nyamse fenkok, nɛ̀ njia əbghun nə ghel ghɛ ɛ koken se ghene. È kfəl nyam yɛ luun njia əbghun nə ghel ɛjime, kene lu əbkos, kene wiy əbkos, kene lu ɛghakene kene lu ɛtɛlɛɛ.

¹⁹Mɛ me gese yɛn nyam əbkwak ɛybee yi ghene tefone tɛ́ mbi fɛne nɛ̀ ghel ɛyghoŋ nə ghene, nɛ ɛ́ chinten se yɛ noo wel wɛ əb koken nyam ɛyfəfen ghene ghɛ́ ɛyghoŋ nə wene.

²⁰Ɛ́ me koo nyam əbkwak ɛybee yi ghene nfekte əbbuam yɛ ɛy nè nɛɛyen əbnəə əbchio əbyúméné ɛyshiɛ nə nyam nɛ̂ yi. Nè lu nɛ̀ əbnəə əbchio əbyúméné nɛ̂ vine wɛ əb nè lɛɛsen ghel ghɛ nè kiin əbchəysene nyam əbkwak, foo ɛykokse se kebambo nyam əbkwake. Ɛ́ koo ghene dî, è ndu è mak ɛtaa se kemboo əbvəs kɛ luun kefuu əbvəs kɛ ke baalen.

²¹Ɛ́ mɛyse yuyte ghɛ́ ɛyghoŋ nə ghene nɛ̀ fiak wɛ əb fəyen ɛ əbchio nə wel vi wɛ əb koken nyam fenkok. Əmnən əbjim chok mbas ɛyjim yɛ nè lòó ghene chok ɛ ghene ɛyghun.