Read Original Shona Union Bible 1949 Baiberi Magwaro Matȿene aMŋari Deuteronomio 3 Bible Online

Deuteronomio 3 - Original Shona Union Bible 1949 Baiberi Magwaro Matȿene aMŋari bible

Deuteronomio 3

¹Ɀino takadzoka, tikakwira nenzira inoenda Bashani; Ogi, mambo weBashani, akaɓuɗa, iye naʋanhu ʋake ʋose, kuzorwa nesu paEdrei.

²Jehova akati kwandiri: Usamutya, nokuti ndakamuisa paruʋoko rwako, iye naʋanhu ʋake ʋose, nenyika yake; unofanira kuita naye seɀawakaitira Sihoni, mambo waʋaAmori, wakaŋga agere Heshboni.

³Naiɀoɀo Jehova Mŋari weɗu wakaisa mumaʋoko eɗu naiye Ogi ʋo, mambo weBashani, naʋanhu ʋake ʋose; tikamukunda kuȿikira asinomunhu waakasiyirwa.

⁴Neŋguʋa iyo tikakunda maguta ake ose; kwakaŋga kusineguta rimŋe ratisina‐kumutorera, maguta anamakumi matanhatu, nenyika yose yeArgobi, noʋushe bgaOgi muBashani.

⁵Iwo akaŋga ari maguta akapoteredzwa ose namaȿiŋgo marefu, namasuʋo, namazariro, kunze kwemisha mizhinji‐zhinji yakaŋga isinamaȿiŋgo.

⁶Tikaaparadza cose, seɀatakaitira Sihoni, mambo weHeshboni, tikaparadza cose maguta ose akaŋga anaʋanhu, pamŋe cete naʋakadzi naʋana ʋaɗuku.

⁷Asi ɀipfuwo ɀose, neɀakapambga pamaguta awo, iɀo takaɀitapa isu.

⁸Neŋguʋa iyo takatorera madzimambo maʋiri aʋaAmori, ʋakaŋga ʋagere mhiri kwaJoridani, nyika yaʋo kubva parwizi Arnoni, kuȿikira pagomo reHermoni;

⁹(Hermoni rinotumidzwa Sirioni naʋaSidoni, asi ʋaAmori ʋanoritumidza Seniri;)

¹⁰maguta ose eɓani, neGireadi rose, neBashani rose, kuȿikira paSareka neEdrei, iwo maguta oʋushe bgaOgi muBashani.

¹¹(Nokuti Ogi, mambo weBashani, ndiye woga wakaŋga asara kunaʋakaŋga ʋasara ʋaʋaRefaimi; mubeda wake wakaŋga uri wamatare; ko hauzi paRaba raʋana ʋaAmoni here? Kureɓa kwawo kwakaŋga kuciȿika pamakubiti[1] mapfumbamŋe, noʋupamhi bgawo pamakubiti manna, kana ɀicienzaniswa nekubiti romunhu.)

¹²Nyika iyi takaitora neŋguʋa iyo, ikaʋa yeɗu; ndikapa ʋaRubeni naʋaGadi nyika inobva paAroeri, parwizi Arnoni, nehafu yenyika yamakomo yeGireadi, namaguta ayo;

¹³ndikapa hafu yorudzi rwaManase pakaŋga pasara paGireadi, neBashani rose, ʋushe bgaOgi, nenyika yose yeArgobi, ndiro Bashani rose. (Ndiyo inonzi nyika yaʋaRefaimi.

¹⁴Jairi, mŋanakomana waManase, akatora nyika yose yeArgobi, kuȿikira pamuganho waʋaGeshuri naʋaMaakati, akaitumidza, iro Bashani rose, zita rake, Havoti‐jairi, kuȿikira nhasi.)

¹⁵Ndikapa Makiri Gireadi.

¹⁶Asi ʋaRubeni naʋaGadi ndakaʋapa kubva paGireadi kuȿikira parwizi Arnoni, ʋuye pakati pomupata nenyika yawo, kuȿikira parwizi Jaboki, ndiyo nyika yaʋana ʋaAmoni.

¹⁷Ʋuye noMupata, neJoridani, nenyika inobva paKinereti, kuȿikira kuguŋgwa roMupata, ndiro Guŋgwa roMunyu, pajiŋga pegomo rePisga, kumabvazuʋa.

¹⁸Neŋguʋa iyo ndakakurairai, ndikati: Jehova Mŋari wenyu wakakupai nyika iyo kuti iʋe yenyu; ɀino munofanira kuyambuka pamberi pehama dzenyu, ʋana ʋaIsraeri, makashoŋga nhumbi dzokurwa, imi ʋarume ʋose mhare.

¹⁹Asi ʋakadzi ʋenyu, naʋana ʋenyu ʋaɗuku, neɀipfuwo ɀenyu (ndinoziʋa kuti muneɀipfuwo ɀizhinji), iɀo ɀinofanira kusara mumaguta andakakupai;

²⁰kuȿikira Jehova apa hama dzenyu zororo semi, kuti naiʋo ʋaʋe nenyika yaʋanopiwa naJehova Mŋari wenyu mhiri kwaJoridani; ipapo muŋgadzokera mumŋe nomumŋe kunhaka yake, yandakakupai.

²¹Neŋguʋa iyo ndikaraira ʋo Joshua, ndikati: Meso ako akaʋona ɀose ɀakaitirwa madzimambo awa maʋiri naJehova Mŋari wenyu; saiɀoɀo Jehova ucaitira ʋushe bgose kwamunoyambuka.

²²Hamufaniri kuʋatya, nokuti Jehova Mŋari wenyu ndiye unokurwirai.

²³Neŋguʋa iyo ndikanyeŋgetera kunaJehova, ndikati:

²⁴Imi Jehova Mŋari, makataŋga kuratidza muranda wenyu ʋukuru bgenyu, noruʋoko rwenyu runesimba; nokuti ndoupiko mŋari kuɗeŋga kana panyika uŋgaita ɀakafanana namaɓasa enyu, nesimba renyu?

²⁵Ƌonditenderai henyu kuyambuka, ndiʋone nyika yakanaka iri mhiri kwaJoridani, negomo iro rakanaka, neRebanoni.

²⁶Asi Jehova wakanditsamŋira nokuɗa kwenyu, akasandinzwa; Jehova akati kwandiri: Ɀariŋgana! cirega kuzotaura ɀe neni pamsoro peshoko iro.

²⁷Kwira pamsoro‐soro pePisga, utarire kumaʋirazuʋa, nokumsoro, nezasi, nokumabvazuʋa, uʋone nameso ako; nokuti hauŋgayambuki Joridani urwu.

²⁸Asi raira Joshua, umutse mŋoyo wake nokumusimbisa, nokuti iye ucayambuka pamberi paʋanhu aʋa, iye ucaʋagarisa nhaka yenyika yaucaʋona.

²⁹Ɀino tikagara pamupata wakatarisana neBeti‐peori.