Read Original Shona Union Bible 1949 Baiberi Magwaro Matȿene aMŋari Joshua 10 Bible Online

Joshua 10 - Original Shona Union Bible 1949 Baiberi Magwaro Matȿene aMŋari bible

Joshua 10

¹Ɀino Adoni‐zedeki, mambo weJerusarema, wakati acinzwa kuti Joshua wakakunda Ai, akariparadza cose, ʋuye kuti wakaitira Ai namambo waro seɀaakaitira Jeriko namambo waro, ʋuye kuti ʋanhu ʋeGibeoni ʋakaŋga ʋayanana naʋaIsraeri, ʋakagara pakati paʋo;

²ʋakatya kwaɀo, nokuti Gibeoni rakaŋga riri guta guru, rakaŋga rakaita somumŋe wemizinda yamambo; ʋuye nokuti rakaŋga riri guru kupfuʋura Ai, naʋarume ʋaro ʋose ʋakaŋga ʋanesimba.

³Naiɀoɀo Adoni‐zedeki, mambo weJerusarema, akatuma nhume kunaHohami, mambo weHebroni, nokunaPirami, mambo weJarmuti, nokunaJafia, mambo weRakishi, nokunaDebiri, mambo weEgroni, akati:

⁴Kwirai kwandiri, mundiɓatsire, tirwe naʋaGibeoni, nokuti ʋakayanana naJoshua naʋana ʋaIsraeri.

⁵Naiɀoɀo madzimambo mashanu aʋaAmori, ʋaiti mambo weJerusarema, namambo weHebroni, namambo weJarmuti, namambo weRakishi, namambo weEgroni ʋakaʋuŋgana, ʋakaenda iʋo nehondo dzaʋo dzose, ʋakaʋaka misasa yaʋo pamberi peGibeoni, ʋakarwa naro.

⁶Ipapo ʋarume ʋeGibeoni ʋakatuma nhume kunaJoshua kumisasa yakaŋga iri paGirgari, ʋakati: Musaregerera henyu ʋaranda ʋenyu; kurumidzai mukwire kwatiri, mutirwire nokutiɓatsira, nokuti madzimambo ose aʋaAmori ʋagere munyika yamakomo ʋakatiʋuŋganira kuzorwa nesu.

⁷Ipapo Joshua akakwira acibva Girgari, iye naʋanhu ʋose ʋehondo ʋaakaŋga anaʋo, naʋarume ʋose ʋaiʋa nesimba noʋumhare.

⁸Jehova akati kunaJoshua: Usaʋatya, nokuti ndaʋaisa mumaʋoko ako; hakunomunhu ucagona kumira pamberi pako.

⁹Naiɀoɀo Joshua akaʋarwira pakarepo; akafamba ʋusiku bgose acibva Girgari.

¹⁰Ɀino Jehova akaʋavundusa pamberi paIsraeri, akaʋaʋuraya nokuʋuraya kukuru paGibeoni, akaʋadziŋgirira nenzira yaikwira Beti‐horoni, akaʋaparadza kuȿikira Azeka, nokuȿikira Makeda.

¹¹Ɀino ʋakati ʋacitiza pamberi paʋaIsraeri, ʋari pamatenusirwa anoɓurukira Beti‐horoni, Jehova akakanda pamsoro paʋo mabge makuru akaŋga acibva kuɗeŋga, kuȿikira Azeka, ʋakafa; iʋo, ʋakafa necimvuramabge, ʋakaŋga ʋari ʋazhinji kunaʋakaʋurawa neminondo naʋana ʋaIsraeri.

¹²Ɀino Joshua akataura naJehova nomusi Jehova waakaisa ʋaAmori mumaʋoko aʋana ʋaIsraeri, akati pamberi paʋaIsraeri: Iwe zuʋa mira pamsoro peGibeoni, Newe mŋedzi pamupata weAjaroni.

¹³Zuʋa rikamira, nomŋedzi ukarambira’po, Kuȿikira rudzi rwatsiʋa ʋaʋeŋgi ʋarwo. Iɀi haɀina‐kunyorwa here mubuku yaJashari? Zuʋa rikaramba rimire pakati peɗeŋga, rikasakurumidza kuʋira ŋguʋa yakaita sezuʋa rose.

¹⁴Hakuna‐kumboʋa nezuʋa rakaɗaro kubva pakutaŋga kana shure kwaro, kuti Jehova wakaterera inzwi romunhu; nokuti Jehova wakarwira Israeri.

¹⁵Joshua akadzokera naʋaIsraeri ʋose kumisasa paGirgari.

¹⁶Madzimambo awo mashanu akatiza, ʋakandoʋanda muɓako paMakeda.

¹⁷Joshua akaʋudzwa, ɀicinzi: Madzimambo iwayo mashanu akawanikwa, akaʋanda muɓako paMakeda.

¹⁸Ɀino Joshua akati: Kuŋgurusai mabge makuru pamuromo weɓako, nokuisa ʋarume ipapo kuʋarinda.

¹⁹Asi imi musamira henyu; teʋerai ʋaʋeŋgi ʋenyu, mundoʋuraya ʋeshure ʋaʋo; musaʋatendera kupinda mumaguta aʋo, nokuti Jehova Mŋari wenyu wakaʋaisa mumaʋoko enyu.

²⁰Ɀino Joshua naʋana ʋaIsraeri ʋakati ʋapedza kuʋaʋuraya nokuʋuraya kukuru, kuȿikira ʋaparadzwa, naʋakaŋga ʋasara kwaʋari ʋapinda mumaguta akaʋakirwa maȿiŋgo;

²¹ʋanhu ʋose ʋakadzokera kumisasa kunaJoshua paMakeda norugare; hakunomunhu wakasimudzira mumŋe waʋana ʋaIsraeri rurimi rwake.

²²Ɀino Joshua akati: Zarurai muromo weɓako, muɓuɗise madzimambo mashanu iwayo muɓako muʋuye nawo kwandiri.

²³Iʋo ʋakaita saiɀoɀo, ʋakaɓuɗisa madzimambo iwayo mashanu muɓako ʋakaʋuya naʋo kwaari, ʋaiti mambo weJerusarema, namambo weHebroni, namambo weJarmuti, namambo weRakishi, namambo weEgroni.

²⁴Ɀino ʋakati ʋaɓuɗisa madzimambo iwayo ʋakaʋuya naʋo kunaJoshua, Joshua akaɗana ʋarume ʋose ʋaIsraeri, akati kuʋakuru nehondo ʋakaŋga ʋanaye: Sweɗerai, muise tsoka dzenyu pamitsipa yamadzimambo awa. Iʋo ʋakasweɗera, ʋakaisa tsoka dzaʋo pamitsipa yaʋo.

²⁵Ɀino Joshua akati kwaʋari: Musatya, kana kuvunduswa; simbai mutsuŋge mŋoyo, nokuti Jehova ucaita saiɀoɀo naʋaʋeŋgi ʋenyu ʋose, ʋamunorwa naʋo.

²⁶Pashure Joshua akaʋaɓaya, akaʋaʋuraya, ndokuʋasuŋgirira pamiti mishanu; ʋakaramba ʋakasuŋgirirwa pamiti kuȿikira maɗekwana.

²⁷Neŋguʋa yokuʋira kwezuʋa Joshua akaraira ʋanhu, ʋakaʋaturura pamiti, ʋakaʋakandira muɓako maʋakaŋga ʋakaʋanda, ʋakaisa mabge makuru pamuromo weɓako; ari’po kuȿikira zuʋa rino ranhasi.

²⁸Joshua akakunda Makeda nomusi iwoyo, akariparadza neminondo inopinza, namambo waro; akaʋaparadza cose naʋanhu ʋose ʋakaŋga ʋari’mo; haana‐kusiya kunyaŋge nomumŋe; akaitira mambo weMakeda seɀaakaitira mambo weJeriko.

²⁹Ɀino Joshua akabva Makeda, iye naʋaIsraeri ʋose ʋaakaŋga anaʋo, ʋakaenda Ribna ʋakarwa neRibna;

³⁰Jehova akariisa ʋo namambo waro mumaʋoko aIsraeri; akariparadza neminondo inopinza, naʋanhu ʋose ʋakaŋga ʋari’mo; haana‐kusiya’mo kunyaŋge nomumŋe; akaitira mambo waro seɀaakaitira mambo weJeriko.

³¹Ɀino Joshua akabva Ribna, iye naʋaIsraeri ʋose ʋaakaŋga anaʋo, ʋakaenda Rakishi, ʋakaʋaka misasa yaʋo pedyo naro, ʋakarwa naro;

³²Jehova akaisa Rakishi mumaʋoko aʋaIsraeri, akarikunda nezuʋa repiri, akariparadza neminondo inopinza, naʋanhu ʋose ʋakaŋga ʋari’mo, seɀose ɀaakaitira Ribna.

³³Ɀino Horami, mambo weGezeri, wakakwira kuzoɓatsira Rakishi; Joshua akamuʋuraya naʋanhu ʋake, kuȿikira asina‐kumusiyira kunyaŋge nomunhu mumŋe.

³⁴Ɀino Joshua akabva Rakishi, iye naʋaIsraeri ʋose ʋaakaŋga anaʋo, ʋakaenda Egroni; ʋakaʋaka misasa yaʋo pedyo naro, ʋakarwa naro;

³⁵ʋakarikunda nomusi iwoyo, ʋakariparadza neminondo inopinza; ʋakaparadza cose nomusi iwoyo ʋanhu ʋose ʋakaŋga ʋari’mo, seɀose ɀaakaitira Rakishi.

³⁶Ɀino Joshua akabva Egroni, iye naʋaIsraeri ʋose ʋaakaŋga anaʋo, ʋakaenda Hebroni, ʋakarwa naro;

³⁷ʋakarikunda, nokuriparadza neminondo inopinza, namambo waro, namaguta aro ose, naʋanhu ʋose ʋakaŋga ʋari’mo; haana‐kusiya kunyaŋge nomumŋe, seɀose ɀaakaitira Egroni; asi wakariparadza cose naʋanhu ʋose ʋakaŋga ʋari’mo.

³⁸Ɀino Joshua akadzokera Debiri, naʋaIsraeri ʋose ʋaakaŋga anaʋo; ʋakarwa naro;

³⁹akarikunda, namambo waro, namaguta aro ose; ʋakaʋaʋuraya neminondo inopinza, nokuparadza cose ʋanhu ʋose ʋakaŋga ʋari’mo; haana‐kusiya kunyaŋge nomumŋe; seɀaakaitira Hebroni, ndiɀo ɀaakaitira Debiri ʋo, namambo waro; seɀaakaitira ʋo Ribna namambo waro.

⁴⁰Saiɀoɀo Joshua wakaparadza nyika yose, nyika yamakomo neyenyasi, neyamapani, neyemitenusirwa, namadzimambo adzo ose, haana‐kusiya kunyaŋge nomumŋe; asi wakaparadza ɀose ɀipenyu, seɀakaraira Jehova Mŋari waIsraeri.

⁴¹Joshua akaʋaparadza kubva Kadeshi‐barnea kuȿikira Gaza, nenyika yose yeGosheni kuȿikira Gibeoni.

⁴²Madzimambo iwayo ose nenyika dzawo akakundwa naJoshua neŋguʋa imŋe, nokuti Jehova Mŋari waIsraeri wakarwira Israeri.

⁴³Ipapo Joshua akadzokera kumisasa paGirgari, iye naʋaIsraeri ʋose ʋaakaŋga anaʋo.