Read Oku Ɛyd 9 Bible Online

Ɛyd 9 - Oku bible

Ɛyd 9

¹Nchiy-ndaa-Feyin ɛylee ge setan me toŋ yɛ́ wene yɛ ɛyshoŋ. Mɛ yɛn fenjes ka fe loon ɛyio è fɛy se ntiɛ, ɛ́ fó kenchoke nkweŋ se feghene.

²Fenjese tene chok əbchio ə nkweŋ ghɛy, felike se dəke fəye ɛ ten ka fe fəy ɛ kekaaŋe kɛ ɛ́ nyoken. Fe fəy è kok è chite chuy, əblike me se fine finen.

³Nguumese me fəy ɛ felik fɛy è səəke ɛ ntiɛ. Ɛ́ fó kediak se seghene ge se yɛ tiɛnen ka ngámse.

⁴Ɛ́ suuy se nguume shii ge ghàà se kum əbgii, kene əmkak, kene kefaa kɛ ke kuye kuyen. Ɛ́ suuy se nguumese tene ge se nəkse nɛ lu ghel ghi ghɛ ɛ́ báà se ki əbchəysene Feyin ɛ ghene əbyes-ɛshiɛ.

⁵Nguumese tene nè báà se lu se yuyté yuytén ghel nɛ̂ ghi, se nè lu se yɛ nəkse ghene nəksen se njoŋ setan. Nəkse dì nɛ ghene yio ɛylum ka tiɛ ngámse ghene.

⁶Náà loo lu ɛ əmchii nɛ̂ fo é ghele yɛ kɛŋ ɛykuo yɛ ɛy liɛ ghene, è jia yɛn. Ghene náà yɛ koŋ se kuo, é ɛykuo yɛ nyiŋe ghene nyiŋen.

⁷Nguume shine nè keke ka nyamse fenkok sɛ ɛ́ siysen è se shike ɛyghoŋ so, nɛ se sooy əbfol nɛ əb keke ka wɛ̂ tefone wɛ ɛ́ tion nɛ̀ ɛytiane, nɛ tekek ə ghene lu ka tɛ ghele.

⁸Ɛyghuye ghene nè lu ka nəŋse ketuu nə əbvii, nɛ ɛsoŋ ə ghene lu ka ɛsoŋ ə bvələk.

⁹Əbnkàŋele ghene nè lu nɛ ɛ́ keŋ nɛ̀ kefaa nɛ ke fuosen kekas. Ghene nè lóò tan ɛghaa ə ghene yɛ shiŋ dì ka nyamse əmnkok əbliy wɛ se gufen tekal ɛ əbkwak ɛyghoŋ.

¹⁰Se nè ki ɛykun nɛ ɛy tiɛnene ka ngámse, me se lu nɛ̀ ɛykun nɛ̂ yine yɛ ghene nè kiin kediak se nɛɛy ge ghele yio ɛylum se njoŋ setan.

¹¹Ghene ki əbfon wɛ əb saken ghene wɛ luun nchiy-ndaa yi yɛ ɛy kiin nkweŋ yi. Ɛyghel ə wene lu əblame Heblu ge Abaddon, gese lu əblame Gleek ge Abollyon, dii ge wel wɛ əb besen.

¹²Lone wɛ̂ mbiy lɛ chiamen, nɛ lonse bo gwiy ɛybame ten sebaa.

¹³Nchiy-ndaa-Feyin ɛylee ge ntuufe tóŋ yɛ́ wene yɛ ɛyshoŋ. Mɛ yio giɛ nɛ ɛy gwiye ɛ tebuulese tɛ tekɛɛk ɛ ketatane ntaŋle kɛ ɛ́ tion nɛ̀ ɛytiane ke se tiy ɛ Feyin ɛyshiɛ.

¹⁴Nɛ giɛ yi jaŋe suuy se nchiy-ndaa-Feyin yi ge: Yayte nchiyse-ndaa sɛ sekɛɛk sɛ ɛ́ kulen ɛ jio ɛyghaken yɛ Yuflet.

¹⁵Ɛ́ me yayte nchiyse-ndaa sɛ sekɛɛk sɛ ɛ́ nè kulen nɛ̂ shi bek ge əbliye, nɛ̀ kechii, nɛ̀ njoŋ, gese nɛ̀ nguk nè kwɛnmen wɛ ɛ́ luun se yuye ghel ghɛ keleŋ kemok se əbleŋ wɛ əbtal ɛ məme ghele ghɛ́ mbi fɛne.

¹⁶Ɛ́ suuy se mɛ ge kenone ghel ɛyghoŋ ghɛ ɛ́ jɛ́len ɛ ketuu nyamse fenkok lu bimbam ɛyviɛ ɛybaa.

¹⁷Mɛ yɛn ɛ mɛ kuumese nɛ̂ fɛy nyamse fenkok nɛ ghele lu əbtuu ten nɛ əbkas wɛ ghene nè tɛɛken əbnkàŋele ghen so baŋe ka əbvəs, fiine nduu ka kelane jio gese baaŋe biysene. Əbtuu nyamse fenkok sɛ tene nè fuosen wɛ bvələkse nɛ əbvəse nɛ̀ felike gese nɛ̀ kefuu əbvəse fəye ɛ ghene ɛychio.

¹⁸Lon shin setal, dii ge əbvəse nɛ̀ felike gese nɛ̀ kefuu əbvəse nè lô fəy ɛ ɛychio è yuyte ghel keleŋ kemok se əbleŋ əbtal.

¹⁹Əbtaawe nyam shine nè loole ɛ ghene ɛychio nɛ̀ se ghene ɛykun. Ɛykune ghene nè lu ka yiósé ki əbtuu wɛ ghene nè lɛmsen ghel so.

²⁰Kembɛke ghel ghɛ ɛ́ nè báà yuyte chèmè nè báà kubsen tetem ə ghen, è jia buu se yɛ kokse əbfua wɛ ghene nè fɛlen nɛ̀ ɛghoo. Ghene nè báà buu se yɛ kokse əbyioy əbbee nɛ əmnyin mɛ ɛ́ tion ɛ ɛytian, nɛ̀ mɛ̂ kekas əbkaa nɛ̀ mɛ̂ kekas kɛ ɛ́ toŋten ge blonze, nɛ̀ mɛ ɛ́ fɛlen nɛ̀ ɛtiye è gese chuf ɛ əmkak, əmnyin nɛ lòó əm jia yɛn əblik, è jia yɛ yio əbnəə gese jɛle wiy.

²¹Ghel nɛ̂ ghin nè báà maay ɛyyúyte ghel, nɛ̀ ɛykfəle kevəŋe, è jia maay kenjaŋ nɛ̀ əbchoŋe.