Read Original Shona Union Bible 1949 Baiberi Magwaro Matȿene aMŋari Ezekieri 21 Bible Online

Ezekieri 21 - Original Shona Union Bible 1949 Baiberi Magwaro Matȿene aMŋari bible

Ezekieri 21

¹Ɀino shoko raJehova rakaȿika ɀe kwandiri, riciti:

²Mŋanakomana womunhu, rinzira ciso cako kurutiʋi rweJerusarema, uɗonhedze shoko rako kurutiʋi rwenɀimbo tȿene, uprofite pamsoro penyika yaIsraeri;

³uti kunyika yaIsraeri: Ɀanzi naShe Jehova: Tarira, ndinemhaka newe, ndicavomora munondo waŋgu mumuhara wawo, ndicaparadza pakati penyu ʋakarurama naʋakaipa.

⁴Ɀino ɀandicaparadza pakati penyu ʋakarurama naʋakaipa, munondo waŋgu ucaɓuɗa mumuhara wawo kundorwa nenyama yose kubva kurutiʋi rwezasi kuȿikira kurutiʋi rwokumsoro;

⁵nyama yose icaziʋa kuti ini Jehova ndakavomora munondo waŋgu mumuhara wawo; haucazodzokeri’po ɀe.

⁶Naiɀoɀo, gomera, iwe mŋanakomana womunhu, gomera pamberi paʋo, ciʋuno cako civunike nokucema kukuru kuʋe’po.

⁷Ɀino kana ʋaciti kwauri: Unogomera neiko? uti kwaʋari: Nemhaka yamashoko, nokuti anoʋuya; mŋoyo mumŋe nomumŋe ucanyauka, maʋoko ose acashaiwa simba, mŋeya mumŋe nomumŋe ucati rukutu, mabvi ose acashaiwa simba semvura; tarirai, anoʋuya, acaitika — ndiɀo ɀinotaura Ishe Jehova.

⁸Ɀino shoko raJehova rakaȿika kwandiri, riciti:

⁹Mŋanakomana womunhu, profita, uti: Ɀanzi naJehova: Iti: Munondo, munondo! warodzwa, wabginyiswa;

¹⁰warodzwa, kuti uʋuraye, wabginyiswa, kuti uʋe semheni; ɀino isu tiŋgagofara here? Itȿimbo yoʋushe yomŋanakomana waŋgu, inoɀidza miti yose.

¹¹Wakapiwa kuti ubginyiswe, kuti uɓatwe nawo; munondo warodzwa, ɀirokwaɀo wabginyiswa, kuti uiswe muruʋoko rwomuʋurayi.

¹²Cema, uwuŋgudze, iwe mŋanakomana womunhu, nokuti iwe uri pamsoro paʋanhu ʋaŋgu, uri pamsoro pamacinda ose aIsraeri, akaiswa kumunondo pamŋe cete naʋanhu ʋaŋgu; naiɀoɀo uɀiroʋe pahudyu.

¹³Nokuti kuidzwa kwaʋa’po; ɀino toɗiniko kana iwo munondo, unoɀidza, wapera ʋo? — ndiɀo ɀinotaura Ishe Jehova.

¹⁴Ɀino iwe mŋanakomana womunhu, profita, roʋanya maʋoko ako; munondo ŋgauwedzerwe kuȿikira katatu, iwo munondo waʋakakuʋadzwa ɀikuru; ndiwo munondo womukuru, wakakuʋadzwa ɀikuru, unoʋamanikidza.

¹⁵Ndakaisa munondo wakavomorwa pamasuʋo aʋo ose, kuti mŋoyo yaʋo inyauswe, nokugumburwa kwaʋo kuwande; haiwa! wakaitwa semheni, wakateȿererwa kuʋuraya.

¹⁶Ɀiroŋgedze, iwe munondo, enda kurudyi, ɀigadzire uende kuruɓoshwe, kwose kunotarira matiʋi ako akarodzwa.

¹⁷Neni ʋo ndicaroʋanya maʋoko aŋgu, ndicanyaradza hasha dzaŋgu; ini Jehova, ndakaɀitaura.

¹⁸Ɀino shoko raJehova rakaȿika ɀe kwandiri, riciti:

¹⁹Ɀino iwe, mŋanakomana womunhu, ciɀitarira nzira mbiri, dziŋgaʋuya nadzo munondo wamambo weBabironi; idzedzo mbiri dzinofanira kubva kunyika imŋe; ɀino uʋeze ruʋoko, uruʋezere pakuʋamba kwenzira inoenda kuguta.

²⁰Utare nzira, iŋgaʋuya nawo munondo, kuȿikira Raba raʋana ʋaAmoni, naJuda mukati meJerusarema rakakombga noruȿiŋgo.

²¹Nokuti mambo weBabironi wakaŋga amire pamharadzano dzenzira, pakuʋamba kwenzira mbiri, kuti abvunze nokuʋuka; akazunuŋgusa miseʋe, akabvunza terafimi, ndokucerekedza ciropa.

²²Muruʋoko rwake rworudyi makaŋga muneɀakaʋukwa pamsoro peJerusarema, kuti ʋaise ɀokugumura, ʋashamise muromo unoɗanira kuʋuraya, ʋaɗanidzire kwaɀo namanzwi, ʋaise ɀokugumura pamasuʋo, ʋatutire mirwi yokurwa, ʋaʋakire nhare dzokurwa.

²³Asi ɀicaʋa kwaʋari sokuʋuka kwenhema pamberi paʋo, iʋo ʋakaʋapikira mhiko; asi iye ucaraŋgarira kusarurama kwaʋo, kuti ʋaɓatwe.

²⁴Naiɀoɀo ɀanzi naShe Jehova: Ɀamakandiyeʋudzira ɀakaipa ɀenyu, kuɗarika kwenyu ɀakwakafukurwa, ɀiʋi ɀenyu ɀiciʋonekwa paneɀose ɀamunoita, ɀamakaraŋgarirwa, mucaɓatwa noruʋoko.

²⁵Ɀino iwe, iwe wakaipa, wakakuʋadzwa ɀikuru, mucinda waIsraeri, wakaȿikirwa nezuʋa rako paŋguʋa yeɀakaipa ɀokupedzisira,

²⁶ɀanzi naShe Jehova: Ŋgowani yoʋuprista inofanira kubva, korona inofanira kubva, haɀiŋgarambi ɀiri’po; kwiridzai ɀiri pasi, muɗeredze ɀiri kumsoro.

²⁷Matoŋgo, matoŋgo, ndicaɀiita matoŋgo, neɀiɀi haɀiŋgarambi ɀiri’po, kuȿikira iye mŋene waɀo aciȿika; ndicamupa iye iɀo.

²⁸Ɀino iwe mŋanakomana womunhu, ciprofita, uti: Ɀanzi naShe Jehova pamsoro paʋana ʋaAmoni, pamsoro pokushoʋorwa kwaʋo; iwe uti: Munondo, munondo wavomorwa, wabginyisirwa kuʋuraya, kuti upedze, uʋe semheni;

²⁹ʋacikuʋonera ɀakaratidzwa ɀenhema, ʋacikuʋukira nhema, kuti uiswe pamitsipa yaʋakaipa ʋakakuʋadzwa ɀikuru, ʋaȿikirwa nezuʋa raʋo paŋguʋa yeɀakaipa ɀokupedzisira.

³⁰Ŋgaudzoserwe mumuhara wawo. Apo pawakasikwa iwe, panyika yawakaɓerekerwa, ndi’po pandicakutoŋga.

³¹Ndicaɗurura kutsamŋa kwaŋgu pamsoro pako, ndicafuridzira pamsoro pako nomŋoto wehasha dzaŋgu, ndicakuisa mumaʋoko aʋanhu ʋanopeŋga, ʋanoziʋa kwaɀo kuparadza.

³²Iwe ucaʋa huni dzomŋoto; ropa rako ricaʋa pakati penyika; haucazoraŋgarirwi, nokuti ini Jehova ndakaɀitaura.