Read Oku Ɛyd 22 Bible Online

Ɛyd 22 - Oku bible

Ɛyd 22

¹Nchiy-ndaa-Feyin yi gese din jio se mɛ yɛ moome ten fóon ɛychii. Jio nɛ̂ yi nè bane ka kenkiy nɛ ɛy fəye ɛyshaa kaba nə Feyine ghene Wan-njiɛ,

²lɛŋe chio ɛ fetetene jii ɛyghakene yɛ̂ ntɛk fo. Əmkak mɛ əm fóon ɛychii nè kuye ɛ teghaŋe jio nɛ̂ fo, kóòm tenkii əmtam njio-sebaa ɛyvəm se nguk, kaŋ ɛymok se njoŋ. Ɛghaa fekak nɛ̂ fi nè lu kefuu se chuk əbtum əbjim.

³Kefaa kɛ ɛ́ liŋenmene jia yî yɛ lu ɛ ntɛk fo. Kaba ə Feyin ghene wan-njiɛ náà yɛ lu ɛ ntɛk fo, nɛ ghel ɛyfɛl nə wene kokse wen.

⁴Ghene náà yɛ yɛn ɛykek ə Feyin nɛ ɛyghel ə Feyine lu ɛ ghene əbyes-ɛshiɛ ka ɛ́ nyaken.

⁵Kebɛye jia bo yî fin fo, nɛ ghene jia bo yî yɛ shii əbkaaken, kene chuy bek ge Bay Feyine náà yɛ lu kekaaken ə ghen é ghene yɛ sak əbfon əbliy əbjim nɛ ɛymɛye wiy.

⁶Nchiy-ndaa-Feyin yi me gese suuy se mɛ ge: Giɛ shine lu əbluuy nɛ lòó wel fo ɛytem se ten. Bay Feyin wɛ əb foon keyioy ə wen se ghɛ ntum nə wene, tumen nchiy ndaa nə wen ge ɛy din é ghel ɛyfɛl nə wene keele əbnəə wɛ əb shiin se gan.

⁷Jesus suuy ge: Yɛn-a! Mɛ shi se gwiy. Njuŋ lu se wel wɛ əb yion giɛ sɛ se fəyen ɛ ŋwaale fɛn lɛme.

⁸Lu mɛ Joon wɛ mɛ yion è gese yɛn əbnəə nɛ̂ vin əbjim. Kè lu ka mɛ kè yion è gese yɛn əbghene əbjim, mɛ təm ɛləy ɛ ɛyshiɛ nə nchiy-ndaa-Feyin yɛ ɛy kè dinen əbghene se mɛ ge mɛ yɛ kokse wen.

⁹Əb suuy se mɛ ge: Ghàà mom, mɛ lu sɛy wel ɛyfɛl kɛn ka ghɛne ghone-nyii nɛ̀ ghele ntume luun, nɛ̀ ghel ɛjim ghɛ ɛ́ yion giɛ sɛ se fəyen ɛ ŋwaale fɛn lɛme. Yɛɛ kokse nɛ lu Feyin.

¹⁰Əb gese suuy se mɛ ge: Yɛɛ ke se lete giɛ sɛ Feyine teefen ɛ ŋwaale fɛn se ghele bek ge əbliye se baksene wɛ əb gan.

¹¹Ke me se lu ge naa ndɛ wɛ əb nɛɛyen mbee yɛ nɛɛye nduu kɛn ɛ mbiy, nɛ naa ndɛ wɛ əb nɛɛyen ngɛk, yɛ nɛɛy nduu kɛn ɛ mbiy, nɛ naa ndɛ wɛ əb nɛɛyen njuŋ yɛ nɛɛy nduu so ɛ mbiy, nɛ naa ndɛ wɛ əb luun əblanen yɛ lu əblanen.

¹²Jesus suuy ge: Yɛn-a! Mɛ shi se gwiy nɛ mɛ nɛ̂y gwiy nɛ̀ əbmakte ə wome se fo se naa ndɛ kɛn ɛ jii yɛ əb nè nɛɛyen ɛ ten.

¹³Mɛ lu wɛ ɛ́ toŋten ge Alfa gese lu Omega, mɛ lu mbiy gese lu ɛybam, dii ge mɛ lu kenkɛɛte gese lu kenləysen.

¹⁴Njuŋ lu se ghel ghɛ ɛ́ suun ndəyse ghen se lan, [ghel ghɛ lɛmen tesak ə wen.] Ghene nɛ̂y chia əbchio kengɛy è lii ɛ ntɛk ka ghene yɛ ki əbtaawe se kfəle fetam fɛ fe lòòn ɛ fekak fɛ fe fóon ɛychii.

¹⁵Dî nɛ ghel ghɛ ɛ́ goken ɛ bɛy lu ghel ghɛ ɛ́ nɛɛyen ka buose, nɛ̀ ghɛ ɛ́ fiɛŋen ɛyfuu, nɛ̀ ghɛ ɛ́ jaŋen kenjaŋ, nɛ̀ ghɛ ɛ́ yúyten ghel, nɛ̀ ghɛ ɛ́ koksen əbnfeksene əbfua, nɛ̀ ghɛ ɛ́ yian əbbuam, gese nɛ ghɛ ɛ́ koŋen se yɛ lɛɛse ghel.

¹⁶Mɛ wɛ Jesus tumen nchiy-ndaa nə mɛ ge ɛy fekte əbnəə nɛ̂ vin se kenone ghele Feyine. Mɛ lu ɛyghaŋ yɛ ɛy nè kɛɛten ɛykfəə David, gese lu fenjese fɛ bvəse bvəse nɛ fe loote bane.

¹⁷Keyioye ghene jen suuye ge: Gwiye. Naa ndɛ wɛ əb yion kine ko lu se suuy sɛy ge: Gwiye! Naa ndɛ wɛ kendoŋe moo yumen wen gwiy, nɛ naa ndɛ wɛ əb kɛŋen moo gwiy è nəə moo mɛ əm fóon ɛychii se lólò.

¹⁸Mɛ wɛ Joon me se tefe wel əbjim wɛ əb yion giɛ sɛ Feyine teefen ɛ ŋwaale fɛn ge: Loo lu wele gise kenəə se ten é Feyine nɛ̂y gise ngɛkse wen nɛ̀ sɛ ɛ́ dinen ɛ ŋwaale fɛn.

¹⁹Yɛ lu ge wel fafte kenəə se giɛse əbluuy sɛ se luun ɛ ŋwaale fɛn, é Feyine náà fii mɛ̂ wen mɛ əmtame fekak fɛ fe fóon ɛychii, è gese buuse sɛy kelik ə wen ɛ ntɛk ɛylanen yɛ ɛ́ chioten ɛ ŋwaale fɛn.

²⁰Wel wɛ əb nè yɛnen əbnəə vin əbjime suuy ge: Yibɛy, mɛ shi se gwiy. Ke yɛ lu di! Báàba Jesus gwiye.

²¹Báàba Jesus ko cham ɛysen se wel əbjim.[1]