Read Oku Ɛyd 6 Bible Online

Ɛyd 6 - Oku bible

Ɛyd 6

¹Mɛ me yɛn ka Wan-Njiɛ bɛsen kelɛy kɛ kemok se wɛ saamba, è me yio nɛ kefaa kelee se wɛ əbkɛɛke suuye ɛ giɛ ɛytaa ka ɛyghuu ɛybualene ge: Gwiye!

²Mɛ loo kiy è yɛn nyam fenkok ɛyfəfen, nɛ wel wɛ əb luun ɛ ketuu ə ten ki ɛynən, ɛ́ me fo ketaandoŋ se wen. Əb me fəy ka wel wɛ əb yiɛn ɛyghoŋ se yɛ təme yiɛ nduu nɛ̀ ɛyghoŋe.

³Wan-Njiɛ bɛs kelɛy kɛ́ kenkumtene. Mɛ yio nɛ kefaa kelee se əbfua fɛy suuy ge: Gwiye!

⁴Nyam fenkok ɛylee fəy è gwiy, baŋe baŋen. Ɛ́ me fo fiak ɛyghoŋ se wel wɛ əb nè luun ɛ ketuu ten ge əb mak ɛyghoŋ ɛ ketuu ntiɛ é ghele yɛ yuyte ɛlee.

⁵Wan-Njiɛ me gese bɛ̀s kelɛy kelee ge əbtal. Mɛ me yio nɛ kefaa kelee suuye ge: Gwiye! Mɛ kiy è yɛn nyam fenkok ɛyfinen, nɛ wel wɛ əb luun ɛ ketuu ten njɛyse əbfek ɛydile kefaa ɛ wene keghoo.

⁶Mɛ yio giɛ nɛ ɛy gwiye ka giɛ ə wel ɛ məme əbfua wɛ əbkɛɛk vii, nɛ ɛy suuye ge: Wele nɛ̂y me liɛ əbkaa ə kechii keful è yun kɛn tasa əmkfəŋme wit kene tasa əmkfəŋme bale setal so.

⁷Wan-Njiɛ gese bɛ̀s kelɛy kelee ge əbkɛɛk. Mɛ yio nɛ kenləysene kefaa se wɛ əbkɛɛk vii suuye ge: Gwiye!

⁸Mɛ kiy è yɛn nyam fenkok ɛylee nɛ ɛy baaŋe baaŋen. Wel nè lu ɛ ketuu ten nɛ ɛyghele wene lu ge: Ɛykuo, nɛ ɛylake nkfəsayse gwiye ɛ wen ɛybam. Ɛ́ me fo əbtaawe ge ghene giate ketuu ntiɛ əblik əbkɛɛk, è buuse kɛ kemoke nɛ̀ ɛyghoŋ, nɛ̀ jeŋ, nɛ̀ teyafe, nɛ̀ nyam sɛ se yúyten ghel.

⁹Wan-Njiɛ gese bɛ̀s kelɛy se kelik kelee ge əbtan. Mɛ yɛn əbyioye ghel ə Feyin ɛ ɛyshaa ketatane ntaŋle ghɛ ɛ́ nè yúyten ghene bek ka ghene nè fekten kenəə ə Feyin nɛ ɛ́ teem ketaan se loote se din ka kɛ luun.

¹⁰Əbyioy nɛ̂ vi me wam ɛ giɛ ɛytaa ge: Báàba, Feyine, Wɛ Ba-Əbtaawe-Əbjim, wɛ̀ lu əblanen gese suuy əbluuy. Ke nɛ̂y liɛ əbtəm lɛɛy nɛ wɛ̀ geese sak ghele ghɛ́ ketuu ntiɛ se make ngɛkse se ghene bek ɛyyúyte yɛ ghene nè yuyten ghɛs?

¹¹Ɛ́ me giate ndəy sefəfene se ghene è suuy se ghene ge ghene kô moote lɛ se ɛylaay, se chin ka ɛ́ mɛyse è yuyte ghel ghɛ ghene ghene nè fɛ́len gese nɛ̀ ghone-ɛnoo ghene ghɛ ɛ́ nè bɛɛyen se yuytê kɛn ka ɛ́ nè yuyten ghene.

¹²Mɛ gese yɛn ka Wan-Njiɛ bɛsen kelɛy se kelik kelee ge əblik ntuufe. Ntiɛ se shikene nɛ əblike kɛytee, chuy me se fine ka finchii, njoŋ me benle è se baŋe ka əmnduŋ.

¹³Əmnjesme fɛyke se ntiɛ dì ka əmtame fig ɛ əbliy wɛ əbfiɛfe chian yasen nɛ əm bɛɛy ghaa taa.

¹⁴Ɛyyio kaale əbghun ka ɛ́ kaale ŋwaale è me lɛy. Kfən sejime gese nɛ̀ əblik əbjim wɛ jio ɛyghuy kalen è tas sam se əblik wɛ əb nè luun ɛ ten.

¹⁵Tefone tɛ́ mbi fɛne gese nɛ̀ ghel ɛsakene gese nɛ̀ əbtuu ɛyghoŋe, nɛ̀ ghɛ əmkaa gese nɛ̀ ghel ɛtaa nɛ̀ ghel ɛjime kene lu əbkos, kene wiy əbkos sam è lel ɛ mbvəkse gese nɛ̀ se ɛshaa ɛtiy ɛ kfənse.

¹⁶Ghene se toŋe se kfənse ghene ɛtiye ge: Ghɛn fɛyke ɛ ghɛs əbtuu è chite ghɛs fɛ wel wɛ əb diom ɛ kaba yɛn ghɛs, nɛ̀ fɛ Wan-Njiɛ mak ngɛk se ghɛs.

¹⁷Kechii kebɛɛmene kɛ ghene mak ngɛk se ghele kwɛnmen, nɛ̀ wel wiy əbmok wɛ lòó əb boy se ten.