Read Oku Ɛyd 8 Bible Online

Ɛyd 8 - Oku bible

Ɛyd 8

¹Nɛy se lu ka wan njiɛ nè bɛsenmen kelɛy kɛ əblik saamba, ɛyyio chilen se keleŋ əbliy.

²Mɛ me yɛn nchiyse-ndaa nə Feyine sɛ se tiyen ɛ Feyine ɛyshiɛ nɛ ɛ́ fó tesoŋ se ghene saamba.

³Nchiy-ndaa-Feyin ɛylee gwiy è teem əbghune ketatane ntaŋle, ki kekaŋ ɛynyoke kelɛy nɛ ɛ́ tio nɛ̀ ɛytiane. Ɛ́ fó kelɛy se wen naa se ɛydio ge əb chinten se ɛyjem nə ghele Feyin naa ɛjim, è nyok ɛ ketatane ntaŋle kɛ ke tiyen ɛ ɛyshiɛ kaba nɛ ɛ́ fɛl nɛ̀ ɛytiane.

⁴Əb nyok kelɛy ki, felike tene me chìntèn ɛyjeme ghel ə Feyin, è se fəye koke ɛ Feyine ɛyshiɛ.

⁵Nchiy-ndaa-Feyin yi me liɛ kekaŋe kelɛy ki, è liɛ əbkɛy əbvəs ɛ ketatane ntaŋle è vii se ten è mak se ntiɛ, ɛyghuu se buale, liake, dəmke nɛ ntiɛ shikene nɛ əblike kɛytee.

⁶Nchiyse-ndaa nə Feyine sɛ saamba sɛ se nè kiin tesoŋ saamba me se bááte se toŋ.

⁷Nchiy-ndaa-Feyine yɛ́ mbiy tóŋ yɛ́ wene, əmntiyme ghene əbvəse nɛ ɛ́ fis nɛ̀ əmnduŋme me kɛ̀sèn è səəke ɛ ketuu ntiɛ. Keleŋ kɛ kemoke se əbleŋ wɛ əbtale ɛ ketuu ntiɛ fuo, əmkakme fuo keleŋ kɛ kemoke se əbleŋ wɛ əbtale, əbgii fuo naa əbjim.

⁸Kenkumtene nchiy-ndaa ə Feyin tóŋ yɛ́ wene yɛ ɛyshoŋ, ɛ́ me mak kefaa nɛ ke lu ka kfən ɛyghuy nɛ əbvəse baale ɛ ten se jio ɛyghuy. Keleŋ kɛ kemoke se əbleŋ wɛ əbtale ɛ jio ɛyghuy benle se əmnduŋ.

⁹Nyame sɛ́ jio ɛ keleŋ kɛ kemoke əbleŋ wɛ əbtale kuo. Keleŋ kɛ kemok ɛ əbleŋ wɛ əbtale se əbnək əbghuye wɛ əb nè luun ɛ jio befke.

¹⁰Nchiy-ndaa-Feyin ɛylee ge setal tóŋ yɛ́ wene yɛ ɛyshoŋ, fenjes feghakene lòò ɛyyio bane naa se ŋaŋ è fɛy è chite jio se lɛŋene se keleŋ kɛ kemok ɛ məme əbleŋ wɛ əbtal, è chite sɛy ntoŋse jio ɛ keleŋ kɛ kemok ɛ məme əbleŋ wɛ əbtal.

¹¹Ɛyghele fenjes nɛ̂ fo nè lu ge: Kenluy-chek. Jio sɛ́ keleŋ kɛ kemoke se əbleŋ wɛ əbtale ghene ntoŋse jio me se luye luyen. Ghel se ɛydio kuo bek ka ghene nè nəən moome ten mɛ əm nè se luye luyen.

¹²Nchiy-ndaa-Feyin ɛylee ge sekɛɛk toŋ yɛ́ wene yɛ ɛyshoŋ, kefaa chil chuy, ɛybee chuy yɛ ɛymok ɛ məme əbleŋ wɛ əbtale kuo, è chil njoŋ ghene əmnjesme, keleŋ kemok se əbleŋ wɛ əbtal se əbfua nɛ̂ ghan kuo. Ke loo dì, ɛybane əbfua nɛ̂ ghan me fin keleŋ kemok se əbleŋ wɛ əbtal. Ɛybee chuy yɛ ɛymok se əbleŋ wɛ əbtale me se lu ɛ nfiine, nɛ ɛybee ntək yɛ ɛymok se əbleŋ wɛ əbtale lu sɛy ɛ nfiine.

¹³Mɛ loo kiy è yɛn kebaba nɛ ke tane ɛyyio vəəy suuy ge: Lon-ɛy, lon-ɛy, lone nɛ̂y yɛ lu se ghel ghɛ ɛ́ bo chiin ɛ ketuu ntiɛ əbliy wɛ nchiyse-ndaa sɛ se setale nɛ̂y toŋ tesoŋ tɛ te bɛɛsen.