Read Original Shona Union Bible 1949 Baiberi Magwaro Matȿene aMŋari Hosea 2 Bible Online

Hosea 2 - Original Shona Union Bible 1949 Baiberi Magwaro Matȿene aMŋari bible

Hosea 2

¹Itiyi kuʋanuŋuna ʋenyu: Ami; nokuhanɀadzi dzenyu: Ruhama.

²Kakaʋarai namai ʋenyu, kakaʋarai; nokuti haazi mukadzi waŋgu, neni handizi murume wake; ŋgaabvise kufeʋa kwake paciso cake, nokupata kwake pakati pamazamu ake;

³kuti ndirege kumukumurira ŋguʋo dzake dzose, ndimuite seɀaakaŋga akaita nezuʋa rokuɀarwa kwake, ndimuite serenje, ndimushandure aʋe nyika yakawoma, ndimuʋuraye nenyota.

⁴Ɀirokwaɀo handiŋganzwiri ʋana ʋake nyasha, ɀaʋari ʋana ʋoʋufeʋe;

⁵nokuti mai ʋaʋo ʋakafeʋa; wakaʋaɓereka wakaita ɀinonyadzisa, nokuti wakati: Ndicateʋera ʋaɗikani ʋaŋgu, ʋanondipa ɀokudya ɀaŋgu nemvura yaŋgu, namakushe aŋgu necinda yaŋgu, namafuta aŋgu neɀokunwa ɀaŋgu.

⁶Naiɀoɀo tarira, ndicasosera nzira yako neminzwa, ndicamuʋakira ruȿiŋgo, kuti arege kuwana nzira dzake.

⁷Ucateʋera ʋaɗikani ʋake, asi haaŋgaʋaɓati; ucaʋatȿaka, asi haaŋgaʋawani; ipapo ucati: Ndicadzokera kumurume waŋgu wokutaŋga, nokuti neŋguʋa iyo ndaifara kupfuʋura ɀino.

⁸Nokuti wakaŋga asiŋgaziʋi kuti ndini ndaimupa ɀiyo, newaini itȿa, namafuta, nokumuwanzira sirveri nendarama, ɀaʋaiɓatira Baari naɀo.

⁹Saka ndicamutorera ɀiyo ɀaŋgu neŋguʋa yaɀo, newaini yaŋgu itȿa nenhambo yaɀo, ndicabvisa makushe aŋgu necinda yaŋgu ɀaifanira kufukidza kushama kwake.

¹⁰Ɀino ndicafukura kunyadzisa kwake pamberi paʋaɗikani ʋake, hakuna‐uŋgamurwira paruʋoko rwaŋgu.

¹¹Ndicagumisa ʋo mufaro wake wose, nemitambo yake, neŋguʋa dzake dzokugara kwomŋedzi, namasaɓata ake, neʋuŋgano dzake dzose dzakatarwa.

¹²Ndicaparadza mizambiriŋga yake nemiʋonde yake, yaaiti: Ndiwo muɓairo waŋgu wandakapiwa naʋaɗikani ʋaŋgu; ndicaɀiita ɗondo, mhuka dzokusaŋgo dzicaɀidya.

¹³Ndicamuraŋga nokuɗa kwamazuʋa aʋaBaari, ʋaaipisira ɀinonhuwira, acishoŋga ɀindori ɀake ɀenzeʋe neɀishoŋgo ɀake, akateʋera ʋaɗikani ʋake, akandikaŋganwa — ndiɀo ɀinotaura Jehova.

¹⁴Saka tarirai, ndicamunyeŋgera nokumuisa kurenje, ndicitaura ɀinofadza mŋoyo wake.

¹⁵Ndicamupa minda yake yemizambiriŋga ɀicibva ipapo, nomupata waAkori uʋe mukoʋa wetariro kwaari; ucapindura ari’po, sapamazuʋa oʋusikana bgake, ʋuye sapazuʋa raakaɓuɗa panyika yeEgipita.

¹⁶Ɀino nezuʋa iro — ndiɀo ɀinotaura Jehova — ucandiidza Ishi, hauŋgazondiidzi Baari.

¹⁷Nokuti ndicabvisa mazita aʋaBaari mumuromo make, haʋaŋgazozikanwi namazita aʋo.

¹⁸Nezuʋa iro ndicaʋaitira suŋgano nemhuka dzokusaŋgo, neshiri dzokuɗeŋga, neɀinokambaira ɀapasi; ndicavuna ʋuta nomunondo nehondo panyika, ndiʋaʋatise pasi ʋakaceŋgetwa.

¹⁹Ndicakunyeŋga uʋe waŋgu nokusiŋgaperi; ɀirokwaɀo ndicakunyeŋga uʋe waŋgu nokururama, nokururamisira, noʋunyoro, nenyasha.

²⁰Ndicakunyeŋga uʋe waŋgu nokutendeka; ipapo ucaziʋa Jehova.

²¹Ɀino nezuʋa iro ndicapindura — ndiɀo ɀinotaura Jehova — ndicapindura ɗeŋga rose, iro ricapindura nyika;

²²nyika icapindura ɀiyo, newaini itȿa, namafuta; iɀo ɀicapindura Jezreeri.

²³Ndicaɀisimira iye panyika; ndicamunzwira nyasha, iye wakaŋga asina‐kunzwirwa nyasha; ndicati kunaiʋo ʋakaŋga ʋasi ʋanhu ʋaŋgu: Imi muri ʋanhu ʋaŋgu, iʋo ʋacati: Imi muri Mŋari waŋgu.