Read Oku Ɛyd 21 Bible Online

Ɛyd 21 - Oku bible

Ɛyd 21

¹Mɛ me yɛn ɛyyio ɛyfɛɛ nɛ̀ ketuu ntiɛ kefɛɛ, nɛ ɛyyio yɛ̂ mbiye ghene ketuu ntiɛ kɛ́ mbiye saamemen, jio ɛyghuy me buu.

²Mɛ yɛn ntɛk ɛylanen yɛ luun Jolesalem əbfɛɛ nɛ ɛy lòò se Feyine ɛyyio, è se səəke gwiye nɛ ɛ́ siyse è baate ɛy se lu ka jen ɛ lefɛ ɛ́ lafsen əb se nduu se yɛne lum.

³Mɛ yio nɛ giɛ fəye gwiye jii kaba suuy ge: Feyine se chii ɛ ghele məm ɛ leenen. Əb nɛ̂y yɛ chii ghene ghene nɛ ghene lu ghel ə wen. Feyin se wene ngeŋ nɛ̂y yɛ lu ghene ghene è yɛ lu Feyin ə ghen.

⁴Əb nɛ̂y yɛs əmnshiɛ əmjim se ghene ɛshiɛ nɛ ghele jia bo yî yɛ kuo, bo diye wiy; bo toŋe wiy, bo yio wiy ɛylum bek ge əbnəə wɛ mbi yɛ̂ mbiy chianmen.

⁵Wel wɛ əb nè diom ɛ kaba vi me suuy ge: Yɛn-a, kɛ́ ɛ leenene lu nɛ mɛ nɛɛy əbnəə əbjim yɛ lu əbfɛɛ. Əb gese suuy se mɛ ge: Nyake kii nɛ̂ kine bek ge: Giɛ shine lu əbluuy wɛ lòó wel fo ɛytem se ten.

⁶Əb gese suuy se mɛ ge: Ke mɛymen. Mɛ lu Alfa gese lu Omega, dii ge mɛ lu kenkɛɛte gese lu kenləysen. Mɛ nɛ̂y fo moo mɛ̂ ntoŋe jio yɛ ɛy fóon ɛychii se naa ndɛ wɛ kendoŋe moo yumen é əb nəə se lólò.

⁷Naa ndɛ wɛ əb noon è yiɛ nɛ̂y kiile kii nɛ̂ kine se mɛ ka əb əbtik é mɛ yɛ lu Feyin ə wen, nɛ əb lu wán ə wom.

⁸Dî nɛ lu se ghel ghɛ ɛ́ fanen fenfaane, nɛ̀ ghel ghɛ ɛ́ tunsenmen mɛ, nɛ̀ ghel ghɛ ɛ́ tiyen ɛ əbnəə lólò, kene ghel ghɛ ɛ́ yúyten ghel, nɛ̀ ghel ghɛ ɛ́ jaŋen kenjaŋ, nɛ̀ ghɛ́ ɛyfime kene ghɛ ɛ́ koksen əmnyin, kene ghɛ ɛ́ yian əbbuam; kelik ə ghene lu kemboo əbvəs keghuye ghaa kefuu əbvəse baalen, nɛ lu ɛykuo yɛ kaŋ ɛbaa.

⁹Nchiy-ndaa-Feyin yɛ̂ kenləysen se məme sɛ saamba sɛ se nè kiin əbghene ngɛkse gwiy se mɛ è suuy ge: Gwiye, é mɛ din jen se wɛ̀ wɛ luun wiy ə wan-njiɛ.

¹⁰Keyioy Kelanene lii se mɛ ɛytem, nchiy-ndaa-Feyin liɛ mɛ è kok so se ketuu kfən nɛ ɛy diafe ge; è din Jolesalem se mɛ wɛ luun ntɛk ɛylanen nɛ ɛy lòò se Feyine ɛyyio è se gwiye,

¹¹bane nɛ̀ ɛybane Feyine, liake ka ɛynkii ɛtiy ɛlee, njante ka ɛtiy ghɛ ɛ́ toŋten ge jasba gese bane tosen ka kenkiy.

¹²Ntɛke ten nè ki kengɛy keghuye nɛ̀ ɛychio njio-sebaa ɛyvəm nɛ əbchio əbkɛ ki nchiy-ndaa-Feyin yɛ ɛy chiyen, nɛ ɛ́ nyak teghele tekfəə nə ghele Islaele tɛ njio-sebaa ɛyvəm ɛ ɛychio kengɛy fo.

¹³Ɛychio kengɛye nè lu ɛybee yɛ chuye sɛɛ too ɛ ten ɛytal, lu ɛybee ɛykuy ɛytal, lu ɛybee ɛytin ɛytal gese lu ɛybee yɛ chuye sɛɛ sooy ɛ ten ɛytal.

¹⁴Ɛ́ nè bom kengɛye ten ɛ ketuu ketiɛ kɛ ɛ́ nè tiimen nɛ̀ ɛtiy njio-sebaa ɛyvəm, nɛ ɛ́ nyak teghele ghɛ́ ntum nə Wan-njiɛ ghɛ njio-sebaa ɛyvəm ɛ ten.

¹⁵Nchiy-ndaa-Feyine yɛ̂ ten nè ki əbfek ɛ keghoo, mbàŋ nɛ ɛ́ tio nɛ̀ ɛytiane ka ɛ́ foon ge əb fek ntɛke ten so, è fek ɛychio kengɛy, è gese fek əbghune kengɛy.

¹⁶Ntɛk nɛ̂ yi nè kal kɛn ɛyghɛl, dii ge əbghaake nè lu kɛn ka əbdiafe. Ɛ́ fek ɛy fəy tetaŋ kam nɛ̀ ɛyviɛ ɛytane se ɛyghak, nɛ̀ se ɛydiaf nɛ̀ se ɛyngaŋte.

¹⁷Nchiy-ndaa-Feyin yi gese fek kengɛy nɛ̀ əbfeke wele-mesoŋ vii è yɛn nɛ ɛyngaŋte tene lu ka ɛykoy njio-setal əmmtal.

¹⁸Ɛ́ nè bom əbghune kengɛye wɛ tene nɛ̀ ɛtiy ghɛ ɛ́ toŋten ge jasba, è bàklè ntɛke ten nɛ ɛytian nɛ ɛy bane tosen ka kenkiy.

¹⁹Ɛ́ nè vii ketiɛ kengɛye kɛ́ tene nɛ̀ tenkii ɛtiy ɛjuŋe ɛjim. Ɛ́ nè vii ketiɛ kɛ́ mbiye nɛ̀ ɛytiye jasba, è vii kɛ́ kenkumte nɛ̀ ɛtiye Sabfila, è vii kɛ əbleŋ əbtal nɛ̀ ɛtiye agate, kɛ əbleŋ əbkɛɛk nɛ̀ ɛtiye emelalde.

²⁰Kɛ əbleŋ əbtan nɛ ɛtiye Saldonis, Kɛ əbleŋ ntuufe nɛ̀ ɛtiye Kalnelian, Kɛ əbleŋ saamba nɛ̀ ɛtiye Klisolite, kɛ əbleŋ ɛyfaame nɛ̀ ɛtiye Belil, kɛ əbleŋ buumok nɛ̀ ɛtiye Tobaz, kɛ əbleŋ ɛyvəme nɛ̀ ɛtiye Klisedoni, kɛ əbleŋ njio ɛymoke nɛ̀ ɛtiye Jasinte, kɛ əbleŋ njio-sebaa nɛ̀ ɛtiye Ametist.

²¹Ɛ́ nè təm ɛychio kengɛy yɛ njio-sebaa ɛyvəm nɛ̀ tenkii əbfua əbjuŋe njio-sebaa ɛyvəm; nɛyte əbchio kengɛy əbmok nɛ̀ ɛyshiɛ əbfua ɛymoke. Jii sɛ ntɛk foo nè lu nɛ ɛ́ fee kɛn nɛ̀ nkante ɛytian nɛ ɛy bane tosen ka kenkiy.

²²Mɛ nè báà yɛn ndaa-ɛykokse ɛ ntɛk fô bek ge Bay Feyin Wɛ Ba-Əbtaawe-Əbjim ghene Wan-njiɛ nè lu fô əblik əbjim nɛ lu ndaa nɛ̂ yi.

²³Ntɛke ten nè báà se shii ɛyban yɛ ɛy lòòn se chuy ghene njoŋ bek ge ɛybane Feyine nè bane fô nɛ kekaakene ntɛke tene lu Wán njiɛ.

²⁴Əbtum əbjime náà yɛ chii bek ɛyban yɛ ɛy lòòn ɛ ntɛk fo, nɛ tefone tɛ mbi fɛne baate əbghaake ghen fo.

²⁵Ɛychio kengɛye náà yɛ yese tiy ɛyyii əbchii əbjim nɛ ɛ́ tɛkte wiy bek ge kebɛye jia yî fin fô.

²⁶Əbtum əbjime náà yɛ gwiy nɛ̀ əbghaake ghene gese nɛ̀ ɛykɛŋ ə ghene ɛ ntɛk fô.

²⁷Kefaa ɛyliŋe jia yî lii ɛ ntɛk fô, é wel wɛ əb chiin ɛychii ɛybee kene wɛ əb yian əbbuam jia lii. Náà lii kɛn ghel ghɛ ɛ́ nè nyakenmen teghel ə ghen ɛ ŋwaale nə Wan-njiɛ yɛ ɛ́ nyaken teghel ghel ghɛ ɛ́ boyen ɛ ten.