Read Original Shona Union Bible 1949 Baiberi Magwaro Matȿene aMŋari II Samueri 21 Bible Online

II Samueri 21 - Original Shona Union Bible 1949 Baiberi Magwaro Matȿene aMŋari bible

II Samueri 21

¹Ɀino pamazuʋa aDavidi kwakaŋga kunenzara makore matatu akateʋedzana; Davidi akabvunza Jehova. Jehova akati: Imhaka yaSauro neyeimba yake yeropa, nokuti ʋakaʋuraya ʋaGibeoni.

²Mambo akaɗana ʋaGibeoni, akati kwaʋari; (ɀino ʋaGibeoni ʋakaŋga ʋasi ʋaʋana ʋaIsraeri, asi ndiʋo ʋakaŋga ʋasara kuʋaAmori; ndiʋo ʋakaŋga ʋapikirwa naʋaIsraeri; asi Sauro wakatȿaka kuʋaʋuraya nokushiŋgairira kwake ʋana ʋaIsraeri naʋaJuda;)

³Davidi akati kuʋaGibeoni: Ndiŋgakuitirai inyi? Ndiŋgayananisa neiko, kuti muropafadze nhaka yaJehova?

⁴ƲaGibeoni ʋakati kwaari: Haizi mhoȿa yesirveri kana yendarama pakati peɗu naSauro neimba yake, nesu hatiŋgafaniri kuʋuraya munhu pakati paIsraeri. Iye akati: Camunoreʋa ndicakuitirai ico.

⁵Iʋo ʋakati kunamambo: Iye munhu, wakatipedza, wakatifuŋgira mano akaipa kuti tiparadzwe, tirege kugara panyika yose yaIsraeri,

⁶ʋarume ʋanomŋe ʋaʋana ʋake ŋgaʋapiwe’su, tiʋasuŋgirire pamberi paJehova paGibea raSauro, mutsaurwa waJehova. Mambo akati: Ndicakupai iʋo.

⁷Asi mambo wakarega Mefibosheti mŋanakomana waJonatani, mŋanakomana waSauro, nokuɗa kwokupika kwakaŋga kuri pakati paʋo pamberi paJehova, pakati paDavidi naJonatani mŋanakomana waSauro.

⁸Asi mambo wakatora ʋana ʋaʋiri ʋaRizpa, mukunda waAya, ʋaakaŋga aɓerekera Sauro, Armoni naMefibosheti, naʋana ʋashanu ʋaMikari mukunda waSauro, ʋaakaŋga aɓerekera Adrieri mŋanakomana waBarzirai muMehorati;

⁹akaʋaisa mumaʋoko aʋaGibeoni, iʋo ʋakaʋasuŋgirira pagomo pamberi paJehova, ʋakafa ʋari ʋanomŋe; ʋakaʋurawa pamazuʋa okukohwa, pamazuʋa okutaŋga, pakutaŋga kwokukohwa bari.

¹⁰Ɀino Rizpa mukunda waAya wakatora makudza, akaɀiwarira iwo pamsoro peɗombo, kubva pakutaŋga kwokukohwa kuȿikira aniwa nemvura yakabva kuɗeŋga; haana‐kutendera shiri dzokuɗeŋga kumhara pamsoro pawo masikati, kana ɀikara ɀesaŋgo ʋusiku.

¹¹Ɀino Davidi akaʋudzwa ɀakaŋga ɀaitwa naRizpa mukunda waAya, muroŋgo waSauro;

¹²Davidi akandotora mafupa aSauro namafupa aJonatani mŋanakomana wake kuʋarume ʋeJabeshi‐gireadi, ʋakaŋga ʋaaɓa panzira yeBeti‐shani, paʋakaŋga ʋaturikwa naʋaFiristia, pazuʋa rokuʋurawa kwaSauro naʋaFiristia paGirboa.

¹³Akatora’po mafupa aSauro namafupa aJonatani mŋanakomana wake, ʋakaʋuŋganidza mafupa aʋakaŋga ʋaturikwa’po.

¹⁴Ʋakaʋiga mafupa aSauro naaJonatani mŋanakomana wake panyika yaʋaBenjamini paZera, pabgiro bgaKishi ɓaɓa ʋake; ʋakaita ɀose ɀaʋakaŋga ʋarairwa namambo. Shure kwaiɀoɀo Mŋari akanzwira nyika tsitsi.

¹⁵Ɀino ʋaFiristia ʋakarwa ɀe naʋaIsraeri; Davidi akaɓuruka naʋaranda ʋake kundorwa naʋaFiristia; Davidi akaneta.

¹⁶Ɀino Ishbi‐benobi, mumŋe waʋanakomana ʋaRafa, waiʋa nepfumo rakaȿika pamashekeri anamazana matatu endarira[4] pakurema kwaro, iye wakaŋga akashoŋga munondo mutȿa, akafuŋga kuʋuraya Davidi.

¹⁷Asi Abishai mŋanakomana waZeruya wakamuɓatsira, akaɓaya muFiristia, akamuʋuraya. Ipapo ʋarume ʋaDavidi ʋakapika kwaari, ʋakati: Hamufaniri kuzoenda ɀe nesu kundorwa, kuti murege kuzodzima mŋenje waIsraeri.

¹⁸Ɀino shure kwaiɀoɀo kurwa kwakazoʋa’po ɀe naʋaFiristia paGobi; Sibekai, muHushati, akaʋuraya Safi, mumŋe waʋanakomana ʋaRafa.

¹⁹Ʋakarwa ɀe naʋaFiristia paGobi, Erhanani mŋanakomana waJaari‐oregimi weBeti‐rehemi akaʋuraya Goriati muGiti, rwiriko rwepfumo rake rwakaŋga rwakaita seɗanda romuruki.

²⁰Ʋakarwa ɀe paGati, paiʋa nomunhu murefu kwaɀo, waiʋa neminwe mitanhatu paruʋoko rumŋe norumŋe, neɀigunwe ɀitanhatu parutsoka rumŋe norumŋe, ɀaiȿika makumi maʋiri neɀinna pakuʋereŋgwa kwaɀo; naiye ʋo wakaŋga akaɓerekerwa Rafa.

²¹Ɀino wakati acishoʋora ʋaIsraeri, Jonatani mŋanakomana waShimei, munuŋuna waDavidi akamuʋuraya.

²²Aʋa ʋanna ʋakaŋga ʋakaɓerekerwa Rafa paGati; ʋakaʋurawa naDavidi, ʋuye naʋaranda ʋake.