Read Oku Ɛyd 4 Bible Online

Ɛyd 4 - Oku bible

Ɛyd 4

¹Nɛy se lu ka əbnəə nɛ̂ vin nè chianmen, kuumese selee gese koo mɛ, mɛ yɛn əbchio ə ndaa nɛ əb tiy əbyii ɛyyio. Mɛ gese yio giɛ yɛ mɛ kè yionmen se mbiy yì nɛ ɛy suŋnene ka ɛ́ toŋ ɛyshoŋ nɛ ɛy suuye se mɛ ge: Kok è gwiy fɛn é mɛ din kenəə kɛ ke luun se gan.

²Kɛn se əbliy, Keyioy ə Feyine me nɛɛy mɛ yɛn kaba ɛyyio nɛ wele diom ɛ ten;

³nɛ ɛykek ə wene njante ka ɛtiy ghɛ ɛ́ toŋten ge jasba nɛ̀ ghɛ ɛ toŋten ge kalnelian. Nè lu dî nɛ ɛyfilinjoŋe kaale kaba ten, njante kɛn ka ɛytiy yɛ ɛ́ toŋten ge emelald.

⁴Kaba selee njio sekɛɛk əmbaa nè lu nɛ ɛ́ tom è kaale kaba vi so; nɛ chɛɛ selee njio sekɛɛk əmbaa diomten ɛ ten, nɛ se mak ndəy sefəfene è sooy əbtaa ndoŋ se əbtuu nɛ ɛ́ tio nɛ̀ ɛytiane è diom è kaale kaba vi.

⁵Nè lu dî nɛ ɛyghuu buale gese liake dəmke ɛ kaba fɛy, nɛ əbkaaken wɛ saamba tiy ɛ ɛyshiɛ kaba fɛy, baalee; nɛ lu əbyioy ə Feyin wɛ saamba.

⁶Kefaa kelee nè nyiŋ ɛ mbiye kaba fɛy lu ka jio nɛ ɛy liake ka kenkiy. Əbfua əblee əbkɛɛk wɛ əb kiin ɛychii teem è kaale kaba vi, ki ɛshiɛ se mbiy nɛ̀ se ɛybam.

⁷Kefaa kɛ́ mbiye nè fuosen bvələk, nɛ kenkumtene fuosen na, nɛ kelee ki ɛykek ka yɛ́ wele, nɛ kɛ́ kenləysene lu ka kebaba kɛ ke tanen.

⁸Əbfua wɛ əbkɛɛke nè ki ɛghaa ntuufe ntuufe, ki ɛshiɛ əbghun əbjim. Əb nè yeme njàŋse nɛ̀ nchuy, nɛ̀ ntəke, yale wiy, suuy ge: Báàba Feyin Wɛ Ba-Əbtaawe-Əbjim lu əblanen, əb nè se lu, nɛ əb lu ɛ leenen, nɛ əb lu se gwiy.

⁹Əbfua vin əbkɛɛk yese yeme njàŋse foo ɛykokse, nɛ̀ ɛyngvəmle gese nɛ̀ bɛɛle wɛ̀ se vi wɛ əb diommen ɛ kaba, vi wɛ əb luun se əbliy əbjim.

¹⁰Ghene yeme dì nɛ chɛɛ sɛ njio sekɛɛk əmbaa shii me fɛye ɛyshiɛ nə wel vi wɛ əb luun ɛ kaba, foo ɛykokse se wen wɛ əb luun se əbliy əbjim. Ghene loo nɛɛy dì, ghene me yɛ chokte əbtaa ndoŋ nə ghene vi nyiŋse ɛyshiɛ kaba, yeme ge:

¹¹Báàba ə wɛs, nɛ̀ Feyine fɛse, Wɛ̀ lu kekwɛnten ge ɛ́ yɛ kokse wɛ̀, ngvəmle wɛ̀, nɛ wɛ̀ ki əbtaawe əbjim; Nè bom wɛ̀ əbfua əbjim wɛ əb luun, Nɛ nè koŋ wɛ̀ se nɛɛy ge əbfua nɛ̂ vine yɛ lu gese chii.