Read Oku Ɛyd 5 Bible Online

Ɛyd 5 - Oku bible

Ɛyd 5

¹Mɛ gese yɛn nɛ wel vi wɛ əb kè diom ɛ kaba ghal ɛyghaa ŋwaale ɛ wene keghoo kɛ əbkoy əbtaa, nɛ ɛ́ nyak ɛ ten tebee tejim è kaale è lɛyte əblik saamba.

²Mɛ yɛn nchiy-ndaa ə Feyine ɛytaa ɛylee nɛ ɛy wame ɛ giɛ ɛytaa bife ge: Lu ndɛ kekwɛnten se bɛyte kelɛy se yase ŋwaale yin?

³Wel jia se lu ɛyyio, kene ntiɛ, kene ɛylak nə nkfəsayse wɛ əb nè lòó əb yas ŋwaale yi è yɛn ɛməme ten.

⁴Mɛ me kɛ̀sèn nɛ̀ ɛydiye bek ka wel nè báà se lu kekwɛnten se yase ŋwaale yi, kene se kiy ɛməme ten.

⁵Chɛɛ yɛ ɛymok me suuy se mɛ ge: Ghàà se diy. Yɛn-a! Bvələk ɛykfəə nə Juda ɛyshaa ndaa nə David yiɛmen ɛyghoŋ è se lu kekwɛnten se bɛyte kelɛy kɛ əblik saamba se dise ŋwaale ten.

⁶Mɛ gese yɛn Wan-Njiɛ nɛ əb tiy ɛ əbghune kaba ɛ fetetene əbfua wɛ əbkɛɛk vi ghene chɛɛ shii, keke dì ka ɛ́ sɛɛ sɛɛn. Əb nè ki ndoŋse saamba gese nɛ̀ ɛshiɛ saamba nɛ lu əbyioy ə Feyin wɛ saamba wɛ Feyine nè tumen ɛ mbi ɛyjim.

⁷Wan-Njiɛ vi kokte è ndu è fii ŋwaale yi se keghoo əbkoy əbtaa nə wel vi wɛ əb nè diom ɛ kaba.

⁸Kɛn ka əb fiin dî ɛ leghɛ, əbfua wɛ əbkɛɛk ghene chɛɛ sɛ njio sekɛɛk əmbaa fɛy ɛ ɛyshiɛ nə Wan-Njiɛ, nɛ naa ndɛ ɛ ghene məm ghal ɛyluŋ nɛ̀ keghene nɛ ɛ́ fɛl nɛ̀ ɛytiane, nɛ kelɛye kefele lu ɛ ten kelunen. Kelɛy kine nè lu ɛyjeme ghele Feyin.

⁹Ghene nè yeme njàŋ ɛyfɛɛ nɛ ɛy suuye ge: Wɛ̀ lu kekwɛnten se fii ŋwaale yi se bɛyte kelɛy se yayte, bek ge ɛ́ nè yuy wɛ̀, wɛ̀ ten ghel nè əmnduŋme miɛ è kase gwiy so se Feyine, tesaa ndaa tejim, nɛ̀ telam tejime, nɛ̀ əbtum əbjime, nɛ̀ tekfəə tejime.

¹⁰Wɛ̀ lɛmen ghene ge ɛylake ghele ntaŋle ghɛ ɛ́ fɛ́len se Feyin Fɛsene. Nɛ̀ ghene náà yɛ sake mbi yin.

¹¹Mɛ loo kiy è yɛn nchiyse-ndaa nə Feyine, ɛyviɛ ɛyviɛ, ɛ nkamse ɛ nkamse, nɛ se teem è kaale kaba vi nɛ̀ əbfua wɛ əbkɛɛk vii ghene chɛɛ shii.

¹²Ghene nè yeme njàŋ ketaan suuye ge: Wan-Njiɛ wɛ ɛ́ nè yuyen vi lu kekwɛnten, ki əbtaawe, nɛ̀ əbghaake, nɛ̀ ɛytofe, nɛ̀ kediake. Ghɛsen yɛ ngvəmle wen, kokse wen, gese bɛ́ɛ̀lè wen.

¹³Mɛ gese yio nɛ əbfua əbjim wɛ Feyine nè bomen ɛ ɛyyio, nɛ̀ ɛ ntiɛ, nɛ̀ ɛylak nə nkfəsayse, nɛ̀ se jio ɛyghuy, nɛ̀ əbfua əbjim wɛ əb kiin ɛychii ɛ mbi fɛn yeme suuye ge: Ghɛsen yɛ kokse, gese ngvəmle vi wɛ əb diom ɛ kaba ghene Wan-Njiɛ. Əb ki əbghaake gese nɛ̀ əbtaawe əbliy əbjim.

¹⁴Əbfua wɛ əbkɛɛk vii fise ge: Amen! Chɛɛ shii fɛy ɛ ntiɛ è se foo ɛykokse se Feyine ghene Wan-Njiɛ.