Read Original Shona Union Bible 1949 Baiberi Magwaro Matȿene aMŋari II Samueri 22 Bible Online

II Samueri 22 - Original Shona Union Bible 1949 Baiberi Magwaro Matȿene aMŋari bible

II Samueri 22

¹Ɀino Davidi wakataura kunaJehova mashoko orwiyo urwu neŋguʋa yaakarwirwa naJehova pamaʋoko aʋaʋeŋgi ʋake ʋose, napamaʋoko aSauro;

²akati: Jehova iɗombo raŋgu, nenhare yaŋgu, nomurwiri waŋgu, iye ndowaŋgu.

³Mŋari iɗombo raŋgu, ndicaʋimba naye; Nhoʋo yaŋgu, norunyaŋga rwokuponeswa kwaŋgu, shoŋgwe yaŋgu yakakwirira, noʋutiziro bgaŋgu. Muponesi waŋgu, munondiponesa pakumanikidzwa.

⁴Ndicaɗana kunaJehova, iye unofanirwa nokurumbidzwa; Naiɀoɀo ndicaponeswa kunaʋaʋeŋgi ʋaŋgu.

⁵Nokuti mafuŋgu orufu akandikomba, Ʋuye nzizi dzeɀakaipa dzakandivundusa.

⁶Maɓote aSheori akandisuŋga, Misuŋgo yorufu yakandiwira.

⁷Pakutambudzika kwaŋgu ndakaɗana kunaJehova, Ndakaɗana kunaMŋari waŋgu, Akanzwa inzwi raŋgu ari mutembere yake; Kucema kwaŋgu kukaȿika munzeʋe dzake.

⁸Ipapo nyika yakazunuŋguka, ikaɗeɗera; Nheyo dzokuɗeŋga dzakaɗeŋgenyeka, Dzikazunuŋguswa, nokuti iye wakaŋga atsamŋa.

⁹Ʋutsi bgakakwira bgucibva mumhino dzake, Ʋuye mŋoto wakaɓuɗa mumuromo make, wakaparadza; Mazimbe akaɓatidzwa nawo.

¹⁰Wakakotamisa ʋo kuɗeŋga‐ɗeŋga, akaɓuruka; Nerima guru rakaŋga riri pasi petsoka dzake.

¹¹Wakataȿa kerubi, akabururuka; Ɀirokwaɀo, wakaʋonekwa ari pamapapiro emhepo.

¹²Wakaɀipoteredza nerima setente, Mvura yakaʋuŋganidzwa, nemvumi dzehore dzeɗeŋga.

¹³Nokupenya, kwakaŋga kuri pamberi pake, Mazimbe omŋoto akaɓatidzwa.

¹⁴Jehova wakatinhira kuɗeŋga, Wokumsoro‐soro wakataura nenzwi rake.

¹⁵Wakatuma miseʋe, akaʋaparadza; Akatuma mheni, akaʋavundusa.

¹⁶Ipapo pasi peguŋgwa pakaʋonekwa, Ʋuye nheyo dzenyika dzakaratidzwa pacena, Nokutuka kwaJehova, Nokufema kwomŋeya wemhino dzake.

¹⁷Wakatambanudza ruʋoko rwake ari kumsoro, akanditora, Akandinyukura pamvura zhinji;

¹⁸Akandirwira pamuʋeŋgi waŋgu unesimba, Nokunaʋanondiʋeŋga; nokuti ʋakaŋga ʋondikurira.

¹⁹Ʋakandiʋiŋga nezuʋa renjodzi yaŋgu, Asi Jehova wakaŋga ari mutsigiro waŋgu.

²⁰Akandiɓuɗisira kunɀimbo yakafarikana, Akandirwira, nokuti wakaŋga acindifarira.

²¹Jehova wakandiitira ɀakaenzana nokururama kwaŋgu, Akandipa muɓairo wakaenzana nokucena kwamaʋoko aŋgu.

²²Nokuti ndakaceŋgeta nzira dzaJehova, Handina‐kubva kunaMŋari waŋgu nokunyeŋgera.

²³Nokuti ɀose ɀaakatoŋga ɀakaŋga ɀiri pamberi paŋgu; Kana ɀiri ɀaakatema, handina‐kutsauka kwaɀiri.

²⁴Ndakaŋga ndakarurama kwaɀo pamberi pake, Ndakaɀiceŋgeta paɀakaipa ɀaŋgu.

²⁵Naiɀoɀo Jehova wakandiitira ɀakaenzana nokururama kwaŋgu, Ɀakaenzana nokucena kwaŋgu pamberi pake.

²⁶Uneŋgoni, munomuitira ʋo ŋgoni; Munhu, wakarurama kwaɀo, munomuitira ʋo ɀakarurama;

²⁷Wakanaka, munomuitira ʋo ɀakanaka; Wakatsauka, munomuitira ʋo hasha.

²⁸Mucaponesa ʋanhu ʋanotambudzika, Asi meso enyu anoʋona ʋanoɀikudza, kuti muʋaɗeredze.

²⁹Nokuti muri mŋenje waŋgu, Jehova; Jehova ucavenekera rima raŋgu.

³⁰Nokuti nemi ndicaʋamba hondo, Kana ndinaMŋari waŋgu ndicaɗarika ruȿiŋgo.

³¹Kana ari Mŋari, nzira yake yakarurama kwaɀo; Shoko raJehova rakaidzwa; Ndiye nhoʋo yaʋose ʋanotenda kwaari.

³²Nokuti ndianiko Mŋari, asi iye Jehova? Ndianiko ɗombo, asi iye Mŋari weɗu?

³³Mŋari ndiye nhare yaŋgu inesimba; Iye unondifambisa nenzira yakarurama.

³⁴Unoita tsoka dzaŋgu setsoka dzenondokadzi, Unondiisa pakakwirira.

³⁵Unodzidzisa maʋoko aŋgu kurwa; Naiɀoɀo maʋoko aŋgu anowembura ʋuta bgendarira.

³⁶Makandipa ʋo nhoʋo yokuponesa kwenyu, Ʋunyoro bgenyu bgakandikurisa.

³⁷Makandiitira nɀimbo yakafarikana pasi paŋgu pandiŋgatsika; Tsoka dzaŋgu hadzina‐kutedzemuka.

³⁸Ndakateʋerera ʋaʋeŋgi ʋaŋgu, ndikaʋaparadza; Handina‐kudzoka ɀe kuȿikira ʋapedzwa.

³⁹Ndakaʋapedza, ndakaʋaɓaya, haʋagoni kumuka; Ʋakawira pasi petsoka dzaŋgu.

⁴⁰Nokuti makandisuŋga ciʋuno nesimba rokurwa naro; Makandikundisa ʋaindimukira.

⁴¹Makatizisa ʋaʋeŋgi ʋaŋgu, Kuti ndiparadze ʋanondiʋeŋga.

⁴²Ʋakatarira, asi kwakaŋga kusinomuponesi, KunaJehova, asi haana‐kuʋapindura.

⁴³Ipapo ndakaʋapxanya‐pxanya seguruʋa renyika; Ndikaʋaswa samatope enzira dzomumusha, ndikaʋaparadzira kure.

⁴⁴Makandirwira ʋo pakukakaʋadzana kwaʋanhu ʋaŋgu, Makandiceŋgeta kuti ndiʋe mukuru wendudzi; Ʋanhu ʋandakaŋga ndisiŋgaziʋi, ʋacandishumira.

⁴⁵Ʋatorwa ʋacanamata kwandiri; Ʋacaterera pakarepo kana ʋacindinzwa.

⁴⁶Ʋatorwa ʋacatorerwa simba, Ʋacaɓuɗa paʋaiʋanda ʋaciɗeɗera.

⁴⁷Jehova mupenyu; ɗombo raŋgu ŋgarikudzwe; Mŋari, ɗombo rokuponeswa kwaŋgu, ŋgaarumbidzwe.

⁴⁸Ndiye Mŋari unonditsiʋira, Unondikundisa ʋanhu.

⁴⁹Unondibvisa kuʋaʋeŋgi ʋaŋgu; Ɀirokwaɀo, munondisimudzira kumsoro kwaʋanondimukira; Munondirwira pamunhu unondimanikidza.

⁵⁰Naiɀoɀo ndicakuʋoŋgai Jehova, pakati pendudzi, Ndicakudza zita renyu nenziyo;

⁵¹Unopa mambo wake kuponeswa kukuru, Unoitira muzodzwa wake ʋunyoro, KunaDavidi naʋana ʋake nokusiŋgaperi.