Read Oku Ɛyd 20 Bible Online

Ɛyd 20 - Oku bible

Ɛyd 20

¹Mɛ me yɛn nchiy-ndaa-Feyin ka ɛy səəke gwiyen ɛ ɛyyio nɛ ɛy ghal kenchok kɛ ɛ́ disen nkweŋ so, gese ki nchak nɛ ɛyghake ge.

²Əb koo keŋaangu kɛ luun yio ɛyməə yɛ ɛyghele luun sɛy Kevəŋ, gese lu Satan, è kul nɛ̀ nchakse ke se lu se nguk nkam.

³Əb kul di, è mak se nkweŋ, è tɛk əbchio ten è kum se nɛɛy ge ghàà ke gese lɛɛse ghel buu ge nguk sɛ nkam chia. Nguke sɛ tene yî chia ɛ́ yɛ́ lu se yayte wen se feleeŋese əbliy.

⁴Mɛ gese yɛn kabase nɛ̀ ghel ghɛ ɛ́ diom ɛ ten, nɛ Feyine fomen əbtaawe se ghene ge ɛ́ yɛ sak. Mɛ yɛn sɛy ghel ghɛ ɛ́ nè yúyten bek ka ghene nè fekten əbluuy wɛ Jesus nè dinen gese nɛ̀ giɛse Feyine. Ghene nè báà yi kokse nyam əbkwak è jia kokse kebambo wen, è jia yi beeme ge ɛ́ nyak əbchəysene nyam əbkwak ɛ ghene əbyes-ɛshiɛ nɛ̀ se ghene ɛghoo. Ghene nè lô loole se ɛykuo, ghene ghe Christ sak se ngukse nkam.

⁵Kembɛke ghel ghɛ ɛ́ nè kuonmen náà loole se ɛykuo nɛ ngukse nkam chiamen. Kii nɛ̂ kine lu ɛyloole yɛ́ mbiye se ɛykuo.

⁶Njuŋ nɛ̀ mbonen lu se ghel ghɛ ɛ́ loolen se ɛykuo ɛ ngoo yɛ mbiy yin. Ghene jia bo yî kuo ge kaŋ ɛbaa. Ghene nɛ̂y yɛ lu ghele ntaŋle nə Feyine ghene Christ, é ghene ghe Christ sak se ngukse nkam.

⁷Ngukse náà chia nkam é Feyine fəyse Satan se nchak,

⁸é əb fəy è yɛ jɛle lɛɛse ghel ɛ tebuulese mbi tejim, dii ɛ Gog ghene ɛ Magog. Satane nɛ̂y baate ghene naa se ɛydio ka kesɛsɛy əbghooy jio, é ghene shik ɛyghoŋ.

⁹Ghɛ́ ɛyghoŋ nɛ wen nɛ̂ ghii nè lô saanken mbi ɛyjim, è kal è tas ntɛk bene ghel ə Feyine nè bɛɛn, nɛ lu ntɛk yɛ Feyine nè koŋen. Dî əbvəse səəke è gwiy ɛ ɛyyio, è mɛyse ghene mɛysen.

¹⁰Feyine me mak Satan wɛ əb nè lɛɛsen ghene se kemboo əbvəs kɛ kefuu əbvəse baalen ɛ ten, nɛ lu bene fɛ ɛ́ nè makenmen nyam əbkwak ɛybee yi ghene nfekte əbbuam. Ɛ́ náà yɛ nəkse ghene fo kechii kejim se əbliy wɛ əb jia yî mɛy.

¹¹Mɛ me yɛn kaba əbghuy əbfəfen nɛ Feyine diom ɛ ten. Ɛyyio ghene ntiɛ nè saamemen se wen ɛybee è jia gese se yɛnsene.

¹²Mɛ yɛn ghel ghɛ ɛ́ nè kuonmen, ɛghakene nɛ̀ ɛtɛlɛɛ, nɛ ɛ́ tiy ɛ əbghune kaba. Ɛ́ dise ŋwaalese, è me dise ŋwaale ɛylee nɛ lu ŋwaale ɛyboy. Əb me se sake ghel ghɛ ɛ́ nè kuonmen ghi, kiye əbnəə wɛ ghene nè nɛɛyen nɛ lu ɛ ŋwaalese fô bene ɛ́ nè nyaken.

¹³Ghel ɛkuone ɛjim ghɛ ɛ́ nè luun ɛ jio ɛyghuy me fəy è gwiy. Ghele loole se ɛykuo, ghɛ ɛylak nə nkfəsayse fəy se fô. Ɛ́ se sake wel əbjim kiye jii yɛ əb nè chiin ɛ ten.

¹⁴Ɛ́ me mak ɛykuo ghene ɛylake nkfəsayse se kemboo əbvəs, nɛ kemboo əbvəs kine lu ɛykuo yɛ kenkumntene.

¹⁵Wel nè loo lu nɛ ɛyghel ə wene báà se lu ɛ ŋwaale ɛychii fɛy, Feyine mak wen se kemboo əbvəs fo.