Read Original Shona Union Bible 1949 Baiberi Magwaro Matȿene aMŋari Deuteronomio 4 Bible Online

Deuteronomio 4 - Original Shona Union Bible 1949 Baiberi Magwaro Matȿene aMŋari bible

Deuteronomio 4

¹Ɀino imi ʋana ʋaIsraeri, tererai ɀakatemŋa neɀakatoŋgwa, ɀandinokudzidzisai, kuti muɀiite; kuti murarame, mupinde mutore nyika, yamunopiwa naJehova, Mŋari wamadziɓaɓa enyu.

²Musawedzera kana kutapudza pashoko randinokurairai, kuti muceŋgete mirairo yaJehova Mŋari wenyu, yandinokurairai.

³Meso enyu akaʋona ɀakaitwa naJehova nokuɗa kweɀakaitwa paBaari‐peori; nokuti ʋarume ʋose ʋakateʋera Baari‐peori, Jehova Mŋari wenyu wakaʋaparadza pakati penyu.

⁴Asi imi, makanamatira Jehova Mŋari wenyu, imi mose muri ʋapenyu kuȿikira nhasi.

⁵Tarirai, ndakakudzidzisai ɀakatemŋa neɀakatoŋgwa, seɀandarairwa naJehova Mŋari waŋgu, kuti muite saiɀoɀo panyika yamunopinda, kuti iʋe yenyu.

⁶Naiɀoɀo muceŋgete iɀoɀo, muɀiite; nokuti ndiko kucenjera kwenyu nokuŋgwara kwenyu pamberi paʋanhu ʋacanzwa ɀose iɀi ɀakatemŋa, ʋaciti: Ɀirokwaɀo, rudzi urwu rukuru ndiʋanhu ʋakacenjera ʋakaŋgwara.

⁷Nokuti rudzi rukuru ruripiko, runamŋari uri pedyo naʋo, saJehova Mŋari weɗu ŋguʋa ipi neipi yatinoɗana kwaari?

⁸Rudzi rukuru ruripiko, runeɀakatemŋa neɀakatoŋgwa ɀakarurama somurairo uyu wose, wandinoisa pamberi penyu nhasi?

⁹Asi ɀicenjererei, mushiŋgaire kuceŋgeta mŋeya yenyu, kuti murege kukaŋganwa ɀinhu ɀamakaʋona nameso enyu, ɀirege kuzobva pamŋoyo yenyu mazuʋa ose oʋupenyu bgenyu; asi munofanira kuɀiziʋisa ʋana ʋenyu naʋana ʋaʋana ʋenyu;

¹⁰musi wamakaŋga mumire pamberi paJehova Mŋari wenyu paHorebi, musi Jehova waakati kwandiri: Ndiʋuŋganidzire ʋanhu, ndiʋaʋudze mashoko aŋgu, kuti ʋadzidze kunditya mazuʋa ose aʋacagara panyika, ʋagodzidzisa ʋana ʋaʋo ʋo.

¹¹Imi mukasweɗera, mukamira pajiŋga pegomo; gomo rikapfuta nomŋoto kuȿikira pakati peɗeŋga, pamŋe cete nerima, negore, nokuȿiɓa kukuru.

¹²Ɀino Jehova wakataura nemi ari mukati momŋoto; mukanzwa inzwi ramashoko, asi hamuna‐kuʋona kuti wakaɗini; makanzwa inzwi roga.

¹³Ipapo wakaɗudzira suŋgano yake kwamuri, yaakakurairai, kuti muiite, iyo mirairo inegumi; akainyora pamahwendefa maʋiri amabge.

¹⁴Neŋguʋa iyo Jehova akandiraira, kuti ndikudzidzisei ɀakatemŋa neɀakatoŋgwa, kuti mundoɀiita panyika iyo, kwamunoenda, kuzoiita yenyu.

¹⁵Naiɀoɀo ɀicenjererei ɀikuru, nokuti hamuna‐kuʋona kuti wakaŋga akaɗini, musi Jehova waakataura nemi paHorebi ari pakati pomŋoto.

¹⁶Kuti murege kuɀishatsa, muciɀiitira cifananidzo cakaʋezwa, cakafanana necinhu cipi necipi, kana mufananidzo womurume kana womukadzi,

¹⁷Kana mufananidzo wemhuka ipi neipi iri panyika, kana mufananidzo weshiri ipi neipi inamapapiro, inobururuka muɗeŋga,

¹⁸kana mufananidzo wecinhu cipi necipi cinokambaira pasi, kana mufananidzo wehoʋe ipi neipi iri mumvura pasi penyika;

¹⁹kuti murege kusimudzira meso enyu kuɗeŋga, ɀino kana muciʋona zuʋa nomŋedzi nenyeredzi, hondo yose yokuɗeŋga, mukatsauswa mukanamata kwaɀiri nokuɀishumira, iɀo ɀakagoʋerwa ndudzi dzose dziri pasi peɗeŋga naJehova Mŋari wenyu.

²⁰Asi Jehova wakakutorai imi, akakuɓuɗisai mucoto camatare, paEgipita, kuti muʋe ʋanhu ʋenhaka yake, seɀamuri nhasi.

²¹Jehova akanditsamŋira ʋo nokuɗa kwenyu, akapika kuti ini handiŋgayambuki Joridani, ndipinde munyika iyo yakanaka, yamunopiwa naJehova Mŋari wenyu, kuti iʋe yenyu.

²²Asi ini ndinofanira kufira munyika ino, handifaniri kuyambuka Joridani; asi imi mucayambuka henyu, mukapiwa nyika iyo yakanaka.

²³Muɀicenjerere, kuti murege kukaŋganwa suŋgano yaJehova Mŋari wenyu, yaakaita nemi, mukaɀiitira cifananidzo cakaʋezwa comufananidzo wecinhu cipi necipi, cawakadziʋiswa naJehova Mŋari wako.

²⁴Nokuti Jehova Mŋari wako, mŋoto unoparadza, naMŋari unegoɗo.

²⁵Ɀino kana iwe waɓereka ʋana naʋazukuru, mukagara ŋguʋa huru panyika, mukaɀishatsa, mukaita cifananidzo cakaʋezwa nomufananidzo wecinhu cipi necipi, mukaita ɀakaipa pamberi paJehova Mŋari wako, mukamutsamŋisa;

²⁶ini ndinoɗana ɗeŋga napasi ɀikupupurirei nhasi, kuti mucakurumidza kuparadzwa cose panyika yamunoyambukira Joridani kuti muende kwairi kuiita yenyu; hamuŋgaiti’mo mazuʋa mazhinji, asi mucaparadzwa cose.

²⁷Jehova ucakuparadzirai pakati pendudzi, mucasara muri ʋashoma pakati pendudzi, kwamucandoiswa naJehova.

²⁸Apo mucashumira ʋamŋari, ʋakaitwa namaʋoko aʋanhu, ʋamatanda naʋamabge, ʋasiŋgaʋoni, kana kunzwa, kana kudya, kana kunhuwidza.

²⁹Asi kana mukazotȿaka Jehova Mŋari wako, ipapo, ucamuwana, kana ukamutȿaka nomŋoyo wako wose nomŋeya wako wose.

³⁰Ɀino kana uri munjodzi, ɀinhu iɀi ɀose ɀakuwira, pamazuʋa okupedzisira ucadzokera kunaJehova Mŋari wako, ukaterera inzwi rake.

³¹Nokuti Jehova Mŋari wako ndiMŋari unenyasha; haaŋgakusiyi, kana kukuparadza, kana kukaŋganwa suŋgano yamadziɓaɓa ako, yaakaʋapikira.

³²Nokuti bvunzai henyu ɀino pamazuʋa akapfuʋura, imi musati maʋa’po, kubva pazuʋa rokusikwa kwaʋanhu panyika naMŋari, kubva panorumŋe rutiʋi rweɗeŋga kuȿikira kunorumŋe, kana kwaimboʋa’po cinhu cikuru cakaɗai, kunyaŋge kumbonzwika cakaɗai?

³³Ko kunaʋanhu, ʋakambonzwa inzwi raMŋari ricitaura riri mukati momŋoto, seɀamakanzwa imi, ʋakararama here?

³⁴Kana Mŋari wakatoŋgoidza kundoɀitsaurira rudzi pakati porumŋe rudzi, nemiidzo, neɀiratidzo, neɀinoshamisa, nehondo, necanza cinesimba, noruʋoko rwakatambanudzwa, neɀinotyisa kwaɀo, seɀamakaʋona ɀamakaitirwa ɀose naJehova paEgipita here?

³⁵Imi makaratidzwa iɀoɀo, kuti muziʋe kuti Jehova ndiye Mŋari; hakunomumŋe kunze kwake.

³⁶Wakakunzwisai inzwi rake ari kuɗeŋga, kuti akudzidzise; panyika wakakuʋonesa mŋoto wake mukuru; iwe wakanzwa mashoko ake ari mukati momŋoto.

³⁷Wakaɗa madziɓaɓa ako, naiɀoɀo akaɀitsaurira ʋana ʋaʋo ʋakaʋateʋera, akakuɓuɗisa paEgipita, iye anewe nesimba rake guru;

³⁸kuti adziŋge pamberi pako ndudzi dzinokupfuʋura noʋukuru nesimba, akupinze iwe, akupe nyika yaʋo iʋe nhaka yako, seɀaakaita nhasi.

³⁹Naiɀoɀo uziʋe nhasi, uɀiceŋgete mumŋoyo mako, kuti Jehova ndiye Mŋari kuɗeŋga kumsoro napanyika pasi; hakunomumŋe.

⁴⁰Unofanira kuceŋgeta ɀaakatema, nemirairo yake, yandinokuraira nhasi, kuti ufare iwe naʋana ʋako ʋanokuteʋera, kuti uwedzere mazuʋa ako panyika yaunopiwa naJehova Mŋari wako nokusiŋgaperi.

⁴¹Ɀino Mosesi akatsaura maguta matatu mhiri kwaJoridani kumabvazuʋa;

⁴²kuti muʋurayi agone kutizira’ko, iye wakaʋuraya wokwake, asina‐kuita nobgoni, asina‐kumuʋeŋga kare; kuti kana aciŋge atizira kunerimŋe ramaguta iwayo, ararame;

⁴³aiti: Bezeri murenje, kunyika yamapani, waʋaRubeni, neRamoti paGireadi, waʋaGadi, neGorani paBashani, waʋaManase.

⁴⁴Ɀino ndiwo murairo wakaiswa naMosesi pamberi paʋana ʋaIsraeri:

⁴⁵Ndiɀo ɀakapupurwa, neɀakatemŋa, neɀakatoŋgwa, ɀakataurwa naMosesi kuʋana ʋaIsraeri, pakuɓuɗa kwaʋo Egipita;

⁴⁶ʋari kumabvazuʋa kwaJoridani, pamupata wakatarisana neBeti‐peori, munyika yaSihoni, mambo waʋaAmori, wakaŋga agere Heshboni, iye wakakundwa naMosesi naʋana ʋaIsraeri, pakuɓuɗa kwaʋo Egipita;

⁴⁷ʋakatora nyika yake, nenyika yaOgi, mambo weBashani, ikaʋa yaʋo; iwo madzimambo maʋiri aʋaAmori, ʋakaŋga ʋari mhiri kwaJoridani, kumabvazuʋa;

⁴⁸kubva paAroeri, pamuʋuyo womupata weArnoni, kuȿikira pagomo reSioni (ndiro Hermoni),

⁴⁹noMupata wose uri mhiri kwaJoridani kumabvazuʋa, kuȿikira paguŋgwa romupata, pajiŋga pePisga.