Read Oku Ɛyd 2 Bible Online

Ɛyd 2 - Oku bible

Ɛyd 2

¹Əb me suuy se mɛ ge: Nyake ŋwaale se nchiy-ndaa-Feyine yɛ̂ kenchintene ghel ɛbeemene kɛ́ Ɛfesose ge: Ntum yin lòò se mɛ wɛ mɛ ghalen əmnjes saamba ɛ mɛ keghoo kɛ əbkoy əbtaa, è se ghanle ɛ məme əbtiɛ əbkaaken wɛ saamba wɛ ɛ́ fɛ́len nɛ̀ ɛytiane.

²Mɛ ke ɛyfɛl ə yɛn, ke ka ghɛn nè kulen ɛytem è se fɛle ketaan. Mɛ ke ge lòó ghɛn jia vəse ghel ɛbee ɛ́ yɛ kal ɛ ghɛne məm, gese ke ge ghɛn momen ghel ghɛ ɛ́ been ge ghene lu ghɛ́ ntume dî wiy, è yɛn nɛ ghene lu ghel əbbuam.

³Mɛ ke ge ghɛne kule ɛytem yɛne ngɛk bek mɛ dî bole wiy.

⁴Dî nɛ kenəə kɛ mɛ kiin kum ghɛn lu ge: Ghɛn bo koŋe wiy mɛ ka ghɛn nè koŋen se mbiy.

⁵Ghɛn kó kuume ka ghɛn nè taan se geese fɛy. Ghɛn kubsen tetem ə tɛn è yɛ nɛɛy ɛyfɛl yɛ ghɛn nè nɛɛyen se mbiy. Ghɛn loo lu è jia kubsen tetem ə tɛn é mɛ gwiy è chakse ketiɛ kekaaken nə ghɛn se bene fɛ ke luun.

⁶Dî nɛ mɛ koŋe ghɛn se kenəə kejuŋe kɛ ghɛne nɛɛyen, ghɛne bane ghel ghɛ ɛ́ jumten jiise Nikolas kɛn ka mɛ banen.

⁷Ghɛn ghɛ ɛ́ kiin əbtuule yio kenəə kin kɛ keyioy ə Feyine suuyen se əbnone ghel ɛbeemene. Ghel ghɛ ɛ́ náà yiɛ ɛyghoŋ lu nɛ mɛ náà fo əbtaawe é ghene yɛ yiɛ əmtame fekak fɛ fe foon ɛychii, kuye ɛ kelik nə Feyine.

⁸Əb gese suuy se mɛ ge: Nyake ŋwaale se nchiy-ndaa-Feyine yɛ̂ kenchintene ghel ɛbeemene kɛ́ Smilna ge: Ntum yin lòò se mɛ wɛ mɛ luun Kenkɛɛte gese lu Kenləysen, wɛ əb nè kuon, è kase loole.

⁹Mɛ ke ngɛk sɛ ghɛne yɛ́nen, ke ge ghɛne tane, dî nɛ ghɛn lu ghel ɛghakene. Mɛ ke əbnəə əbbee wɛ ghel ghɛ ɛ́ been ge ghene lu ghele Juus dî wiy, suuyen ɛ ghɛn əbghun, dî nɛ ghene lu ghele ngoo nə Satan.

¹⁰Ghàà ghɛn yɛ fane ngɛk sɛ se shiin se gwiy se ghɛn. Yɛn-a! Satan shi se nɛɛy ge ɛ́ koo ghɛn ɛlee è vii se nchak, ɛ́ momse ghɛn è nəkse ghɛn se əbchii ɛyvəm. Chèmè lu nɛ ɛ́ yúy ghɛn yúyén, ghɛn yɛ foo ɛytem se mɛ é mɛ nɛ̂y fo əbmakte se ghɛn nɛ lu ɛychii yɛ ɛy jia náà mɛy.

¹¹Ghɛn ghɛ ɛ́ kiin əbtuule yio kenəə kɛ keyioy ə Feyine suuyen se əbnone ghel ɛbeemene. Naa ndɛ wɛ əb yî yiɛ ɛyghoŋ nɛ̂ yin jia yî kuo ge kaŋ ɛbaa.

¹²Əb gese suuy se mɛ ge: Nyake ŋwaale se nchiy-ndaa-Feyine yɛ̂ kenchintene ghel ɛbeemene kɛ́ Belgamume ge: Ntum yin lòò se mɛ wɛ mɛ kiin fiake tebee tebaa nɛ əb tofen ge:

¹³Mɛ ke ghaa ghɛne chiin, nɛ lu ghaa ntoke Satan luun. Ghɛn lu nɛ ɛ́ samse mɛ, nɛ ghɛn nè bɛɛy ghàà gok se fo ɛytem se mɛ. Chèmè nè lu əbliy wɛ ɛ́ nè yuyen Antibas ɛ ghɛne ntɛk ghaa Satane chiin, yuye dì nɛ lu wel wɛ əb nè suŋnen əbluuy wɛ kum mɛ, fene ghɛn nè báà gok se fo ɛytem san.

¹⁴Dî nɛ əbnəə wɛ mɛ kiin kum ghɛn lu ge: Ghel ɛlee lu ɛ ghɛne məm ghɛ ɛ́ jumten ɛyyiɛke Balaam wɛ əb nè dinten se Balak ka lòó əb nɛɛy é ghele Islaele yɛ nɛɛye mbee, yiɛ əbfua wɛ ɛ́ chiysen əmnyin so, gese chii ɛychii kenjaŋ.

¹⁵Lu kɛn ka ghel ɛlee ko se luun ɛ ghɛne məm ghɛ ɛ́ jumten ɛyyíɛ́ke Nikolas.

¹⁶Ghɛn kubsen tetem ə tɛn, buu dî, é mɛ gwiy è noo ghel nɛ̂ ghi nɛ̀ fiake tebee tebaa wɛ əb fəyen ɛ mɛ əbchio.

¹⁷Ghɛn ghɛ ɛ́ kiin əbtuule yio kenəə kɛ keyioy ə Feyine suuyen se əbnone ghel ɛbeemene. Ghel ghɛ ɛ́ nɛ̂y taa è chia lu nɛ mɛ naa ŋokte əbfua-əbyíɛ́ne wɛ əb lòòn ɛ ɛyyio wɛ ɛ́ letemen è fo se ghene. Mɛ náà fo sɛy ɛtiy ɛfəfene se ghene nɛ ɛ́ nyakmen ɛyghel ɛyfɛɛ ɛ ten nɛ wel ke wiy buu kɛn wel wɛ əb fiin yɛ́ wene.

¹⁸Əb gese suuy se mɛ ge: Nyake ŋwaale se nchiy-ndaa-Feyine yɛ̂ kenchintene ghel ɛbeemene kɛ́ Tiatila ge: Ntum yin lòò se wan ə Feyin, wɛ ɛshiɛ ə wene liaken ka keleeme əbvəs, nɛ ɛvəə wene njante ka kesaa kɛ ɛ́ nyoken kejuŋ.

¹⁹Mɛ ke ɛyfɛl ə yɛn, ke ɛykoŋ yɛ ghɛn kiin, ke ka ghɛn foon ɛytem se mɛ, è se kule ɛytem fɛle se ghele. Mɛ ke ge ghɛne fɛle ɛ leenen chia ka ghɛn nɛ̀ fɛ́len se mbiy.

²⁰Dî nɛ kenəə ke mɛ kiin kum ghɛn lu ge: Ghɛn vəsemen əbvii vi wɛ ɛ́ toŋten ge Jezebel, wɛ əb been ge yi lu wele ntum nə Feyine, əb se lɛɛse ghel ɛyfɛl nə mɛ nɛ̀ ɛyyiɛke wene ge ghene yɛ jaŋe kenjaŋ gese yíɛ́ əbfua-əbyíɛ́ne wɛ ɛ́ chiysen əmnyin so.

²¹Mɛ nè lômen fo əbliy se wen ge əb kubsen se əbnəə əbbee, dî əb jia se koŋe se maaye ndee kenjaŋ nə wen nɛ̂ yi.

²²Yɛn-a! Mɛ nɛ̂y mak ɛyyaf se wen əbghun, é əb gok ɛ əbkun, é mɛ mak ngɛk se ghel ghɛ ghene nè jaŋen wen é ghene yɛ yio ɛylum, báà buu ge ghene vəse ndee ɛybee nɛ̂ yin.

²³Mɛ nɛ̂y yuyté ghel ɛyfɛl nə wen, é əbnchintene ghel ɛbeemene əbjime keele ge lu mɛ wɛ mɛ keen əbnəə əbjim wɛ əb luun ɛ ghele tetem gese nɛ̀ wɛ ghene kwaaten. Mɛ nɛ̂y yɛ foo naa ghɛ se wel kɛn ɛ jii yɛ ŋwɛl nè fɛ́len ɛ ten.

²⁴Dî nɛ se ghɛne ghɛ́ Tiatila ɛlee ghɛ ɛ́ nè báà jumte ɛyyíɛ́ke ɛybee nɛ̂ yin, è jia yiɛke əbnəə wɛ ghel ɛlee toŋten ge: Chəm kenlete nə Satan, mɛ se suuy se ghɛn ge mɛ jia nɛ̂y kokse kediile kelee ɛ ghɛne ketuu.

²⁵Ghɛn loote ghal ɛybeeme yɛn ketaan se chin se əbliy wɛ mɛ nɛ̂y kase gwiy.

²⁶Wel wɛ əb náà yiɛ ɛyghoŋ è gese yɛ nɛɛy kenəə kɛ mɛ kɛŋen se chin se kenləysen, lu nɛ mɛ nɛ̂y fo əbtaawe se wen é əb yɛ sak əbtum əbjim so;

²⁷nɛ̀ əb náà yɛ sake ghene nɛ̀ kediak kɛ mɛ nè fiin se ba ə wom, è yɛ bvəəke ghene ka ɛ́ bvəəke ntone kechak nɛ̀ mbàŋ.

²⁸Mɛ nɛ̂y fo fenjese fɛ bvəse bvəse se wen.

²⁹Ghɛn ghɛ ɛ́ kiin əbtuule yio kenəə kɛ Keyioy ə Feyine suuyen se əbnone ghel ɛbeemene.