Read Oku Ɛyd 7 Bible Online

Ɛyd 7 - Oku bible

Ɛyd 7

¹Se ɛybame ten, mɛ yɛn nchiyse-ndaa nə Feyine sekɛɛk nɛ se tiy ɛ tebuulese mbi tɛ tekɛɛk, tiyse əbfiɛf ɛ tebuulese mbi tɛ tekɛɛk fɛ əb yɛ chia ɛ ntiɛ kene ɛ jio ɛyghuy kene əmkak.

²Mɛ gese yɛn nchiy-ndaa-Feyin ɛylee nɛ ɛy fəye gwiye jii ɛybee yɛ chuye sɛɛ too ɛ ten ki əbchəysen ə Feyin Fɛ Fe chiin ɛ wen ə keghoo. Əb jaŋ è suuy se nchiyse-ndaa sɛ se kɛɛk shii sɛ Feyine nè foonmen əbtaawe ge ghene bese mbi ge:

³Ghàà ghɛn bese ketuu ntiɛ kene jio ɛyghuy kene əmkak, buu ge ghɛsen basemen əbchəysene Feyin se əbyes-ɛshiɛ nə ghel ɛyfɛl nə Feyin ə Fɛsene.

⁴Ɛ́ me suuy se mɛ ge ghel ghɛ ɛ́ chəysen lu nkam əbviɛ nɛ̀ nkam njio sekɛɛk əmkɛɛk nɛ ɛ́ lòò ɛ tekfəə tɛ Islael tejim.

⁵Ɛ́ nè chəysen ghel nkam njio-sebaa ɛyvəm ɛ ɛykfəə nə Juda, è chəysen ghel nkam njio-sebaa ɛyvəm ɛ ɛykfəə nə Leuben, è chəysen nkam njio-sebaa ɛyvəm ɛ ɛykfəə nə Gad,

⁶è chəysen ghel nkam njio-sebaa ɛyvəm ɛ ɛykfəə nə Asha, è chəysen ghel nkam njio-sebaa ɛyvəm ɛ ɛykfəə nə Naftali, è chəysen ghel nkam njio-sebaa ɛyvəm ɛ ɛykfəə nə Manasseh,

⁷è chəysen ghel nkam njio-sebaa ɛyvəm ɛ ɛykfəə nə Simeon, è chəysen ghel nkam njio-sebaa ɛyvəm ɛ ɛykfəə nə Levi, è chəysen ghel nkam njio-sebaa ɛyvəm ɛ ɛykfəə nə Issakal,

⁸è chəysen ghel nkam njio-sebaa ɛyvəm ɛ ɛykfəə nə Zebulun, è chəysen ghel nkam njio-sebaa ɛyvəm ɛ ɛykfəə nə Josɛf, è chəysen ghel nkam njio-sebaa ɛyvəm ɛ ɛykfəə nə Benjamin.

⁹Se ɛybame ten, mɛ kiy è yɛn feliɛ wel nɛ lòó wel jia taŋ nɛ ɛ́ lòò əbtum əbjim, tekfəə tejim, tenkii ghel tejim suŋnen telam tejim, nɛ ɛ́ tiy ɛ ɛyshiɛ kaba gese nɛ̀ wan njiɛ ɛyshiɛ nɛ ɛ́ mak ndəy sefəfene, è ghal əbyaŋ ɛ ghene ɛghoo.

¹⁰Ghene se jaŋe suuy ɛ giɛ ɛytaa ge: Lu Feyin ə Fɛsen Fɛ Fe diom ɛ kaba wɛ ghene Wan-Njiɛ boysen ghɛsen.

¹¹Nchiyse-ndaa nə Feyine teem è kaale kaba ghene chɛɛse gese nɛ̀ əbfua əbkɛɛk wɛ əb kiin ɛychii, è fɛy, è təm tekek ɛ ɛyshiɛ kaba è se foo ɛykokse se Feyine.

¹²Suuye ge: Amen! Ghɛsen yɛ kokse Feyine Fɛsen. Əb ki əbghaake gese nɛ ɛytofe. Ghɛsen yɛ bɛ̀ɛ̀lè wen gese ngvəmle wen. Əb ki əbtaawe gese nɛ̀ kediake əbliy əbjim! Amen!

¹³Chɛɛ ɛylee me bif se mɛ ge: Ghine lu ghe ndɛ ghɛ ɛ́ maken ndəy sefəfene, nɛ ghene lòò ghááy?

¹⁴Mɛ fise ge: Babɛy, mɛ báà se ke, ke kɛn wɛ̀. Əb me suuy se mɛ ge: Ghene lu ghel ghɛ ɛ́ chianmen ɛ məme ngɛk ɛytaa, nɛ ghene suumen ndəyse ghen nɛ̀ əmnduŋ mə wan njiɛ, sé se fəfe ge bvəə.

¹⁵Ghene me se tiy ɛ ɛyshiɛ kaba nə Feyine fɛle se Feyine nɛ̀ nchuy nɛ̀ ntəke ɛ wen ə ndaa-ɛykokse. Vi wɛ əb luun ɛ kaba nɛ̂y yɛ lu ghene ghene, tɛɛke ghene.

¹⁶Ghene jia bo yî yɛ yio jeŋ, nɛ kendoŋe moo bo yume wiy ghene, chuye jia bo yî yɛ zəke ghene, nɛ ghene bo yio wiy kenkfəm,

¹⁷bek ge wan-njiɛ wɛ əb luun ɛ əbghune kaba nɛ̂y yɛ lu nchiy ə ghen, è toknen nɛ̀ ghene è ndu so se ntoŋse jio sɛ se foon ɛychii yɛ ɛy jia naa mɛy. Feyine nɛ̂y yɛ́s əmnshiɛ əmjim se ghene ɛshiɛ.