Read Oku Ɛyd 3 Bible Online

Ɛyd 3 - Oku bible

Ɛyd 3

¹Əb gese suuy se mɛ ge: Nyake ŋwaale se nchiy-ndaa-Feyine yɛ̂ kenchintene ghel ɛbeemene kɛ́ Saldise ge: Ntum yin lòò se wel wɛ əb kiin əbyioy ə Feyin wɛ saamba gese nɛ̀ əmnjes mɛ saamba. Mɛ ke ɛyfɛl ə yɛn. Ghɛne yɛnsen dî-a ka ghɛn lu ɛtaa, dî nɛ ghɛne kuomen.

²Ghɛn kamke, è yɛm ɛyteme yɛ́ ghɛye yɛ ghɛn foon se Feyine se geese mɛyse se kuo. Mɛ lu nɛ mɛ yɛnmen ge ɛyfɛle yɛne báà se lu ɛykwɛnen ɛ ɛyshiɛ nə Feyine ə Fome.

³Ghɛn kuume yì kenəə kɛ ɛ́ nè dinten se ghɛn nɛ̀ kɛ ghɛn nè yion è me yɛ lɛm, è gese kubsen tetem ə ten. Ghɛn loo lu è jia kamke é mɛ nɛ̂y gwiy se ghɛn ka əbchoŋ, é ghɛn jia chèmè yɛ ke əbliy wɛ mɛ gwiy se ghɛn ɛ ten.

⁴Dî nɛ ɛyshiɛ ghele bo bɛɛy ɛ ghɛne məm ɛ Saldis ghɛ ghene bɛɛy ghàà bese ngeŋse ghen nɛ̀ mbee. Ghɛse ghene náà yɛ ghanle nɛ ghene mak ndəy sefəfene bek ge ghene lu kekwɛnten.

⁵Ghel ghɛ ɛ́ náà yiɛ ɛyghoŋe ten lu ghel nɛ̂ ghin ghɛ ɛ́ náà lafse ghene nɛ̀ ndəy sefəfene, nɛ mɛ jia náà fikse teghel ə ghen se ŋwaale ɛychii. Mɛ náà teem ɛ ba ə wom ɛyshiɛ ghene nchiyse-ndaa nə wene è suuy ɛ dɛɛne ge ghene lu ghel ə ghom.

⁶Ghɛn ghɛ ɛ́ kiin əbtuule yio kenəə kɛ keyioy ə Feyine suuyen se əbnone ghel ɛbeemene.

⁷Əb gese suuy se mɛ ge: Nyake ŋwaale se nchiy-ndaa-Feyine yɛ̂ kenchintene ghel ɛbeemene kɛ́ Filadelfia ge: Ntum yin lòò se mɛ wɛ mɛ luun əblanen gese lu wel əbluuy, ki əbnchoke ndaa nə David. Mɛ dise əbchio-ndaa fene lòó wel jia tɛk, mɛ tɛk fene lòó wel jia dise.

⁸Mɛ ke ɛyfɛl ə yɛn. Yɛn-a! Mɛ disemen əbchio-ndaa se ghɛn, nɛ lòó wel jia bo tɛk. Mɛ ke ge ghɛn ki kediak ə kɛn se ɛylaay, dî nɛ ghɛn lu nɛ ɛ́ yionenmen giɛ ə yom è jia maa mɛ.

⁹Yɛn-a! Mɛ nɛ̂y nɛɛy é ghele ngoo nə Satan, ghel ghi ghɛ ɛ́ yian əbbuam ge ghene lu ghele Juus dî wiy, gwiy è ngvəkte ɛ ghɛn ɛyshiɛ. Ghene nɛ̂y keele ge mɛ koŋe ghɛn.

¹⁰Mɛ nɛ̂y boyse ghɛn se ngɛk sɛ se nɛ̂y gwiy se mome ghel ɛjim ɛ mbi fɛn bek ka ghɛn nè kulen ɛytem è yionen giɛ ə yom.

¹¹Mɛ shi se gwiy, ghɛn loote ghal ɛybeeme yɛ ghɛn kiin ketaan fɛ wel səəke əbmakte ə wɛn wɛ ghɛn yiɛn ɛyghoŋ è kiile.

¹²Naa ndɛ wɛ əb noon è yiɛ ɛyghoŋ lu nɛ mɛ nɛ̂y nɛɛy é əb yɛ lu əbkfəs ɛ ndaa-ɛykokse nə Feyin ə Fome, è jia bo yî fəy se ten. Mɛ nɛ̂y nyak ɛyghele Feyine Fom ɛ wen əbghun è gese nyak ɛyghele ntɛk nə Feyine Fome ɛ wen əbghun, nɛ lu Jolesalem əbfɛɛ wɛ əb nɛ̂y səəke se Feyine Fome ɛyyio. Mɛ nɛ̂y nyak sɛy ɛyghele ə yom ɛyfɛɛ ɛ wen əbghun.

¹³Ghɛn ghɛ ɛ́ kiin əbtuule yio kenəə kɛ keyioy ə Feyine suuyen se əbnone ghel ɛbeemene.

¹⁴Əb gese suuy se me ge: Nyake ŋwaale se nchiy-ndaa-Feyine yɛ̂ kenchintene ghel ɛbeemene kɛ́ Laodisea ge: Ntum yin lòò se wen wɛ ɛ́ toŋten ge Amen. Lu wen wɛ əb loote suŋnen əbluuy wɛ kum Feyin, nɛ əbfua əbjim wɛ Feyine nè nɛyten lu nɛ əb nè nɛyte chia ɛ wen əbghun.

¹⁵Mɛ ke ɛyfɛl ə yɛn. Mɛ ke ge ghɛne lume wiy gese sane wiy.

¹⁶Ka ghɛne lumen wiy, sane wiy, lu nɛ mɛ tio ghɛn se mɛ əbchio.

¹⁷Ghɛne suuye ge ghɛn lu ghɛ́ əmkaa, ki kefaa kejim, bo tane wiy, dî nɛ ghɛn ke wiy ge ghɛn lu ɛ ngɛk, nɛ lòó wel yɛ chame ghɛn chamen. Ghɛn lu ɛ ketan, jɛle ɛyshas ɛyyum, gese lu əbnfef.

¹⁸Mɛ me se tefe ghɛn ge ghɛn yun kesaa se mɛ kɛ ɛ́ looten nyok, ka ghɛne yɛ lu ghɛ́ əmkaa. Ghɛn yun sɛy ndəy sefəfene è yɛ laf ɛ ten ka sé chite kenchokele kɛn kɛ ke choksen ghɛn. Ghɛn yun sɛy kefuu è yiose ɛshiɛ ə ghɛn so ka ghɛne yɛ yɛn əblik.

¹⁹Mɛ yole gese chìle ghel ghi ghɛ mɛ koŋen. Ghɛn tablen è kubsen tetem ə ten è fəy se mbee.

²⁰Yɛn-a! Mɛ tiy ɛ əbchio ndaa kfəntee. Naa ndɛ wɛ əb yion giɛ ə yom è dise əbchio ndaa é mɛ lii ɛ wene ndaa è ghɛse wen yɛ yiɛ se kefaa kemok.

²¹Naa ndɛ wɛ əb yiɛn ɛyghoŋ é mɛ nɛ̂y nɛɛy é ghɛse wen diom ɛ mɛ kaba kɛn ka mɛ nè noon è yiɛ è diom ghɛse ba ə wom ɛ wene kaba è se sake.

²²Ghɛn ghɛ ɛ́ kiin əbtuule yio kenəə kɛ keyioy Feyine suuyen se əbnone ghel ɛbeemene.