Read Original Shona Union Bible 1949 Baiberi Magwaro Matȿene aMŋari Joshua 14 Bible Online

Joshua 14 - Original Shona Union Bible 1949 Baiberi Magwaro Matȿene aMŋari bible

Joshua 14

¹Ndidzo nhaka dzakagamucirwa naʋana ʋaIsraeri panyika yeKanani, dzaʋakagoʋerwa nomuprista Ereazari, naJoshua mŋanakomana waNuni, naʋakuru ʋedzimba dzamadziɓaɓa amarudzi aʋana ʋaIsraeri.

²Ʋakagoʋerwa nhaka yaʋo nemijenya, seɀaʋakarairwa naJehova nomuromo waMosesi, nhaka yamarudzi mapfumbamŋe nehafu.

³Nokuti Mosesi wakaŋga apa marudzi maʋiri nehafu nhaka yaʋo mhiri kwaJoridani; asi ʋaRevi haana‐kuʋapa nhaka pakati paʋo.

⁴Nokuti ʋana ʋaJosefa ʋakaŋga ʋanamarudzi maʋiri, rwaManase norwaEfraimi; haʋana‐kupa ʋaRevi mugoʋe munyika iyo, asi maguta maʋaŋgagara, namafuro awo eŋombe dzaʋo nefuma yaʋo.

⁵Ʋana ʋaIsraeri ʋakaita seɀakarairwa Mosesi naJehova, ʋakakamura nyika.

⁶Ɀino ʋana ʋaJuda ʋakasweɗera kunaJoshua paGirgari, Karebi mŋanakomana waJefune, muKenizi, akati kwaari: Unoziʋa shoko rakataurwa naJehova kunaMosesi munhu waMŋari, pamsoro paŋgu napamsoro pako, paKadeshi‐barnea.

⁷Ini ndakaŋga ndaȿika makore anamakumi manna ŋguʋa yandakatumŋa naMosesi muranda waJehova paKadeshi‐barnea kundoshora nyika, ndikadzoka neshoko kwaari seɀandakafuŋga ini.

⁸Asi hama dzaŋgu dzakaŋga dzakwira neni dzakaʋodza mŋoyo yaʋanhu; asi ini ndakateʋera Jehova Mŋari waŋgu nomŋoyo wose.

⁹Mosesi akapika nomusi uyo, akati: Ɀirokwaɀo, nyika yakatsikwa norutsoka rwako, icaʋa nhaka yako neyaʋana ʋako nokusiŋgaperi, nokuti wakateʋera Jehova Mŋari waŋgu nomŋoyo wako wose.

¹⁰Ɀino tarira, Jehova wakandiceŋgeta ndiri mupenyu, seɀaakataura, makore ano anamakumi manna namashanu kubva paŋguʋa Jehova yaakataura shoko iri kunaMosesi, ʋaIsraeri ʋacafamba murenje; ɀino, tarira, nhasi ndaʋa namakore anamakumi masere namashanu.

¹¹Kunyaŋge ɀakaɗaro, nanhasi ndicinesimba seɀandakaŋga ndakaita nomusi wandakatumŋa naMosesi; seɀarakaŋga rakaita musi iwoyo, ndiɀo ɀakaita simba raŋgu nanhasi, kana rokurwa kana kuɓuɗa kana kupinda.

¹²Naiɀoɀo ɀino cindipa nyika iyi yamakomo yakarebga naJehova musi iwoyo; nokuti nomusi iwoyo wakanzwa iwe kuti ʋaAnaki ʋakaŋga ʋari’po namaguta makuru anamaȿiŋgo; ɀimŋe Jehova ucaʋa neni, ndikagona kuʋadziŋga, seɀakataurwa naJehova.

¹³Ipapo Joshua akamuropafadza, akapa Karebi mŋanakomana waJefune Hebroni, iʋe nhaka yake.

¹⁴Naiɀoɀo Hebroni rakazoʋa nhaka yaKarebi mŋanakomana waJefune, muKenizi, kuȿikira nhasi; nokuti wakaŋga ateʋera Jehova Mŋari waIsraeri nomŋoyo wake wose.

¹⁵Zita reHebroni pakutaŋga rakaŋga riri Kiriati‐arba; iye Arba wakaŋga ari munhu mukuru pakati paʋaAnaki ʋose. Ipapo nyika ikazorora pakurwa.